Ino ty Atao Tihoe Filan-keve-pitantana ty Vavolombelo i Jehovah?
Ty atao tihoe Filan-keve-pitantanagne, le lahilahy Kristiana matotse tsiampeampe, magnomey tari-dalagne hoahy ty Vavolombelo i Jehovah magneran-tane. Mizara roe ty asa iareo:
Iareo ty miandraikitse ty fikarakaragne ty raha haboake amo o boke aman-gazeteo, ndra hianaragne am-pivoriagne agne naho amy ty sekoly ara-baiboly atao o Vavolombelo i Jehovah-o.—Lioka 12:42.
Iareo ty magnara-maso ty asa atao ty Vavolombelo i Jehovah magneran-tane. Agnisa izay ty asa fitoriagne atao’ay. Mitantagne ty vola naho ty fagnomezagne iaby mey o ndatio ka iareo.
Manahake i “apostoly naho i androanavi-pagnahy ta Jerosalema tagne” tamy i taonjato voaloha’e rey, o Filan-keve-pitantanagneo. Nandrambe fanapahan-kevetse lahibey o lahilahy rehoe tie taloha mba hahasoa ty fiangonagne iaby. (Asan’ny Apostoly 15:2) Tsy iareo ty nitarike ty fiangonagne Kristiana tamy izay. Tsy ty Filan-keve-pitantanagne ka ty mpitarike ty fandaminagne misy anay. Eké o rahalahy agnisa ty Filan-keve-pitantanagneo fa i Jesosy Kristy ro nitendre i Jehovah Andrianagnahare ho Loha ty fiangonagne, le mipay tari-dalagne amy Baiboly ao iareo naho fa hanapa-kevetse.—1 Korintianina 11:3; Efesianina 5:23.
Ia iaby ty agnisa ty Filan-keve-pitantanagne?
Intoagne iaby ty agnisa ty Filan-keve-pitantanagne: I Kenneth Cook, i Gage Fleegle, i Samuel Herd, i Geoffrey Jackson, i Stephen Lett, i Gerrit Lösch, i Mark Sanderson, i David Splane, naho i Jeffrey Winder. Manompo amy ty foibei’ay a Warwick, a Etazonia, agne iareo.
Akore ty fomba fiasa o Filan-keve-pitantanagneo?
Nanangagne komity enegne o Filan-keve-pitantanagneo mba hiandraikitse ty asa sambe hafa atao’ay Vavolombelo i Jehovah, le manompo amy ty raike ndra maromaro amo o komity reo ty tsikiraidraike amy iareo.
Komity ty Mpandrindra: Miandraikitse ze raha miomba ty lalàna. Mandrambe andraikitse naho fa misy loza ndra naho fa enjehegne noho ty finoa’ay zahay Vavolombelo i Jehovah, ndra naho fa misy olagne hafa mahazo anay, le mila alamigne malaky.
Komity ty Mpiasa: Mikarakara ze raha ilae ty keleia i Betela magneran-tane.
Komity ty Asa Fanoagne Pirinty: Miandraikitse ty fanoagne pirinty boke naho gazete vaho ty fandefasagne aze. Magnara-maso ty fagnoregnagne toeram-pivoriagne naho ty birò fandikan-drehake vaho ty tragno i sampagne.
Komity ty Fanompoagne: Miandraikitse ty fitoriagne ty “talily soa i fanjakagney.”—Matio 24:14.
Komity ty Fampianaragne: Magnomagne hanegne ara-pagnahy ianaragne am-pivoriagne agne, amy ty sekoly isan-karaza’e naho video vaho fandaharagne hafa nalaem-peo.
Komity ty Fanoratagne: Mandineke tie inogne ty fampianaragne ara-baiboly haboake amo o boke naho o gazeteo vaho amo o tragnom-poraro’aio. Miandraikitse ty asa fandikan-drehake ka o komity iohoe.
Ankoatse ty raha atao ty Filan-keve-pitantanagne amo o komity reo, le mivory ka iareo isan-keregnandro mba handineke ty raha ilae ty fandamina’ay. Mandineke ze raha rehafe ty Soratse Masigne iareo amy i fivoriagne rey sady magneke ho tarihe ty fagnahy masin’Andrianagnahare, le miharo saigne amy ze fanapahan-kevetse horambesegne.—Asan’ny Apostoly 15:25.
Ia ka i aze atao tihoe mpagnampe ty Filan-keve-pitantanagne rey?
Kristiana azo itokisagne iareo, le magnampe o komity amo o Filan-keve-pitantanagneo reo. (1 Korintianina 4:2) Fa mahay soa ty asa atao’e amy i Komity misy azey ao iareo sady managne traikefa amy izay. Magnatreke ty fivoriagne isan-keregnandro fanoe ty komity misy aze ka iareo. Tsy manapa-kevetse iareo fa magnomey soso-kevetse naho fagnazavagne mete hilaegne, magnatanterake ty fanapahan-keve i komitỳ sady magnente tie nanao akore ty voka’e. Va’e hasae ty Filan-keve-pitantanagne hitilike ty Vavolombelo i Jehovah nama’ay amy ty toeragne maro magneran-tane iareo, ndra va’e ho tendregne hanao anjara amy ty fivoriagne fatao isan-taogne ndra amy ty Fizaràgne Diploma i Gileada.
Komity ty |
Agnaragne |
---|---|
Mpandrindra |
|
Mpiasa |
|
Asa Fanoagne Pirinty |
|
Fanompoagne |
|
Fampianaragne |
|
Fanoratagne |
|