Na ini a ten disi grontapu lai nanga porno. a A de fu feni na ini den reklame, modo, felem, poku, buku, telefisi, video game, cellulair, tablet computer, èn tapu Internet. Furu sma na ini a ten disi feni taki a de wan aladei sani fu luku porno. Na ini a ten disi, moro furu sma e luku porno leki na iniwan tra ten di pasa.​—Luku a faki di nen  „San wi kan taki fu porno?”

Den porno fu a ten disi e kenki tu. Professor Gail Dines skrifi: „Na ini a ten disi den porno di sma e luku, takru so te, taki den hebi porno fu fosi kon tron wan aladei sani.”

San yu denki fu porno? Yu denki taki porno na wan ogri sani noso na wan bun sani? Yesus taki: „Ibri bun bon e meki bun froktu, ma ibri siki bon e meki froktu di no bun” (Mateyus 7:17). San na a bakapisi te sma e luku porno? Fu kon sabi dati, dan meki wi luku wan tu prenspari aksi di abi fu du nanga porno.

SAN SABIMAN E TAKI? Son sabiman nanga datra e taki dati porno kan tron wan takru gwenti, neleki te wan sma abi a gwenti fu smoko côca.

Brian, b di ben abi a gwenti fu luku porno tapu Internet e taki: „Noti no ben man tapu mi. A ben gersi leki mi ben lasi mi frustan. Mi ben beifi èn mi ede ben bigin hati mi. Mi ben meki muiti fu tapu, ma baka omeni yari mi ben abi a srefi gwenti ete.”

Furu tron sma di e luku porno e kibri san den e du. Den e du sani kibrikibri èn den e lei. Dati meki a no e fruwondru wi taki furu fu den abi a firi taki den de den wawan, den e syen, den e broko den ede, den lasi-ati èn den ati e bron. Son leisi den wani kiri densrefi tu. Serge di ben download porno tapu en telefon ibri dei, taki: „Mi ben prakseri misrefi nomo èn mi no ben sabi san fu du. Mi ben firi leki mi no warti noti, mi konsensi ben fon mi, mi ben firi leki sma no e broko den ede nanga mi èn a ben hebi srefisrefi gi mi. Mi ben firi syen èn mi ben frede fu suku yepi.”

Awansi wi si porno wan leisi nomo noso sondro fu wi wani, toku a kan abi takru bakapisi. Dr.  Judith Reisman, wan sma di ben ondrosuku porno, ben taigi wan komte fu wan Asamblei na ini Amerkankondre: „Den porno prenki di wan sma e si e tan na ini en prakseri èn a e tan memre den ibri tron baka, srefi na momenti te a sma no wani dati. A muilek tu fu puru den prakseri dati.” Susan di ben abi 19 yari ben luku porno tapu Internet. A e taki: „Den prenki e tan fasi na ini mi frustan. Wanwan leisi mi e prakseri den sondro fu mi wani. A gersi leki noiti mi o man puru den na ini mi frustan.”

SAN WI KAN TAKI TRUTRU FU PORNO? Porno e meki wan sma tron wan srafu èn a e pori sma libi.​—2 Petrus 2:19.

SAN SABIMAN E TAKI? „Porno e pori na osofamiri libi.”​—A buku The Porn Trap, di Wendy nanga Larry Maltz skrifi.

Porno e pori trowlibi nanga osofamiri fu di

• Trowpatna no e frutrow makandra moro, èn den no e sori lobi gi makandra moro.​—Odo 2:12-17.

• A e meki den denki densrefi nomo, den no de bun nanga makandra moro èn den no e breiti moro fu de nanga makandra.​—Efeisesma 5:28, 29.

• A e meki den prakseri soso fu seks èn a e meki den abi tranga lostu gi seks na wan fasi di no fiti.​—2 Petrus 2:14.

• A e meki patna dwengi makandra fu abi seks na wan fasi di no fiti.​—Efeisesma 5:3, 4.

• A e meki patna kisi lobi firi gi wan trawan noso waka gi en.​—Mateyus 5:28.

Bijbel e taigi trowpatna taki den no musu „du  ogri” nanga makandra (Maleaki 2:16). Te wan sma e waka gi en patna, dan dati kan pori a trowlibi èn a e meki den prati èn a trow kan broko. Te dati pasa, dan dati no e tyari bun bakapisi gi den pikin.

