KENG E KA RE THUSANG HO MAMELLA MATHATA?
2 | Boloka Tjhelete ya Hao le Dintho Tsohle Tseo o Nang le Tsona
SEO E LENG SA BOHLOKWA
Letsatsi le letsatsi batho ba bangata ba sokola ho fumana dintho tseo ba di hlokang. Ka maswabi, mathata a etsahalang mona lefatsheng a ka etsa hore seo se be thata le ho feta. Hobaneng?
-
Ha ho ena le mathata sebakeng se itseng, theko ya dintho tse kang dijo le bodulo e a phahama.
-
Mathata a ka etsa hore batho ba lahlehelwe ke mosebetsi le hore ba fumane tjhelete e nyenyane.
-
Dikoduwa di ka etsa hore batho ba lahlehelwe ke dikgwebo, matlo le dintho tse ding tseo ba nang le tsona mme sena se ka etsa hore ba sotlehe.
Seo o Lokelang ho se Tseba
-
Haeba o sebedisa tjhelete ya hao ka bohlale, o tla kgona ho mamella mathata.
-
Hopola hore mokgolo wa hao, tjhelete eo o e bolokileng le dintho tse ding tseo o nang le tsona di ka lahlehelwa ke boleng ba tsona.
-
Ho na le dintho tseo tjhelete e ke keng ya di reka tse kang thabo le lelapa le momahaneng.
Seo o ka se Etsang Hona Jwale
Seo Bibele e se buang: “Ha re ena le dintho tsa ho iphedisa le diaparo le tshireletso, re tla di kgotsofalla.”—1 Timothea 6:8.
Ha o kgotsofalla dintho tseo o nang le tsona o a thaba. Sena se bohlokwa haholo haeba o ena le tjhelete e nyenyane.
E le hore o kgotsofale, o lokela ho ithuta ho sebedisa tjhelete e nyenyane. Haeba o leka ho reka dintho tseo o ke keng wa kgona ho di patalla, o tla ba le mathata a mangata.