• „A gersi leki mi masra ben abi seks ibri tron baka nanga tra uma.”

• „Mi ben e firi syen, mi ben denki taki mi no moi èn taki mi no warti noti.”

• „Mi no ben man taki nanga trawan fu a sani dati. Mi no ben abi nowan sma fu trowstu mi.”

• „Mi ben denki taki Yehovah no ben e broko en ede nanga mi.”

Den wortu disi e sori omeni wan frow e pina te en masra e luku porno. Efu a masra luku seksfelem noso prenki kibrikibri, kande wan tu mun noso furu yari langa, dan a frow kan firi leki a no man frutrow en masra moro. Wan wefi ben taki: „Mi ben aksi misrefi ’Suma na a man disi? A e kibri tra sani gi mi?’”

Na artikel disi sreka gi wefi di abi wan masra di e luku porno. a Na artikel o taki fu Bijbel gronprakseri di kan trowstu en èn di o sori en taki Yehovah lobi en èn taki a wani yepi en. A o yepi en tu fu firi korostu èn fu tan abi wan bun banti nanga Yehovah. b

Yu no man taigi yu masra ala san a musu du, ma yu kan du wan tu sani gi yusrefi fu sorgu taki yu no broko yu ede tumsi moro. Poti prakseri na den penti di e kon now.

No taki dat na yu fowtu. Wan frow kan denki taki na fu di a no du wan sani bun, meki en masra e luku porno. Alice c ben denki taki a no bun nofo noso taki a no moi nofo gi en masra. A ben aksi ensrefi: „Fu san ede mi masra lobi luku tra frow na presi fu mi?” Son wefi e feni taki a no bun taki den e reageer so, fu di den e denki taki te den e reageer so dan a situwâsi e kon moro ogri. Danielle e taki: „A sani di mi masra du ben broko mi ati èn mi ben mandi srefisrefi. Ma dan mi bigin denki taki na a mandi fu mi ben e pori mi trowlibi.”

Efu yu e firi so tu, dan yu musu sabi taki Yehovah no o aksi yu frantwortu fu den sani  di yu masra e du. Yakobus 1:14 e taki: „Ibri sma e kisi tesi fu di en eigi lostu e hari en èn e kori en” (Rom. 14:12; Fil. 2:12). Na presi fu taki dati na yu fowtu, Yehovah e warderi en taki yu e tai hori na En.​—2 Kron. 16:9.

Wan frow kan denki taki en masra e luku porno fu di a no bun nofo noso fu di a no moi nofo gi en masra. Ma dati no tru. Sabiman di e ondrosuku a tori disi e sori taki porno e wiki seks lostu na ini wan sma di nowan uma kan plisi.

No broko yu ede tumsi. Catherine ben taki dati ibri yuru fu a dei a ben e denki fa en masra e luku porno. Frances ben taki: „Mi ati de na dyompo te mi no sabi pe mi masra de. Senwe e naki mi heri dei.” Tra wefi e fruteri fa den e syen te den de nanga Kresten brada nanga sisa di sabi kande sortu problema den masra abi. Trawan baka e taki dati den e firi leki den de den wawan, fu di den e denki taki nowan sma e frustan a situwâsi fu den.

Na wan normaal sani te yu e firi so. Ma efu ala yuru yu e tan prakseri den sani disi, dan moro yu ati o de na dyompo. Na presi fu dati, pruberi fu poti prakseri na yu matifasi nanga Yehovah. Dati o yepi fu kon moro tranga so taki yu man horidoro.​—Ps. 62:2; Ef. 6:10.

Yu kan feni yepi na ini Bijbel tori fu uma di ben de nanga bigi sari. Leisi èn denki dipi fu den. Den ben kisi trowstu di den begi Yehovah. A no ben puru den problema gi den ala ten, ma a meki den ati kon sidon. Fu eksempre, a situwâsi fu Hana meki taki a „ben e sari srefisrefi”. Ma baka di a „begi Yehovah wan heri pisi ten”, a bigin firi korostu aladi a no ben sabi ete fa sani ben o waka moro fara.​—1 Sam. 1:10, 12, 18; 2 Kor. 1:3, 4.

Suku yepi na den gemeente owruman. Den kan de „leki wan kibripresi gi tranga winti èn gi sibibusi” (Yes. 32:2). Den kan yepi yu srefi fu feni wan sisa nanga suma yu kan taki èn di kan trowstu yu.​—Odo 17:17.

Yu kan yepi yu masra fu tapu nanga a gwenti fu luku porno? Kande. Bijbel e sori taki efu yu wani lusu wan problema noso efu yu wani wini wan tranga feanti, dan „tu sma moro bun leki wán” (Preik. 4:9-12). Ondrosukuman kon si taki te a masra nanga en wefi  e wroko makandra, dan nofo tron a masra kan tapu nanga a takru gwenti fu luku porno èn a wefi kan leri fu frutrow en baka.