Porno kan abi krakti wantewante tapu pikin na ini na osofamiri. Brian di wi ben kari kaba, e taki: „Di mi ben abi tin yari, mi feni porno buku fu mi papa di mi ben e prei. Mi bigin luku den kibrikibri, aladi mi no ben frustan fu san ede den prenki ben hari mi. A sani dati meki mi kon abi wan takru gwenti teleki mi kon bigi.” Ondrosuku e sori taki bigisma di gwenti luku porno di den ben yongu ete, abi a gwenti fu abi seks nanga difrenti sma, den abi seks na wan ogri-ati fasi èn den no man basi den firi.

SAN WI KAN TAKI TRUTRU FU PORNO? Porno e pori a bun osofamiri libi èn a e meki sma abi furu sari.​—Odo 6:27.

GADO WORTU E TAKI: „Sobun, kiri den difrenti pisi fu un skin di kan meki taki unu kisi fu du nanga hurudu, wan libi di no krin, sekslostu, takru lostu èn nanga bigi-ai di de a srefi leki na anbegi fu kruktugado.”​—Kolosesma 3:5.

Fu taki en leti, Yehovah c Gado no lobi porno srefisrefi. Disi no wani taki dati a e syen fu taki fu seks. Gado meki wi nanga a firi fu wani abi seks na ini a trowlibi èn taki trowpatna kan plisi makandra, den kan lobi makandra moro èn den kan abi na okasi fu meki pikin.​—Yakobus 1:17.

Ma fu san ede wi kan taki dati Yehovah no lobi porno srefisrefi? Luku fu san ede.

• A sabi taki porno kan pori sma libi.​—Efeisesma 4:17-19.

• A lobi wi èn a wani kibri wi gi ogri.​—Yesaya 48:17, 18.

• Yehovah wani kibri a trowlibi èn a wani kibri den osofamiri.​—Mateyus 19:4-6.

• A wani taki wi e tyari wisrefi na wan krin fasi èn taki wi e lespeki a reti di trawan abi.​—1 Tesalonikasma 4:3-6.

• A wani taki wi e lespeki a grani di wi abi fu man meki pikin èn fu abi seks na wan fasi di fiti.​—Hebrewsma 13:4.

• Yehovah sabi taki porno e meki sma e denki densrefi nomo, den no abi wan yoisti denki fu seks, ma den e si seks leki fa Satan e si en.​—Genesis 6:2; Yudas 6, 7.

SAN WI KAN TAKI TRUTRU FU PORNO? Porno e pori a matifasi di wan sma abi nanga Gado.​—Romesma 1:24.

Ma Yehovah abi furu sari-ati nanga sma di wani tapu fu luku porno. Bijbel e taki: „Yehovah na wan Gado di abi sari-ati nanga switifasi. En ati no e bron esi èn a abi bun-ati pasa marki. Bika Gado sabi heri bun fa wi meki. A e hori na prakseri taki na fu doti wi meki” (Psalm 103:8, 14). A e gi sma di e arki en wan kari fu kon na en so taki „a kan abi sari-ati nanga wi èn a kan sori wi bun-ati fu yepi wi na a yoisti ten”.​—Hebrewsma 4:16; luku a faki di nen  „Tapu nanga a gwenti fu luku porno”.

Furu sma e suku a yepi fu Gado. A man yepi wi? Luku san Bijbel e taki fu son sma di tapu nanga takru gwenti: „Gado wasi unu kon krin, a meki unu kon santa èn a e si unu leki reti-ati sma na ini a nen fu wi Masra Yesus Krestes èn nanga a yeye fu Gado” (1 Korentesma 6:11). Neleki na apostel Paulus den sma disi kan taki: „Mi man du ala sani nanga yepi fu a sma di e gi mi krakti.”​—Filipisma 4:13.

Susan di ben tapu nanga a gwenti fu luku porno, e taki: „Yehovah na a wan-enkri sma di kan yepi yu fu tapu nanga porno. Efu yu aksi en fu yepi yu èn fu sori yu san yu musu du, dan yu kan tron wan mati fu en baka. A o de nanga yu ala ten.”