Ho Phela Hantle ’Meleng
Bibele ha se buka ea bongaka. Empa e na le likeletso tse ka re thusang hore re lule re phetse hantle. Utloa hore na e re u ka etsa’ng ha u batla ho phela hantle.
ITLHOKOMELE
MOLAO-MOTHEO: “Ha ho motho ea kileng a hloea nama ea hae empa oa e fepa le ho e baballa.”—Baefese 5:29.
HO BOLELOA’NG? Bibele e re eletsa hore re sebetse ka thata ho hlokomela ’mele ea rona. Koranta e ’ngoe e re mafu a mangata a bakoa ke tsela eo batho ba phelang ka eona. Ekaba hantle hore re etse liqeto tse nepahetseng e le hore re phele hantle.
U KA ETSA’NG?
-
E-ja Hantle. U lokela ho ja lijo tse nang le phepo u be u noe metsi haholo hore u phele hantle.
-
Ikoetlise. U ka lula u phetse hantle haeba feela u ikoetlisa. Taba ena ke ea bohlokoa ho sa tsotellehe hore na u lilemo li kae, u na le bokooa kapa u tšoeroe ke lefu le sa phekoleheng. Lingaka, metsoalle le beng ka uena ba ka leka ho u thusa hore u lule u ikoetlisa, empa ke uena ea lokelang ho ikhanna.
-
Robala Nako e Lekaneng. Batho ba bang ba nka ho phomola e le ntho e nyane hoo ba qetang nako e telele ba sebetsa ba sa robale ebe ba qetella ba kula. Empa uena u ka ipha nako e lekaneng ea ho robala e le hore u lule u phetse hantle.
QOBA HO ITEMATSA
MOLAO-MOTHEO: “A re itlhatsoeng litšila tsohle tsa nama le tsa moea.”—2 Bakorinthe 7:1.
HO BOLELOA’NG? Re ka phela hantle haeba re sa silafatse ’mele ea rona ka lintho tse kotsi tse kang koae kaha e bakela batho mafu a mangata a qetellang ka ho ba bolaea.
U KA ETSA’NG? Itjoetse hore na u batla ho tlohela ho tsuba neng, ebe u tšoaea letsatsi leo k’halendareng. Pele letsatsi leo u le tšoaileng le fihla, lahla koae le lintho tsohle tseo u li sebelisang ha u tsuba. Hape u qobe ho ea libakeng tseo ho nang le batho ba tsubang. Bolella ba lelapa le metsoalle hore u entse qeto ea ho khaotsa ho tsuba e le hore ba ka u tšehetsa.
MELAO-MOTHEO E MENG
Haeba u batla ho ba le Bibele, u ka kopa Lipaki Tsa Jehova hore li u fe eona
LULA U SIRELETSEHILE.
“Haeba u haha ntlo e ncha, u etse lehora [lerako] bakeng sa marulelo a hao, e le hore u se ke oa beha molato oa mali ntlong ea hao hobane e mong a ka ’na a oa a le holim’a eona.”—DEUTERONOMA 22:8.
QOBA HO HALEFA.
“Ea liehang ho halefa o tletse temoho, empa ea felang pelo o phahamisa booatla.”—LIPROVERBIA 14:29.
U SE KE OA BA MEHARO.
“U se ke oa ba har’a ba noang veine haholo, har’a ba jang [lijo] ka bonyollo.”—LIPROVERBIA 23:20.
Mohlomong u ka Rata le
TSOHA!
Litsela Tsa ho Ntlafatsa Bophelo ba Hao
Mehato e mehlano eo u ka e nkang kajeno ho ntlafatsa bophelo ba hao.