Ma yu patna musu sori taki a de klariklari fu wroko tranga èn taki a wani tapu trutru nanga a gwenti fu luku porno. A begi Yehovah fu gi en krakti? A suku yepi na den owruman? (2 Kor. 4:7; Yak. 5:14, 15) A seti sani so taki a no man luku porno moro? Fu eksempre, a e sorgu taki a no de tumsi furu tapu en computer noso en telefon? A e tan fara fu situwâsi di kan de wan tesi gi en? (Odo 27:12) A de klariklari fu teki a yepi fu yu èn fu no kibri noti gi yu? Efu dati de so, dan a kan taki yu o man yepi en.

Fa? Luku wan eksempre. Felicia trow nanga Ethan di ben kisi a gwenti fu luku porno na ini en yongu yari. Felicia e sorgu taki a makelek gi Ethan fu taki nanga en te a e kisi a firi fu luku porno. Ethan e fruteri: „Mi e taki eerlijk nanga mi frow, mi no e kibri noti gi en. Na wan lobi-ati fasi a e yepi mi fu tan fara fu sani di kan tesi mi, èn ten na ten a e aksi fa a e go nanga mi. A e yepi mi tu fu no go tumsi furu tapu Internet.” A no de fu taki dati a e hati Felicia taki Ethan lobi porno. „Ma” soleki fa a e taki, „na atibron nanga pen fu mi no e yepi en fu tan wai pasi gi a takru gwenti disi. Baka di wi taki fu den sani di e moro en, dan en de klariklari fu yepi safu a pen fu mi.”

Den sortu takimakandra disi no o yepi soso a masra fu tapu nanga porno, ma a o yepi en frow tu fu frutrow en baka. Bika te wan masra de klariklari fu taki krin fu den swakifasi fu en èn fu san a e du ala dei èn pe a e go, dan a moro makelek gi en frow fu frutrow en fu di a no e kibri noti gi en moro.

Yu denki taki yu man yepi yu masra na a srefi fasi disi? Dan kande yu kan leisi èn taki fu na artikel disi nanga makandra. Yu masra musu abi a marki fu tapu nanga porno èn fu gi yu reide fu frutrow en. Na presi fu hori yu na ati, a musu meki muiti fu frustan fa a problema e meki yu firi. Yu musu abi a marki fu horibaka gi a muiti di a e meki fu tapu nanga a takru gwenti, èn yu musu gi en na okasi fu du sani di o meki yu frutrow en baka. Un ala tu musu kon sabi san e meki taki sma wani luku porno èn fa wan sma kan tapu nanga dati. d

Efu yu frede taki unu o mandi tapu makandra te unu o sidon fu taki, dan prakseri fu aksi wan owruman di yu sabi bun fu sidon nanga unu fu wan pisi ten. Yu musu hori  na prakseri taki srefi te yu trowpatna tapu nanga a gwenti fu luku porno, toku a kan teki wan heri pisi ten fosi yu kan frutrow en baka. Ma no gi abra. Luku den pikin sani di e sori taki sani e go bun baka na ini un trowlibi. Tan howpu taki baka wan pisi ten, efu unu ala tu abi pasensi, a trowlibi o kon tranga baka te fu kaba.​—Preik. 7:8; 1 Kor. 13:4.

Efu baka wan heri pisi ten yu masra fadon go baka na ini a gwenti, dan disi wani taki dati a no abi berow noso taki yepi no de moro gi en? Dati no abi fu de so. Efu a ben abi a takru gwenti wan langa pisi ten, dan a kan taki a o abi fu feti teige a gwenti disi en heri libi langa. Wan sma kan fadon go baka na ini a gwenti srefi baka di a tapu nanga dati furu yari kaba. Fu no meki dati pasa, dan a o abi fu seti moro sani fu kibri ensrefi. Kande a musu tan hori ensrefi na den sani di a ben seti, srefi baka di a tapu nanga a gwenti (Odo 28:14; Mat. 5:29; 1 Kor. 10:12). A musu kon abi wan nyun fasi fu „denki” èn a musu leri fu „tegu gi ogri” sani leki porno nanga ala tra sani di no krin, soleki fu prei nanga en syenpresi fu plisi en seks lostu (Ef. 4:23; Ps. 97:10; Rom. 12:9). A de klariklari fu meki a muiti dati? Efu a wani meki a muiti, dan howpu de gi en fu tapu krinkrin nanga a takru gwenti te fu kaba. e

Ma san yu musu du efu yu patna no wani feti a problema? A no de fu taki dati a sani disi kan meki yu lasi-ati noso mandi, èn a kan gersi leki a drai en baka gi yu. Libi a pisi tori disi na ini Yehovah anu so taki yu no broko yu ede tumsi (1 Petr. 5:7). Kon moro krosibei na Yehovah. Studeri, begi, èn denki dipi fu san yu leisi. Efu yu du dati, dan yu kan de seiker taki En o kon moro krosibei na yu tu. Soleki fa skrifi na Yesaya 57:15, a e tan nanga den wan di „kisi kwinsi èn di abi sakafasi” èn a e yepi den fu firi koloku baka. Pruberi fu de a moro bun Kresten di yu man de. Suku yepi na den owruman. Èn tan howpu taki oiti wan dei yu masra o kenki nanga en heri ati.​—Rom. 2:4; 2 Petr. 3:9.