APRILI 23, 2024
URUSI

Tunathamini Sana Pendeleo la Kumtumikia Yehova

CHEZA

Mahakama ya Pervomayskiy iliyo katika Wilaya ya Izhevsk katika Jamhuri ya Udmurtian, itatangaza uamuzi wake katika kesi inayowahusu Ndugu Yevgeniy Stefanidin na Ndugu Aleksandr Votyakov. Mwendesha mashtaka bado hajatoa ombi la hukumu anayopendekeza.

Maelezo Mafupi Kuwahusu

Yevgeniy Stefanidin

Alizaliwa: 1989 (Izhevsk)

Maisha Yake: Alifanya kazi katika eneo la kuuza bidhaa

Yevgeniy alilelewa akiwa mmoja wa Mashahidi wa Yehova. Alipokuwa na umri wa miaka kumi, nyanya (bibi) yake alikufa. Tumaini la ufufuo lilimsaidia kumkaribia Yehova hata zaidi. Alibatizwa mwaka wa 2006

Alifunga ndoa na Marina mwaka wa 2011. Wana binti mmoja

Mwaka wa 2022, Yevgeniy aligunduliwa kuwa na kansa

Maelezo ya Kibinafsi

Ni nini kimekusaidia kudumisha mtazamo mzuri unapokuwa ukiteswa?

Ninapotumia wakati kutafakari kuhusu baraka nyingi nilizopata katika siku hiyo, ninapata shangwe hata zaidi. Pia, ninajikumbusha mimi mwenyewe kwamba ingawa Yehova ameruhusu niteseke, yeye si wa kulaumiwa. Hivi karibuni, ataondoa maovu yote ambayo watumishi wake waaminifu wametendewa. Ni muhimu pia kwangu kudumisha uhusiano wa karibu na Yehova pamoja na ndugu na dada zangu. Dada mmoja aliniambia hivi: “Tabasamu yako inatia moyo sana. Kuona jinsi unavyoendelea kudumisha mtazamo mzuri chini ya hali hizi kunanifanya niwe na uhakika na nisiwe na woga.” Kwa kweli ninathamini sana kuwa sehemu ya familia ya Yehova.

Aleksandr Votyakov

Alizaliwa: 1973 (Izhevsk)

Maisha Yake: Alifanya kazi ya ujenzi

Alifunga ndoa na Liliya mwaka wa 1995

Alivutiwa na mabadiliko mazuri ambayo mke wake alifanya baada ya kuwa Shahidi wa Yehova. Aleksandr alibatizwa mwaka wa 2006

Maelezo ya Kibinafsi

Ni masomo gani muhimu uliyojifunza kupitia hali hii?

Nimejifunza umuhimu wa kumtumaini Yehova na kuepuka kuwa na shaka kwamba atanitegemeza. Nilitumia miezi sita hivi nikiwa katika kifungo cha nyumbani na sikuwa na uwezo wa kufanya kazi. Na wakati huohuo mke wangu alikuwa mgonjwa sana. Lakini tulijionea wazi jinsi Yehova alivyotusaidia. Ndugu na dada zetu walitutunza na kutupatia vitu tulivyohitaji. Ndugu wa ukoo ambao si Mashahidi walishangaa sana kuona jinsi ndugu na dada zetu walivyotusaidia. Kuona jinsi Yehova anavyonitegemeza, kunanifanya nithamini pendeleo langu la kuwa mtumishi wake.

Kama Aleksandr na Yevgeniy, tunaliona kuwa pendeleo kubwa “Kumtolea [Yehova] utumishi mtakatifu bila woga” siku zetu zote.—Luka 1:74, 75.

Mfuatano wa Matukio

Aprili 14, 2021

Maofisa wa usalama walifanya msako kwenye nyumba ya Yevgeniy
Desemba 13, 2022

Kesi ya uhalifu ilifunguliwa dhidi ya Aleksandr na Yevgeniy
Desemba 14, 2022

Maofisa walifanya msako kwenye nyumba ya Aleksandr na ya Yevgeniy. Aleksandr alipelekwa mahabusu. Yevgeniy aliwekewa vizuizi vya kusafiri
Desemba 15, 2022

Aleksandr aliachiliwa kutoka mahabusu na akawekwa katika kifungo cha nyumbani
Juni 9, 2023

Aleksandr aliachiliwa kutoka katika kifungo cha nyumbani na akawekewa vizuizi vya kusafiri
Agosti 17, 2023

Kesi ya uhalifu ilianza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI