Misy fiagne kedekede atao tihoe Grunion ty amoron-dria i Pasifika a Kalifornia, a Etazonia agne naho amy ty toeragne atao tihoe Baja Kalifornia, a Meksika agne. Fantare o fiagne kedekede iohoe soa ty andro naho ty fotoagne hagnatoliza’e mba tsy himateza ty tarana’e.

 Dineho zao: Naho fa zava-volagne i androy ndra naho fa amy ty fotoagne fihirifa i volagney, le bey i riakey. Agnate ty efatse ndra telo andro afara izay ty agnatoliza o fiagne atao tihoe Grunion iohoe. Naho amy ty halegne raike aloha i zava-volagney ndra aloha i hirim-bolagney ty agnatoliza’e, le va’e handese i riakey reketse i fasekey i atoli’ey. Faie naho ty maregne le afara ty ibeìza i riakey ty agnatoliza’e satria manomboke mihamihegne tsikedetsikede i riakey sady mihamaro i faseke afake miaro i atoli’eỳ.

 Magnatoly ka o Grunion-io naho fa lohataogne naho fahavaratse. Naho fa amo o fotoagne rehoe, le bey i riakey naho fa halegne naho ampitahaegne amy i atoandroy. Afake milagno mbam-paseke mbeo areke i fiagney, le voaro i atoli’e amparake ty hibeìza i riakey.

 Mandigne ty hibeìza i onjay i fiagney amy izay minday aze mbam-paseke mbeo mba hahafaha’e magnatoly. Naho fa miheregne i onjay, le ampiasae’e ty vata’e mba hihaliagne lavake amy i faseke legney eo. Ie vita zay, le amoa’e agnate lavake agne i ohi’ey. Mahatratse 5 hatrake amy ty 8 santimetatse ty halale i lavake agnatoliza’ey. Afara izay le misy fiagne lahi’e raike ndra mihoatse izay mamàna i atoli’ey. Mandigne ty iheregna i onjay indraike areke i fiagne vave’ey mba hinday aze mban-driake mbeo agne.

 Agnate i faseke legney ao ty itomboa i atolỳ, faie i onjan-driakey ty mamoy aze. Afake tapa-bolagne eo ho eo le foy amy izay i atolỳ naho fa bey i riakey. Faie afake mijanogne vola’e raike agnate i fasekey ao i atolỳ amparake ty ibeìza i riakey.

 Akore ty heve’o? Nisinisy ho aze avao vao ty fahaia o Grunion-io mifily ty fotoagne naho ty fomba hagnatoliza’e? Sa nisy namorogne?