Niatreke olagne sambe hafa ty Nicolas naho i Céline. Tinendre ty sampa i Fransa iareo mba hifindra fiangonagne, le nagneke. Hoe iareo: “Tamy ty voaloha’e le nifale zahay, faie tafara izay le nanomboke nimanigne i nama’ay rey. Mbe tsy le nifandrambe am-po tamy ty rahalahy naho ty rahavave amy i fiangonagne vaovao nifindra’aỳ ao zahay.” a Va’e tsy ho mora ty miatreke o olagne reo. Faie ino ty hagnampe azo mba hahavita hiatreke izay? Ino ty azo ty hafa agnampeagne? Ino ty fitahiagne ara-pagnahy va’e ho azo’o naho i fiangonagne ifindra’oy?

TORO LALAGNE EFATSE HAGNAMPE AZO HIATREKE I OLAGNE REY

1. Miantehera amy i Jehovah. (Sal. 37:5) A Japon agne ty misy i Kazumi. Fa 20 taogne ty niaraha’e tamy ty fiangonagne nisy aze taloha faie nifindra fiangonagne reke naho fa niafekité ty vali’e. Akore ty fomba ‘nagnankigna’e ty lala’e tamy i Jehovah’? Hoe reke: “Nirehafeko tamy i Jehovah tie natahotse raho sady nahatsapa ho irerike naho ninekoneko. Nanao izay isan’andro raho le nagnomey ty hery nilaeko reke.”

Akore ka ty hahafa’o miantehetse tanterake amy i Jehovah? Mila rano naho tsiron-tane o hateo mba hitombo, le mila hanegne agn’ohatse hoe izay ka o finoagneo vaho matanjake. Nirehake ty Nicolas, i nirehafegne tambone teoy tie nahavy aze vao mainke hatoky ty fanohagna i Jehovah ty fisaintsaignagne ty ohatse miomba i Abrahama, i Jesosy naho i Paoly. Nanao sorogne maro o lahilahy reo mba hanoagne ty zoton’arofo i Jehovah. Ty fianaragne raike tsy tapake o Baibolio, le tsy tihoe hagnampe azo mba hahavita hiatreke ty fiovagne  amy ty fiaigna’o avao fa hagnampe azo ka mba hahatrea raha hampaherezagne ty hafa amy i fiangonagne vaovao misy azoy ao.

2. Ko mampitaha. (Mpito. 7:10) Nahatrea kolontsaigne sambe hafa ty Jules naho fa niala boake a Bénin agne le nifindra a Etazonia agne. Hoe reke: “Tsapako tie hoe voatere tsy maintsy nampahafantatse ze kila raha miomba ahy tamy ze ndaty vaho nitreako raho.” Faie satria reke tsy zatse izay le hafara’e nivibìke. Nagnova ty fomba fiheve’e reke naho fa nahafantatse soa o rahalahy naho rahavaveo. Hoe reke: “Mino raho tie ndra aia ndra aia omba’o amy ty tane toy eto le mitovy iaby naho fa ndaty. Ty firehake naho ty raha atao avao ro sambe hafa. Mila magneke rehe tie mitovy ama’o avao ty hafa.” Ko mampitaha areke naho fa miarake amo o fiangonagneo. Nirehake hoe izao ty rahavave mpisava lalagne raike atao tihoe Anne-Lise: “Nifindra raho satria te hahafantatse raha vaovao fa tsy tihoe nitamà tie hitovy amy ze kila raha iaby tamy i tragnoko talohay agne ty amy tragnoko vaovaoy ao.”

Tsy toko’e hampitaha i fiangonagne vaovaoy amy ty fiangona iareo taloha ka o androanavi-pagnahio. Tsy tihoe tsy mete ty fomba anoa iareo ty raha raike naho ohatse tsy manahake ty fomba anoa’o aze. Tena fahendreagne tihoe mamantatse heike ty raha misy an-toeragneo aloha ty hagnomeagne soso-kevetse. (Mpito. 3:1, 7b) Tena soa tihoe magnomey fitsikombe soa hoahy o rahalahio ta tie manere iareo hitovy hevetse ama’o.​—2 Kor. 1:24.

3. Mandrambesa anjara amy ze asa atao amy i fiangonagney ao. (Fil. 1:27) Ndra tie mitake fotoagne naho asa mafe aza ty fifindragne, le tena lahibey ty mikezake magnatreke fivoriagne amy i fiangonagne vaovao hisy azoy. Mikezaha hivory mivantagne naho mbe azo atao. Toko’e mba hahatrea azo mateteke ty rahalahy naho ty rahavave amy i fiangonagney ao mba hahafaha iareo hifandrambe maifitse ama’o sady hagnampe azo. Nifindra tamy ty tanàm-bey raike an’Afrika Atimo agne ty rahavave Lucinda naho ty ana’e roe vave. Hoe reke: “Nanoro hevetse ahike i namako rey tie toko’e hikezake hifandrambe maifitse amy ty mpiara-manompo amy i fiangonagne vaovao misy anaỳ ao raho, le hiarake hanompo amy iareo naho hagnomey toin-drehake. Nimea’ay hampiasaegne hanoagne fivoriagne aloha ty fanompoagne ka i tragno’aỳ.”

