Haʼu moris iha sidade Londres, rai-Inglaterra, iha bairru Paddington. Haʼu hela hamutuk ho haʼu-nia inan no biin naʼin-tolu. Haʼu-nia aman ladún fila ba uma tanba nia lanu-teen.

Bainhira haʼu sei kiʼik, haʼu-nia inan hanorin haʼu atu halo orasaun kalan-kalan. Haʼu iha deʼit livru Salmo husi Bíblia, no haʼu koko atu kanta salmu sira-neʼe hodi inventa melodia rasik. Loron ida, haʼu lee livru ida neʼebé dehan: “Mundu neʼe sei la iha tan.” Liafuan neʼe halo haʼu hanoin barak kona-ba futuru toʼo la bele toba. Haʼu hanoin: ‘Ita-nia moris hanesan neʼe deʼit ka lae? Tanbasá mak haʼu moris?’ Haʼu sente taʼuk tebes ba mate!

Haʼu komesa buka-hatene kona-ba buan no masonik. Haʼu koko atu koʼalia ho matebian, no hamutuk ho haʼu-nia kolega eskola sira, ami haree filme buan sira no mós bá halimar iha rate tanba ami hakarak hasoru mate-klamar. Maski ami sente taʼuk tebes, maibé ami gosta halo buat sira-neʼe.

Bainhira haʼu tinan sanulu, haʼu komesa halo hahalok aat oioin. Haʼu hahú fuma sigarru no sai toman. Lakleur, haʼu mós fuma ganja. Bainhira haʼu tinan 11, haʼu komesa hemu tua. Maski haʼu la gosta tua nia sabór, maibé haʼu gosta atu lanu. Haʼu mós gosta múzika no dansa, tan neʼe haʼu buka oportunidade naran deʼit atu bá festa no diskoteka. Haʼu sai husi uma subasubar deʼit iha kalan, no antes rai naroman mak haʼu foin fila ba uma. Neʼe halo haʼu kole tebes no falta eskola beibeik. No bainhira haʼu bá eskola, dala barak haʼu hemu tua iha tempu rekreiu.

Iha tinan neʼebé haʼu ramata eskola, haʼu hetan valór neʼebé kiʼik tebes. Neʼe halo haʼu-nia inan sai triste no hirus, liuliu tanba nia foin hatene kona-ba hahalok aat oioin neʼebé haʼu halo. Ami diskute malu makaʼas, no haʼu halai sai husi uma. Ba tempu balu, haʼu hela hamutuk ho haʼu-nia namoradu naran Tony. Nia mak naʼok-teen, faʼan droga no gosta halo violénsia. Lakleur, haʼu sai isin-rua, no ho tinan 16 deʼit, haʼu tuur ahi ami-nia oan-mane.

Dala primeiru neʼebé haʼu hasoru Testemuña ba Jeová mak bainhira haʼu hela iha asrama neʼebé governu prepara ba inan sira neʼebé la iha kaben. Feto Testemuña ba Jeová naʼin-rua vizita beibeik inan joven balu iha asrama neʼe. Loron ida, haʼu mós tuur hamutuk ho sira tanba haʼu hakarak hatudu katak Testemuña nia hanorin mak laloos. Maibé Testemuña sira hatán haʼu-nia pergunta ida-idak ho kalma hodi uza Bíblia. Sira-nia hahalok laran-diʼak book tebes haʼu-nia laran, entaun haʼu komesa estuda Bíblia ho sira.

Lakleur, buat neʼebé haʼu aprende husi Bíblia troka haʼu-nia moris. Husi kiʼik kedas, haʼu taʼuk mate. Maibé, agora haʼu hatene Jesus nia hanorin kona-ba moris-hiʼas! (João 5:28, 29) Haʼu mós hatene katak Maromak hanoin haʼu. (1 Pedro 5:7) Eskritura ida neʼebé kona loos haʼu-nia laran mak Jeremias (Yeremia) 29:11, neʼebé hatete: “Jeová dehan: ‘Tanba haʼu hatene didiʼak buat neʼebé haʼu hakarak ba imi, haʼu hakarak fó dame ba imi, laʼós fó-terus, no haʼu hakarak fó ba imi futuru no esperansa.’” Haʼu komesa fiar ba esperansa atu moris ba nafatin iha mundu foun.—Salmo (Mazmur) 37:29.

