Maromak hakarak atu feto no mane neʼebé kaben ona mak bele halo relasaun seksuál. (Génesis 1:​27, 28; Levítico 18:22; Provérbios 5:​18, 19) Bíblia bandu hahalok seksuál hotu entre ema neʼebé seidauk kaben. (1 Korinto 6:​18) Hahalok sira-neʼe inklui halo relasaun seksuál, halo buat seksuál ho ibun ka kidun no kaer ema seluk nia oin-lulik.

Maski Bíblia bandu hahalok omoseksuál, maibé Bíblia la anima ema atu odi ema omoseksuál sira. Bíblia anima ema atu “hatudu respeitu ba ema oioin.”​—1 Pedro 2:​17.

Ema balu moris mai hanesan neʼe ona ka lae?

Bíblia la esplika tanbasá mak ema balu iha hakarak omoseksuál nian. Maibé Bíblia hatete katak ema hotu moris mai ho hakarak atu kontra Maromak nia mandamentu sira. (Roma 7:​21-​25) Maski Bíblia la esplika tanbasá mak ema balu iha hakarak omoseksuál nian, maibé Bíblia bandu hahalok omoseksuál hotu.

Oinsá mak Ita bele halo Jeová kontente maski Ita iha hakarak omoseksuál nian.

Bíblia hatete: “Hamate hakarak isin nian neʼebé book imi atu halo sala seksuál.” (Koloso 3:5) Atubele hamate Ita-nia hakarak isin nian neʼebé laloos, Ita presiza kontrola Ita-nia hanoin. Se Ita sempre hanoin kona-ba buat neʼebé diʼak, neʼe bele ajuda Ita atu la hanoin kona-ba hakarak isin nian neʼebé laloos. (Filipe 4:8; Tiago 1:​14, 15) Karik, foufoun susar atu halo ida-neʼe, maibé neineik-neineik neʼe sei sai fasil ba Ita. Maromak promete atu ajuda Ita ‘hafoun Ita-nia dalan atu hanoin’.​—Éfeso 4:​22-​24.

Ema millaun ba millaun mós hakaʼas an atu halo tuir Bíblia nia matadalan hodi hamate sira-nia hakarak isin nian. Porezemplu, iha mane ka feto klosan neʼebé ladún iha oportunidade atu hetan pár no kaben, no iha mós kaben-naʼin sira neʼebé labele halo relasaun seksuál tanba moras ruma ka asidente. Maski karik sira presiza hasoru tentasaun barak, maibé sira hili atu kontrola sira-nia hakarak seksuál. No sira nafatin bele moris ho kontente. Tuir loloos, ema ho hakarak omoseksuál nian mós bele kontrola sira-nia hakarak seksuál, se sira hakarak duni halo Maromak kontente.​—Deuteronómio 30:19.