Jehova usinika umyalo lotsi: “Ungabi ngulongaketsembeki.” (Malakhi 2:16) Loku kubaluleke kakhulu emshadweni wakho ngobe ngaphandle kwekwetsembeka ngeke nitsembane. Kwetsembana kubalulekile kute lutsandvo lwenu lukhule.

Lamuhla, kwetsembeka emshadweni kusengotini. Kute uvikele umshado wakho kufanele utimisele kwenta nati tintfo letimbili:

LOKO LOKUSHIWO LIBHAYIBHELI: ‘Ciniseka ngetintfo letibaluleke kakhulu.’ (Filiphi 1:10) Umshado wakho ungulenye yetintfo letibaluleke kakhulu ekuphileni kwakho. Kufanele ute kucala kuwe.

Jehova ufuna kutsi unake umuntfu loshade naye futsi ‘nitijabulise ngekuphila’ nikanye kanye. (Umshumayeli 9:9) Ukwenta kucace kutsi akukafaneli ungamnaki umuntfu loshade naye, kodvwa kufanele nifune tindlela leningajabulisana ngato nobabili. (1 Khorinte 10:24) Mente ative atsandvwa futsi abalulekile.

LONGAKWENTA:

• Ciniseka kutsi nicitsa sikhatsi lesinyenti ndzawonye, futsi unikete umuntfu loshade naye sikhatsi sakho

• Ungaticabangeli “wena,” kodvwa cabangela “nine” nobabili

LOKO LOKUSHIWO LIBHAYIBHELI: “Wonkhe umuntfu lochubeka abuka lomsikati ate amkhanuke sewuvele uphingile naye enhlitiyweni.” (Matewu 5:28) Nangabe umuntfu achubeka acabanga ngetintfo letingcolile, ngandlela tsite usuke angetsembeki kulashade naye.

Jehova utsi kufanele ‘ulondvolote inhlitiyo yakho.’ (Taga 4:23; Jeremiya 17:9) Kute wente loku, kufanele ugadze emehlo akho. (Matewu 5:29, 30) Lingisa sibonelo saJobe, lowenta sivumelwane nemehlo akhe sekungambuki ngenkhanuko lomunye umuntfu lomsikati. (Jobe 31:1) Timisele kungatibuki titfombe letikhombisa kungcola. Tentele sincumo sekungatsandzani nalomunye umuntfu ngaphandle kwaloshade naye.

LONGAKWENTA:

• Kwente kucace kulabanye kutsi wetsembekile kuloshade naye

• Cabanga ngendlela lativa ngayo, futsi ubucedze ngekushesha bonkhe buhlobo lobutawenta umuntfu loshade naye angajabuli