Testemuña ba Jeová sira hatudu mai haʼu domin neʼebé loos. Bainhira haʼu foin primeiravés tuir sira-nia reuniaun, sira hotu simu haʼu ho laran-diʼak! (João 13:34, 35) La hanesan ho ema sira neʼebé uluk haʼu hasoru iha igreja, Testemuña sira ho oin-midar fó benvindu mai haʼu. Sira fó tempu no atensaun mai haʼu, no sira mós prontu atu ajuda haʼu iha dalan oioin. Haʼu sente katak haʼu mak parte ida husi família boot neʼebé nakonu ho domin.

Liuhusi estuda Bíblia, haʼu rekoñese katak haʼu tenke troka haʼu-nia moris hodi tuir Maromak nia kritériu kona-ba morál. Haʼu hakaʼas an atu para fuma maski la fasil. Haʼu mós rekoñese katak múzika balu bele halo haʼu hakarak fuma ganja, tan neʼe haʼu hili didiʼak múzika neʼebé haʼu rona. Hodi bele hasees an husi tentasaun atu hemu tua toʼo lanu, haʼu la bá tan festa no diskoteka. Haʼu mós ransu ho kolega sira neʼebé bele ajuda haʼu atu iha morál neʼebé diʼak.—Provérbios (Amsal) 13:20.

Durante tempu neʼe, Tony mós estuda Bíblia ho Testemuña ba Jeová. Nuʼudar Testemuña sira hatán ba ninia pergunta oioin husi Bíblia, Tony mós fiar katak buat neʼebé nia aprende mak lia-loos duni. Nia komesa halo mudansa oioin iha ninia moris: nia la ransu tan ho kolega sira neʼebé gosta halo violénsia, la halo tan krime, no la fuma tan ganja. Atubele halo Jeová kontente, ami deside atu hadiʼa ami-nia hahalok neʼebé la morál no haboot ami-nia oan iha dalan neʼebé loos. Tan neʼe, ami kaben iha tinan 1982.

Iha tempu neʼebá, haʼu buka informasaun husi Livru Haklaken no Matan-moris bá! * atu bele lee esperiénsia oioin kona-ba ema neʼebé konsege husik toman aat hanesan haʼu-nian. Sira-nia ezemplu anima tebes haʼu no fó forsa mai haʼu atu hakaʼas an nafatin. Haʼu kontinua halo orasaun ba Jeová atu nia nafatin ajuda haʼu. Ikusmai iha Jullu 1982, Tony no haʼu hetan batizmu nuʼudar Testemuña ba Jeová.

Hodi hakbesik ba Maromak Jeová, neʼe salva haʼu-nia moris. Tony no haʼu haree rasik oinsá mak Jeová ajuda ami iha tempu susar. Ami aprende atu sadere ba Jeová, no nia sempre ajuda no apoia ami-nia família.—Salmo (Mazmur) 55:22.

Haʼu sente kontente tanba bele ajuda ami-nia oan-mane no oan-feto atu koñese didiʼak Jeová. Agora haʼu-nia bei-oan sira mós aprende daudauk kona-ba Maromak Jeová, no ida-neʼe lori ksolok mai haʼu.

Agora haʼu bele toba-dukur iha kalan no la hanoin demais kona-ba futuru ka mate. Semana-semana, Tony no haʼu vizita kongregasaun oioin husi Testemuña ba Jeová no fó anima ba ami-nia maluk sira. No ami serbisu hamutuk ho sira hodi ajuda ema seluk atu tau fiar ba Jesus no hetan moris neʼebé kontente ba nafatin.