Ho Bakolose 4:1-18
4 Benghadi, le tshware makgoba a lona hantle le ka toka le tseba hore le lona le na le Monghadi lehodimong.+
2 Le dule le rapela+ ebile le se ke la lebala ho rapela le ho leboha,+
3 le rona le re rapelle+ hore Modimo a re fe monyetla wa ho bolela lentswe la hae le ho phatlalatsa lekunutu le halalelang le mabapi le Kreste, leo ke leng teronkong ka lebaka la lona+
4 le hore ke tle ke le phatlalatse ka tsela e hlakileng jwalo ka ha ke tshwanetse.
5 Le be bohlale ka tsela eo le itshwarang ka yona ha le ena le batho bao e seng karolo ya phutheho mme le sebedise nako ya lona hantle.*+
6 Mantswe ao le a buang e ke e be a mosa ka mehla, a nokilweng ka letswai+ e le hore le tsebe ka moo le lokelang ho araba motho e mong le e mong ka teng.+
7 Tikikase,+ ngwaneso ya ratehang, mosebeletsi ya tshepahalang le mohlanka ya sebeletsang Morena mmoho le rona, o tla le bolella dintho tsohle ka nna.
8 Ke mo romela ho lona hore a le bolelle hore na re ntse re ya jwang le hore a le tshedise.
9 O tla le Onesimase,+ ngwaneso ya tshepahalang le ya ratehang, ya tswang ho lona. Ba tla le bolella dintho tsohle tse etsahalang mona.
10 Aristakase+ ya tshwerweng le nna o a le dumedisa, le Mareka+ motswala wa Barnabase o a le dumedisa (Mareka ke yena eo ke ileng ka le laela hore le mo amohele+ ha a ka tla ho lona),
11 le Jesu ya bitswang Justase, e leng e mong wa ba bolotseng. Bana ke bona feela basebetsimmoho le nna bakeng sa Mmuso wa Modimo ebile ba ntshedisa haholo.*
12 Epafrase,+ mohlanka wa Kreste Jesu ya tswang ho lona o a le dumedisa. O dula a le rapella ka matla, e le hore le ka ema le tiile le hore le kgodisehe ka dintho tsohle tseo Modimo a tlo di etsa.
13 Ke paki ya hore o sebetsa ka thata molemong wa lona le molemong wa ba leng Laodisia le ba leng Hierapolise.
14 Luka,+ ngaka e ratwang le Demase,+ ba a le dumedisa.
15 Ntumedisetseng bana ba bo rona ba leng Laodisia le kgaitsedi ya rona Nimfa le phutheho e kopanelang ha hae.+
16 Ha le se le badile lengolo lena, le le fetisetse phuthehong ya Balaodisia hore le bona ba le bale+ mme le lona le bale le tswang Laodisia.
17 Hape le bolelle Arkipase+ hore a sebetse ka thata ho phetha mosebetsi oo a o filweng ke Morena.
18 Nna Pauluse, ke le ngolla ditumediso ka letsoho la ka.+ Le dule le hopola hore ke teronkong.+ Mosa wa Modimo o ke o be le lona.
Dintlha tse qetellong ya sehloho
^ Ka Segerike: “le ithekele nako e loketseng.”
^ Kapa: “ba a mmatlafatsa.”
