Yu denki taki yu feni wan sma di kan de wan bun trowpatna gi yu? Ma fa yu kan sabi efu a sma disi na a yoistiwan?

 A prenspari fu no luku nomo fa a de na dorosei. Wi sabi taki srefi a moro moi meisje kan lei noso fufuru. Wi sabi tu taki a moro pôpi boi kan du wan lo sani di no bun. Yu abi wan sma fanowdu di o meki yu firi bun, wan sma di e fiti yu, èn wan sma di wani du den srefi sani leki yu na ini a libi.​—Genesis 2:18; Mateyus 19:​4-6.

 Denki bun fu sabi fa yu mati tan. Ma no luku soso den sani di yu wani si. Teki yu ten. Pruberi fu si fa yu mati de trutru.

 Furu sma di e hori nanga wan trawan, no e luku finifini fa a trawan tan. Na presi fu dati, den e luku soso den sani di den ala tu lobi. Kande den e taki: „Wi lobi den srefi poku. Wi lobi du den srefi sani. Altijd wi de eens!” Ma yu musu luku den fasi fu a trawan moro fini. Yu musu kon sabi fa a ’de dipi na ini en ati’ (1 Petrus 3:4; Efeisesma 3:16). Na presi fu luku nomo nanga omeni sani unu de eens, yu kan kon sabi moro fu en te yu e luku san e pasa te unu no de eens.

 Fu eksempre, prakseri den sani disi:

•   San a e du te unu no de eens? A de so taki a wani du sani nomonomo fa en wani? En ’ati e faya’ esi-esi, noso a lobi ’kosi’? (Galasiasma 5:​19, 20; Kolosesma 3:8) Noso a de wan sma di de reidelek? A wani du san trawan wani efu a no de wan fowtu sani, soso fu meki freide de?​—Yakobus 3:17.

•   A lobi basi trawan? Noso a de wan sma di no lobi te yu abi tra mati? A e dyarusu? A wani taki yu musu taigi en ala sani di yu e du? Nicole e taki: „Mi yere fa tu sma di e hori nanga makandra e feti fu di a wan feni taki a trawan musu taigi en ala yuru pe a de. Mi denki taki a sani disi e sori taki a no o go bun.”​—1 Korentesma 13:4.

•   Fa tra sma e denki fu a mati fu yu? A bun fu taki nanga sma di sabi yu mati langa kaba. Taki nanga den lepi Kresten na ini a gemeente di sabi en. Na so yu o sabi efu sma ’e taki bun fu en’.​—Tori fu den apostel 16:​1, 2.