Mi mama ben abi 17 yari di mi gebore na ini 1960. Mi papa gowe libi wi fosi mi gebore. Mi nanga mi mama ben e libi nanga mi granpapa nanga granmama na Burg, wan pikin foto na ini Doisri Demokrasia Republiek noso Owstu Doisrikondre. Furu sma drape no ben e bribi taki wan Gado de èn na so a ben de tu nanga mi famiri. Wi no ben e prakseri wan Gado srefi.

Di mi ben e gro kon bigi, mi ben lobi de nanga mi granpapa. A ben e meki mi du ala sortu sani. Son leisi a ben e seni mi go na ini den bon fu koti den taki. Mi ben lobi du den sortu sani dati. A libi ben switi gi mi èn mi ben de koloku.

Di mi ben abi seibi yari, wan takru sani miti mi. Na a ten dati mi ben e sidon na ini tweede klas. Mi ben e go na oso wan dei, dan mi kren wan fu den mast di e hori bigi stroomkabel. Di mi kren aiti meter go na loktu, bun hebi stroom naki mi, dan mi fadon flaw. Di mi wiki na ini ati-oso, mi no ben man firi mi anu. Ala mi tu anu ben bron. A mankeri ben hebi so te, taki den ben musu koti mi anu puru. Efu den no ben du dati, mi brudu ben o kisi infectie èn mi ben kan dede. Yu kan frustan taki mi mama, mi granpapa nanga mi granmama ben sari srefisrefi. Ma fu di mi ben pikin, meki mi no ben frustan ete fa a ben o de fu libi sondro anu.

Di mi komoto na ati-oso, mi go baka na skoro. Den pikin ben e dreigi mi, den ben pusu mi èn den ben trowe sani na mi tapu fu di mi no ben man du noti. Den sani di den taigi mi ben hati mi. Te fu kaba mi famiri seni mi go na Birkenwerder Skoro. Dati na wan spesrutu skoro pe pikin di malengri ben e tan. Fu di a skoro ben fara, meki mi mama, mi granpapa nanga mi granmama no ben man kon luku mi. Mi ben e si den soso te mi ben abi fakansi. Tin yari langa mi no kweki nanga den.

Mi leri fu du furu sani nanga mi futu. Prakseri fa a de fu hori wan forku noso wan spun nanga yu futu te yu e nyan. Toku mi leri fu du a sani dati. Mi leri tu fu bosro mi tifi èn fu kan mi wiwiri nanga mi futu. Te mi ben e taki nanga sma mi ben e meki  sani nanga mi futu neleki fa yu e du dati nanga yu anu. Iya, mi futu ben tron mi anu.

Di mi kon moro bigi, mi ben lobi leisi buku fu sani di no e pasa trutru. Son leisi mi ben e prakseri taki efu mi ben abi robot-anu, mi ben o man du ala sani. Di mi ben abi 14 yari, mi bigin smoko. A ben meki mi firi bun èn mi ben firi taki mi ben de leki ala tra sma. A gersi leki mi ben wani taigi sma: ’Iya, mi man du dati tu. Smokoman na bigisma, awinsi yu no abi anu.’

Mi ben e du ala sortu sani fu yepi tra sma na ini a foto pe mi ben e libi. Mi tron wan memre fu wan socialist organisâsi di lanti ben seti gi yonguwan (Vrije Duitse Jeugd). Mi ben de a sekretarsi èn den tra sma fu a grupu ben si en leki wan hei posisi. Mi ben de na ini wan singi grupu tu, mi ben go na les fu meki puwema èn mi ben e du sport nanga tra malengri sma. Baka di mi leri du wan wroko, mi bigin wroko gi wan bedrijf na ini a foto fu wi. Di mi ben kon moro bigi, mi ben e weri den kunst-anu fu mi moro furu, fu di mi ben wani de leki ala tra sma.

Wan dei di mi ben e wakti a loko fu go na wroko, wan man waka kon miti mi. A aksi mi efu mi sabi taki Gado kan gi mi den tu anu fu mi baka. Mi skreki di a aksi mi a sani dati. A no de fu taki dati mi ben wani den anu fu mi baka, ma noiti mi ben denki taki so wan sani kan. Èn mi no ben e bribi srefisrefi taki wan Gado de. Sensi a ten dati, mi bigin koti pasi gi a man.

Wan pisi ten baka dati, wan sma di mi ben e wroko nanga en kari mi kon na en oso. Di wi ben sidon e dringi kofi, en papa nanga mama bigin taki fu Gado. Den ben e kari en Yehovah. Dati ben de a fosi leisi di mi yere taki Gado abi wan nen (Psalm 83:18). Ma na ini misrefi mi ben e denki: ’Wan Gado noiti no kan de, awinsi sortu nen a abi. Mi o sori den sma disi taki Gado no de.’ Fu di mi ben de so seiker fu misrefi, meki mi agri fu taki nanga den fu Bijbel. Ma na ini a heri takimakandra mi no ben man sori den taki wan Gado no de.

