Babangelwa Yini BoFakazi BaJehova Kutsi Bangayibiti Indzawo Labakhontela Kuyo Ngekutsi Lisontfo?
EBhayibhelini, ligama lesiGriki lelihle lihunyushwa ngekutsi “lisontfo,” lisho licembu lemakholwa hhayi sakhiwo lakhontela kuso.
Phawula nasi sibonelo: Ngalesikhatsi umphostoli Pawula abhalele emaKhristu aseRoma, watfumelela bo-Akhwila naPhrisila imikhontiso, wase uyengeta utsi: “Bingelelani lisontfo lelihlangana emtini wabo.” (Roma 16:5, Contemporary English Version, letfolakala ngesiNgisi) Pawula bekangakahlosi kutfumela tilokotfo takhe kulesakhiwo. Kunaloko bekatitfumelela bantfu—libandla lebelihlangana kulelo khaya. a
Kunekutsi sibite indzawo lesikhontela kuyo ngekutsi lisontfo, sisebentisa ligama lelitsi “LiHholwa LeMbuso.”
Nibangelwa Yini Kutsi Niyibite Ngekutsi “LiHholwa LeMbuso LaboFakazi BaJehova”?
Leligama likahle ngetizatfu letinyenti:
Lesakhiwo lihholwa, nome indzawo lokuhlanganwa kuyo.
Sihlangana kuze sikhonte Jehova, longuNkulunkulu lokukhulunywa ngaye eBhayibhelini futsi setfule bufakazi ngaye.—Tihlabelelo 83:18; Isaya 43:12.
Siphindze sihlangane kuze sifundze ngeMbuso waNkulunkulu, Jesu lakhuluma ngawo.—Matewu 6:9, 10; 24:14; Lukha 4:43.
Wemukelekile kutsi uvakashele LiHholwa LeMbuso lelidvutane nawe uphindze utibonele indlela boFakazi baJehova labakhonta ngayo.
a Inkhulumo lefanako iyatfolakala naku-1 Khorinte 16:19; Kholose 4:15; naku-Filemoni 2.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Emabandla ABoFakazi BaJehova Ahlelwe Njani?
Titfolele kutsi sisitfola njani sicondziso nemiyalo ngalelilungiselelo.
MAYELANA NATSI
Yani emhlanganweni
Fundza kabanti ngemihlangano yetfu. Tfola indzawo lokuhlanganwa kuyo ledvutane nawe.