Naho “miarake mikezake hoe ndaty raike” tika naho fa manompo, le hagnatanjake ty ‘finoantika i talily soay’ zay. Nirisihe ty androanavi-pagnahy iareo ty Anne-Lise, i nirehafegne taloha teoy, mba hiarake hitory amy ty tsikiraidraike amy ty fiangonagne eo. Ino ty nivoka’e? Hoe reke: “Nahatsapa ho agnisa i fiangonagney raho naho fa nanao izay.” Naho mandrambe anjara amy ty fagnaliovagne naho ty fikojakojagne i Anjomba i Fanjakagney ka rehe, le hotrea o mpiara-manompò tie fa mihevetse i fiangonagne vaovaoy ho fiangona’o. Arakarake ty andrambesa’o anjara amy ty asa atao agnivo ty fiangonagne eo, ty hahavy o mpiara-manompò  hifandrambe ama’o sady hahavy azo hahatsapa tie fa iareo ka ty keleia’o ara-pagnahy.

4. Mipaliava namagne vaovao. (2 Kor. 6:11-13) Naho trea o ndatio tie midare iareo rehe, le ho mora amy iareo ty hinamagne ama’o. Mikezaha areke ho avy aloha am-pivoriagne agne le ko le avy le moly ka naho fa rava mba hahafaha’o hirehake amy iareo. Mikezaha hahafantatse ty agnara iareo. Naho mahatadidy ty agnara iareo rehe sady soa fagnahy amy iareo, le hanjare te hahafantatse azo naho te hiragnetse ama’o iareo.

Ko aetake ty tena maha ie azo fa atorò iareo. Tsikombeo ty raha natao i Lucinda. Hoe reke: “Managne namagne maifitse anay zahay hinane zao satria nikezake nanasa ty hafa ho an-tragno’ay agne.”

“MIFANDRAMBESA SOA”

Va’e hampatahotse ty ndaty ila’e ty hilitse amy ty Anjomba i Fanjakagney naho maro ndaty tsy fanta’e ty ao. Ino ty azo’o atao mba hahavy ze ndaty mifindra amy ty fiangona’areo ao tsy hahatsapa hoe izay? Hoe ty apostoly Paoly: “Nandrambe soa anareo ty Kristy, le mifandrambesa soa manahake izay ka nareo.” (Rom. 15:7) Naho manahake i Kristy o androanavi-pagnahio, le hahatsapa hovoarambe soa o ndaty ambahinio. (Henteo ty efajoro tihoe “ Ino ty Raha Mila Atao Naho fa Hifindra Fiangonagne?”) Faie sambe afake mandrambe soa ty ambahiny ka ty tsikiraidraike agnivo ty fiangonagne eo, agnisa izay o ajajao.

Mandrambe soa ty hafa tika naho manasa iareo ho an-tragnontika agne ndra magnampe iareo. Nisy rahavave raike zay ohatse, nanokagne fotoagne mba hagnampeagne ty rahavave raike ambahiny hahafantatse i tanà iareoy sady nanoro aze ty fomba fangalagne bisy naho lamasina. Nanohigne ty fo ambahinỳ zay sady nagnampe aze ho tamagne soa.

AFAKE TY HANDROSO ARA-PAGNAHY REHE

Miofoke mateteke o valalao zay vaho mitiligne. Manahake izay avao ka, fa mila miala amy ze raha mikalagne azo tsy handroso ara-pagnahy rehe  naho fa mifindra fiangonagne. Hoe ty Nicolas naho i Céline: “Mampiofagne o fifindragneo. Tsy maintsy mambole toetse vaovao rehe naho te hifandrambe amy ty ndaty vaovao ndra te hotamagne amy i toeragne ifindra’oy.” Nirehake ty soa nirambese ty keleia’e ka ty Jean-Charles, le hoe reke: “Nanjare nihamatotse naho nifandrambe maifitse amy i Jehovah i ana’ay rey naho fa niavy tamy i fiangonagne vaovaoy ao. Volagne tsiampeampe tafara ty niavia’ay avao, le nanomboke nanao fampiofagnagne i anak’ampela’aỳ, le i ana-dahi’aỳ nanjare mpitory tsy vita badisa.”

Ino ty azo atao naho ohatse tsy afake mifindra amy ty toeragne ilagne mpitory maro agne rehe noho ty raha iaigna’o? Hevero ho fiangonagne vaovao i fiangonagne misy azoy, le ampiharo ty ila’e amy i soso-kevetse atoagne rey. Miantehera amy i Jehovah le mandrambesa anjara amy ze asa atao amy i fiangonagney ao. Mandamìna ka fotoagne mba hahafaha’o hiara-hiasa amy ty hafa amy fanompoagney ey, le mikezaha hahazo namagne vaovao ndra hagnamafe ty fifandrambesa’o amy ty nama’o. Afake magnampe ze ndaty vaovao ndra ze mipay fagnampeagne ka rehe? Handroso ara-pagnahy rehe naho manao izay satria ty hatea ty amantaragne ty Kristiana vata’e. (Jaona 13:35) Afake matoky rehe tie ‘ankasitrahan’Andrianagnahare ty sorogne hoe izay.’​—Heb. 13:16.

Maro ty Kristiana nahavita nifindra fiangonagne ndra tie eo aza ty olagne natrehe iareo. Afake ty hahavita izay ka areke rehe! Hoe ty Anne-Lise: “Nagnampe ahy hagnalalake ty foko ty fifindragne fiangonagne.” Rese lahatse ty Kazumi amy izao fa naho mifindra monegne rehe le “tsy hampoize’o ty fagnampeagne homea i Jehovah azo.” Ino ka ty nitsapa i Jules? Hoe reke: “Naho fa nahazo namagne maro raho le tsy nahatsapa ho ambahiny sasa. Mifandrambe soa amy i fiangonagne vaovao misy ahikey raho ty amy izao sady tsy mahafoe iareo.”