Te wan womi ku wan mujëë di toou pai wan mii, de ta wai seei, ma a di wan seei ten a sa dë wan taanga soni da de. Te un pai di fosu mii fuunu, nöö woon ko si taa gaansë u di ten ku di kaakiti fuunu woon ta tei fuun sa sölugu di mii. Woon ta lasi duumi, so juu wan o ta fii sö bunu. Hii dee soni aki tuu sa dë wan taanga soni da unu a di toou libi. Un tu musu taki fa woon seti soni makandi u sa sölugu di mii fuunu, söseei u mbei möiti u soni waka bunu a di toou libi fuunu. Unfa dee lai u Bëibel sa heepi unu u pasa dee taanga ten aki?

DI BËIBEL TA TAKI TAA: „Ee i lobi wan sëmbë joo ta hoi pasensi dëën e. Joo ta fii ku ën.” Söseei, ee i lobi wan sëmbë „ja o ta suku bunu fii seei wanwan nöö a kaba, hati fii an o ta boonu ku ën hesihesi” (1 Kolenti 13:4, 5). Te i kuma mama pai di fosu mii fii, an dë u taki taa di pisiten dë, hii di pakisei fii o ta dë a di mii fii. Di soni aki sa mbei taa i manu sa fii kuma ja ta a’ ten dëën möön. Ma ja musu fëëkëtë taa hënseei abi i fanöudu tu. Heepi ën a wan lobihati fasi ku pasensi faa sa fusutan taa hënseei sa heepi i fuun kiija di mii fuunu makandi.

„Un dee womi dee dë ku mujëë, un musu ta fii da dee mujëë fuunu e” (1 Petuisi 3:7). I musu fusutan taa di mujëë fii o ta buta pakisei möön gaanfa a di mii. U di a dë wan njunjun faantiwöutu di a kisi, mbei a sa pasa taa so juu a o ta booko hën hedi, a o ta wei, nasö a sa fii bookosaka seei. So juu hati fëën sa ta boonu ku i tu, ma i musu pooba u hoi iseei u hati fii an boonu ku ën tu, u di „di sëmbë di hati fëën an ta boonu hesihesi, bunu möön wan womi di taanga” (Nöngö 16:32). Lei taa i ta fusutan di mujëë fii, nöö heepi ën ku dee soni dee a a’ fanöudu.​—Nöngö 14:29.

SONI DI I SA DU:

• Un dee tata: Heepi i mujëë u luku di mii, aluwasi a ndeti seei. I musu disa so soni di i bi ta du, sö taa i sa abi möön ten da di mujëë ku di mii fii

• Un dee mama: Te i manu kë heepi i ku di mii, nöö disëën be a heepi i. Ee an ta seeka di mii kumafa a musu du ën, nöö na kuutu ën, ma lei ën a wan sutifasi fa a musu du ën

DI BËIBEL TA TAKI TAA: „De o toon wan sinkii.” (Kenesesi 2:24). Hii fa di mii di un pai ko a di wosudendu, tökuseei wan musu fëëkëtë taa un dë „wan sinkii” jeti. Un musu ta mbei möiti u di lobi fuunu ko möön taanga.

Un dee mujëë, un musu dë ku tangi u di heepi di dee manu fuunu ta heepi unu. Dee soni dee woon ta taki u da de tangi u di heepi di de ta heepi unu, sa dë kuma wan deesi di ta „kula wotowan” (Nöngö 12:18). Un dee womi, un piki dee mujëë fuunu fa un lobi de tjika. Gafa de u di fasi fa de ta solugu di wosudendu.​—Nöngö 31:10, 28.

„Na wan sëmbë musu ta du wan soni di bunu dëën seei nöö a kaba e, ma i musu ta mëni andi dë bunu da di otowan fii tu” (1 Kolenti 10:24). Hii juu i musu ta du andi bunu da i mujëë nasö da i manu. Un tu sëmbë musu ta tei ten u ta sindo ta fan ku unuseei, u ta gafa unuseei, söseei u ta haika unuseei tu. Ja musu ta pakisei i wanwan nöö, te a nama ku di duumi di un musu duumi ku unuseei, ma i musu ta hoi dee fii u di wotowan fii a pakisei. Buta pakisei a dee soni dee i mujëë nasö i manu kë. Di Bëibel ta taki taa: „Wan musu duumi paatipaati ku unu seei, boiti ee un tuu fiti buka” (1 Kolenti 7:3-5). Fëën mbei un tu sëmbë musu taki u di soni aki, fuun sa fusutan unuseei bunu. Te un abi pasensi, ku te un ta fusutan unuseei, nöo di soni dë o mbei di lobi fuunu ko möön taanga.

SONI DI I SA DU:

• Na fëëkëtë u ta mbei ten fuun tu sëmbë sa ta dë makandi

• Du pikipiki soni da i mujëë nasö da i manu faa ta fii taa i lobi ën. Kandë i sa ta manda sms dëën, nasö dëën wan piki kado

DI BËIBEL TA TAKI TAA: „Sensi di i bi dë piki mii seei, hën wë i bi lei Masa Gaangadu Buku te sabi. Nöö di Buku dë, a abi kaakiti tjika u ta da i fusutan fii sa biibi a Jesosi Keesitu fii feni heepi nëën” (2 Timoteo 3:15). Un taki makandi andi woon du u lei di mii fuunu soni. Bifö un pai ën seei, a abi di köni u lei soni. Di mii fuunu sa sabi unu töngö, hii fa a dë a bëë dendu jeti. Nöö di fasi fa un ta fii sa abi kaakiti nëën liba tu. Un lesi dëën aluwasi a dë wan beibi jeti. Hii fa kandë an ta fusutan andi un ta lesi dëën, tökuseei a sa heepi ën faa lo’ lesi te a ko möön bigi.

Di mii fuunu an njönku poi u jei te un ta taki soni u Gadu dëën. Be a ta jei fa i ta begi Jehovah (Detolonomi 11:19). Aluwasi pëë i ku ën ta pëë seei, ta taki ku ën u dee soni dee Gadu mbei (Psalöm 78:3, 4). Te a ta göö ko möön bigi, nöö a o ta si fa i lobi Jehovah, nöö hënseei o lei u lobi Jehovah tu.

SONI DI I SA DU:

• Begi Gadu faa da i di köni fii sa lei di mii fii soni

• Kai di wan seei soni dëën hiniwan juu baka. Kandë i sa ta kai wöutu nasö woto soni, nöö a sö wan fasi a ta bigi ta lei soni fuukufuuku