LISAUN 4
Sé mak Jesus Kristu?
1. Jesus mai husi neʼebé?
Jesus nia hahalok saida deʼit mak halo fasil ba ema atu hakbesik nia?—MATEUS 11:29; MARCOS 10:13-16.
Jesus la hanesan ho ema seluk tanba antes nia moris iha mundu, nia moris ona nuʼudar anju ida iha lalehan. (João 8:23) Jesus mak Maromak nia kriasaun primeiru, no nia ajuda Maromak atu kria buat hotu. Só Jesus deʼit mak Maromak Jeová kria rasik, tan neʼe Bíblia hatete katak Jesus mak Maromak nia “oan-mane mesak”. (João 1:14) Jesus nia knaar ida mak hatoʼo Maromak nia liafuan, tan neʼe Bíblia bolu nia nuʼudar “Liafuan”.—Lee Provérbios 8:22, 23, 30; Koloso 1:15, 16.
2. Jesus mai toʼo mundu atu halo saida?
Maromak haruka ninia Oan-Mane mai iha mundu hodi muda ninia moris husi lalehan ba feto virjen ida nia knotak. Feto neʼe naran Maria. Jesus la iha aman ida iha mundu. (Lucas 1:30-35) Jesus mai toʼo mundu (1) atu hanorin lia-loos kona-ba Maromak, (2) atu fó ezemplu ba ita oinsá atu halo tuir Maromak nia hakarak maski hetan susar, no (3) atu fó ninia moris nuʼudar sakrifísiu hodi “sosa fali ema barak”.—Lee Mateus 20:28.
3. Tanbasá mak ita presiza salvadór ida?
Bainhira Maromak kria ema, nia la planu atu ema sai ferik-katuas no mate. Oinsá mak ita hatene? Maromak hatete ba ema primeiru, Adão, katak se nia halo sala, nia sei mate. Neʼe katak se Adão la halo sala, nia sei nunka mate. (Génesis 2:16, 17; 5:5) Bíblia hatete katak liuhusi Adão, mate “tama” iha mundu. No Adão hatutan sala no mate ba ninia oan no bei-oan hotu. Ita presiza ema ruma atu sosa fali ita-nia moris hodi salva ita husi sala no mate neʼebé ita simu husi Adão.—Lee Roma 5:12; 6:23.
Kuandu ita mate, ita selu ita rasik nia sala. Maibé ita ema sala-naʼin labele selu ka kasu ema seluk nia sala. Se nuneʼe, sé mak bele sosa fali ita atu sai livre husi sala no mate?—Lee Salmo 49:7-9.
4. Tanbasá mak Jesus mate?
Jesus mak ema neʼebé perfeitu, la hanesan ho ita. Nia nunka halo sala, tan neʼe nia la presiza mate. Maibé Jesus mate atu kasu ema seluk nia sala. Maromak hatudu ninia domin boot mai ita hodi haruka ninia Oan-Mane atu mate ba ita. Jesus mós hatudu domin tanba nia halo tuir ninia Aman hodi fó ninia moris atu taka ita-nia sala.—Lee João 3:16; Roma 5:18, 19.
Haree vídeo Tanbasá mak Jesus mate?
5. Saida mak Jesus halo daudauk agora?
Bainhira Jesus iha mundu, nia kura ema moras, fó moris-hiʼas ba ema neʼebé mate no fó kmaan ba ema neʼebé iha terus laran. Hodi halo nuneʼe, nia hatudu buat neʼebé nia sei halo iha futuru ba ema hotu neʼebé halo tuir Maromak. (Mateus 15:30, 31; João 5:28) Depois Jesus mate tiha, Maromak halo nia moris fali nuʼudar anju. (1 Pedro 3:18) Bainhira Jesus fila fali ba lalehan, nia hein iha Maromak Jeová nia liman-loos toʼo Maromak fó kbiit ba nia atu ukun mundu tomak nuʼudar Liurai. (Ebreu 10:12, 13) Agora, Jesus ukun daudauk nuʼudar Liurai iha lalehan, no ohin loron ema neʼebé halo tuir nia haklaken liafuan diʼak neʼe iha mundu tomak.—Lee Daniel 7:13, 14; Mateus 24:14.
Lakleur tan, Jesus sei uza ninia kbiit nuʼudar Liurai hodi halakon terus hotu, no mós ema neʼebé hamosu terus. Iha tempu neʼebá, ema hotu neʼebé tau fiar ba Jesus hodi halo tuir nia, sei moris ba nafatin iha mundu paraízu neʼebé hanesan jardín Eden.—Lee Salmo 37:9-11.
