Agnaragne nimeigne i Jesosy tamy ireke mbe tsy tan-tane etoỳ naho tafara ty nandehana’e an-dagnitse agne tihoe Mikaela. Misy ka fivavahagne mitoka aze tihoe “Masindahy Misely.” a Nifamale tamy i Satana ty Mikaela naho fa nimate ty Mosesy. Nagnampe ze anjely raike zay ka reke mba hampita ty hafan’Andrianagnahare tamy i Daniela mpaminany. (Daniela 10:13, 21; Joda 9) Tihoe Mikaela le midika tihoe “Ia ty mitovy aman’Andrianagnahare.” Tena mete amy i Jesosy ze agnaragne zay, satria miaro ty fitondran’Andrianagnahare reke sady mialy amo o fahavalon’Andrianagnahareo ka.​—Daniela 12:1; Apokalypsy 12:7.

 Andao tika hagnente porofo tie i Jesosy avao o atao tihoe Mikaela arkanjelio.

•   I Mikaela i ‘arkanjelỳ.’ (Joda 9) “Filoha ty anjely” ty dika i agnaram-boninahitse tihoe “arkanjelỳ.” Roe avao ty andinin-teny ahatreavagne o rehake iohoe amy Baiboly ao, sady manondro raha tokagne o rehake iohoe fa tsy maro. Midika zay fa anjely raike avao ty managne o agnaram-boninahitse iohoe. Mirehake ty raike amo o andine’e reo tie i Jesosy Tompo natsangagne tamy ty matey, le ‘hizotso boake an-dagnitse agne hikomandy amy ty feon’arkanjely.’ (1 Tesalonianina 4:16) ‘Feon’arkanjely’ ty feo i Jesosy satria ireke ro Mikaela arkanjely.

•   Mpitarike o tafik’anjelio ty Mikaela. “I Mikaela naho o anjeli’eo nialy tamy i dragogney,” ndra i Satana. (Apokalypsy 12:7) Managne fahefagne lahibey an-dagnitse agne areke ty Mikaela, kanao reke rehafegne tie “raike amo o roandriagne fara’e lahibeio” naho tihoe “i Roandriam-beỳ.” (Daniela 10:13, 21; 12:1) Nirehake ty David Aune, manam-pahaizagne miomba ty Testamenta Vaovao, tie “mpitari-tafike fara’e lahibey o tafik’anjelio” ty Mikaela, kanao managne o agnaram-boninahitse rehoe.

   Ankoatse i Mikaela, le i Jesosy avao ro rehafe ty Baiboly tie managne fahefagne amo o tafik’anjelio. Hoe ty Baiboly: ‘Habaribary boake an-dagnitse agne ty Jesosy Tompo naho o anjeli’e maherio, agnate ty afo mirearea.’ (2 Tesalonianina 1:7, 8; Matio 16:27) Naho fa “nandeha an-dagnitse agne” ty Jesosy, le ‘nasaegne nagneke aze ty anjely naho ty fahefagne vaho ty fanjakagne.’ (1 Petera 3:21, 22) Mpitari-tafik’anjely ty Jesosy, le i Mikaela ka hoe izay. I Andrianagnahare vao le hanendre mpitari-tafik’anjely roe hifandrafe? Tena mitombegne areke tihoe i Jesosy avao o atao Mikaelao.

•   “Hitsangagne” ty Mikaela agnate i “andro mahaore” mbe tsy nisy manahake aze hatrake amy izaỳ. (Daniela 12:1) Mateteke ro rehafe ty boke i Daniela tie ‘mitsangagne’ ty mpanjaka raike, naho fa hisy raha miambake hatao i mpanjakay. (Daniela 11:2-4, 21) Rehafegne tihoe “Ty Saontsin’Andrianagnahare” ty Jesosy Kristy. Faie “Mpanjaka ty mpanjaka” ka reke, le hanao raha miambake. Handringagne o fahavalon’Andrianagnahareo reke sady hiaro o vahoan’Andrianagnahareo. (Apokalypsy 19:11-16) Hanao izay reke amy i ‘haoreagne lahibey mbe tsy nisy nanahake aze amparake ty nifotora ty tane toy iabỳ.’​—Matio 24:21, 42.