Sehlopha se Busang ke sehlopha sa Bakreste ba seng bakae ba hodileng tsebong ba tataisang Dipaki Tsa Jehova lefatsheng lohle. Mosebetsi wa bona o dikarolo di pedi:

•   Sehlopha sena se re lokisetsa dithuto tse thehilweng Bibeleng di sebedisa dingolwa, diboka le dikolo tsa Dipaki Tsa Jehova.​—Luka 12:42.

•   Se hlokomela mosebetsi wa lefatshe lohle o etswang ke Dipaki Tsa Jehova ka ho tsamaisa mosebetsi wa boboledi, ho hlokomela tsela eo menehelo e sebediswang ka yona.

 Sehlopha se Busang se latela mohlala wa “baapostola le banna ba baholo Jerusalema” ba lekgolong la pele la dilemo, ba ileng ba etsa diqeto tse nepahetseng bakeng sa phutheho yohle ya Bakreste. (Liketso 15:2) Jwalo ka banna bao ba tshepahalang, ditho tsa Sehlopha se Busang ha se baetapele ba mokgatlo wa rona. Ba tataiswa ke Bibele mme ba a dumela hore Jehova Modimo o kgethile Jesu Kreste hore e be yena Hlooho ya phutheho.​—1 Bakorinthe 11:3; Baefese 5:​23.

 Ho tloha ka January 2018, ditho tsa Sehlopha se Busang ke Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson le David Splane. Ba sebeletsa ntlokgolo ya rona e Brooklyn, New York, U.S.A.

 Sehlopha se Busang se thehile dikomiti tse tsheletseng hore di tsamaise dikarolo tse fapaneng tsa mosebetsi wa rona mme setho ka seng se sebetsa komiting e le nngwe kapa tse mmalwa.

•   Komiti ya Bahokahanyi: Komiti ena e sebetsana le dinyewe, dikoduwa, maemo ao badumedimmoho le rona ba qoswang ka lebaka la seo ba se dumelang le ditaba tse ding tse potlakileng tse amang Dipaki Tsa Jehova lefatsheng lohle.

•   Komiti ya Basebetsi: E ikarabella ka ho hlokomela ditho tsa lelapa la Bethele.

•   Komiti ya Kgatiso: E ikarabella ka ho hatisa le ho romela dingolwa tsa Bibele lefatsheng lohle, ho haha diholo tsa Mmuso le tsa dikopano, diofisi tsa phetolelo le mehaho ya makala.

•   Komiti ya Tshebeletso: E hlokomela mosebetsi wa ho bolela “ditaba . . . tse molemo tsa mmuso.”​—Matheu 24:14.

•   Komiti ya Thuto: E hlophisa mananeo a thupelo ya moya e sebedisa dikolo tse fapafapaneng, diboka le mananeo a dintho tse mamelwang le tse shebellwang.

•   Komiti ya Bongodi: E hlophisa boitsebiso bo dikgatisong tsa rona, websaeteng ha mmoho le ho hlokomela mosebetsi wa phetolelo.

 Ho ekelletsa moo, ditho tsa Sehlopha se Busang di kopana beke le beke e le ho hlahloba ditlhoko tsa mokgatlo. Dibokeng tsena ditho di hlahloba Mangolo, di dumella moya wa Modimo hore o di tataise e le hore di be ntsweleng ha di etsa diqeto.​—Liketso 15:25.

 Ke Bakreste ba tshepahalang ba thusang dikomiti tsa Sehlopha se Busang. (1 Bakorinthe 4:2) Ba na le tsebo le boiphihlelo ba mosebetsi o etswang komiting eo ba abetsweng ho yona, mme ba ba teng dibokeng tsa beke le beke tsa dikomiti tseo. Le hoja ba sa nke karolo ha ho etswa diqeto, bathusi bana ba fana ka keletso ya bohlokwa le boitsebiso bo eketsehileng, mme ba sebedisa diqeto tse entsweng komiting le ho hlahloba kgafetsa diqeto ha mmoho le tswelopele e entsweng. Sehlopha se Busang se boetse se abela bathusi bana ho fana ka dipuo diketsahalong tse kang diboka tsa selemo le selemo kapa tsa Kabo ya Mangolo ya Gileade.