Di wi ondrosuku Bijbel profeititori, mi bigin kon si taki wan Gado musu fu de. Furu fu den tori disi kon tru aladi den ben skrifi hondrohondro yari na fesi. Sonwan fu den ben skrifi dusundusun yari na fesi srefi. Wan leisi wi taki fu Mateyus kapitel 24, Lukas kapitel 21, nanga 2 Timoteyus kapitel 3, dan wi si taki den sani di skrifi na ini den tekst disi, na soifri san e pasa now na grontapu. Neleki fa wan datra kan sabi sortu siki wan sma abi te a yere san e du a sma, na so den sani di skrifi na ini den profeititori disi yepi mi fu kon si taki wi e libi na ini a ten di Bijbel e kari „den lasti dei”. * Mi no ben man bribi. Den profeititori dati ben e kon tru leti na mi fesi.

Mi ben de seiker taki san mi e leri na tru tori. Mi bigin begi Yehovah Gado èn mi tapu nanga smoko, aladi mi ben de wan smokoman moro leki tin yari.  Baka di mi studeri Bijbel wán yari, mi dopu tapu 27 april 1986. Mi dopu kibrikibri na ini wan badkuip, fu di na a ten dati lanti ben tapu a wroko fu den Kotoigi na ini Owstu Doisrikondre.

Fu di lanti ben tapu a wroko, meki wi ben e kon makandra ini pikin grupu na ini oso fu brada nanga sisa èn mi no ben sabi furu Kotoigi. Aladi mi no ben fruwakti en, lanti gi mi primisi fu go na West Doisrikondre pe a wroko fu den Kotoigi no ben tapu. Fosi tron ini mi libi mi ben man go na wan kongres fu Yehovah Kotoigi pe mi si dusundusun brada nanga sisa. Dati ben de wan moi sani di mi ondrofeni.

Baka di a Skotu fu Berlijn broko, den Kotoigi ben kisi primisi baka fu du den wroko. Now wi ben man anbegi Yehovah Gado fri. Mi ben wani du moro na ini a preikiwroko. Ma mi ben e frede fu taki nanga sma di mi no sabi. Fu di mi no abi anu, èn fu di mi ben tan wan heri pisi ten nanga malengrisma, meki mi ben e firi leki mi no de noti. Ma na ini 1992, mi pruberi fu preiki 60 yuru wán mun. Mi ben firi koloku fu di mi ben man du en. Dati meki mi bosroiti fu du dati ibri mun èn mi tan du en sowan dri yari langa.

Mi no e frigiti den wortu disi di skrifi na ini Bijbel: „Suma swaki èn mi no swaki?” (2 Korentesma 11:29) Mi malengri, ma mi frustan e wroko bun èn mi man taki. Dati meki mi e du muiti fu yepi trawan. Fu di mi no abi anu, meki mi man frustan fa wan sma di malengri e firi. Mi sabi san a wani taki te yu wani du wan sani ma yu no man du en. Mi e pruberi fu trowstu sma di e firi so. Mi e firi koloku te mi e yepi sma na a fasi disi.

Mi musu taki krin taki son leisi mi e firi brokosaka pikinso. Mi wani abi anu neleki ala tra sma. Mi man du furu sani misrefi, ma mi musu meki furu muiti èn den e teki furu fu mi ten nanga mi krakti. Efu mi ben abi anu a no ben o de so. Dati meki ibri dei mi e taki: „Mi man du ala sani nanga yepi fu a sma di e gi mi krakti” (Filipisma 4:13). Ibri dei Yehovah e gi mi a krakti fu du den sani di mi musu du. Noiti a pasa wan dei taki Yehovah no yepi mi. Dati meki noiti mi o tapu fu dini en.

Yehovah blesi mi. A gi mi wan osofamiri. Disi na wan sani di mi ben misi di mi ben yongu. Mi abi wan bun wefi di nen Elke. A lobi mi èn a e frustan fa mi e firi. Boiti dati, milyunmilyun Kotoigi fu Yehovah na heri grontapu, tron mi brada nanga sisa.

Te mi e prakseri a paradijs di Gado pramisi wi, dan dati e trowstu mi tu. Gado o meki „ala sani kon nyun”. Sobun, mi o kisi mi anu baka (Openbaring 21:5). Mi e frustan a sani disi di Gado pramisi moro bun te mi e prakseri san Yesus du di a ben de na grontapu. Wan leisi a ben meki wan man di anu ben malengri kon betre èn a ben dresi a yesi fu wan man di ben koti puru (Mateyus 12:13; Lukas 22:50, 51). Den pramisi fu Yehovah nanga den wondru di Yesus du, meki taki mi de seiker taki wan dei mi o abi mi anu baka, neleki ala tra sma.

Ma a moro bigi blesi di mi kisi, na taki mi leri sabi Yehovah Gado. A tron mi papa nanga mi mati. Na en e trowstu mi èn e gi mi krakti. Mi e firi leki Kownu David di ben skrifi: „Na Yehovah e gi mi krakti. . . . Mi ati e firi prisiri, fu di a yepi mi” (Psalm 28:7). Mi heri libi langa, mi o tan prakseri den moi sani di mi leri fu Bijbel. Mi grabu den hori steifi awinsi mi no abi anu.