O loo maelega Molimau a Ieova i Bulgaria e aʻoaʻo isi i le upu moni e faatatau i le Atua ma lana Afioga le Tusi Paia. Talu mai le tausaga e 2000, e faitau selau Molimau a Ieova mai i isi atunuu na malaga e fesoasoani Bulgaria. O ā luʻi e fesagaʻia pe a malaga e talaʻi i se isi atunuu? Aiseā e aogā ai na taumafaiga? O faamatalaga nei a nisi o i latou na malaga i Bulgaria.

 Na faapea mai Darren mai i Egelani, “O le ma sini o le auauna i se atunuu o loo tele ai le manaʻoga. Ina ua uma ona ma faaipoipo ma Dawn, na ma malaga ai i Lonetona e fesoasoani i le aʻoaʻoina o le Tusi Paia i le gagana Rusia. E tele taimi na ma fuafua ai e malaga i se isi atunuu, ae e iai ni māfuaaga na lē taunuu ai. Na toeitiiti lava ma faavaivai ai, ae na fesoasoani mai se uō e ma te iloa ua suia le tulaga o mea, ma ua mafai ona faataunuuina lo ma sini.” Na amata loa ona vaai e Darren ma Dawn se atunuu o loo tele ai le manaʻoga mo tagata talaʻi, ma e mafai moni ona la malaga i ai. I le 2011, na la malaga ai loa i Bulgaria.

 O le olioli na faaalia e i latou na siitia i isi vaega o le lalolagi, na faalaeiauina ai nisi e leʻi sini muamua e auauna i se isi atunuu. Na faapea mai Giada e nonofo i Italia ma lana tane o Luca: “Na ou feiloaʻi i Molimau maelega o loo auauna fiafia i Amerika i Saute ma Aferika. Na matuā pāʻia loʻu loto i lo latou olioli ma tala na latou faamatalaina mai. Na fesoasoani lenā e toe fetuunaʻi ai oʻu sini faaleagaga.”

 I le 2015, na siitia ai Tomasz ma Veronika ma le la fanau e toʻalua o Klara ma Mathias mai i Czech Republic i Bulgaria. O le ā na uunaʻia ai i latou e siitia atu? Na faapea mai Tomasz: “Na matou iloilo lelei faaaʻoaʻoga a uso ma tuafāfine na siitia i isi atunuu e aofia ai o matou tauaiga, ma na matou manatunatu foʻi i nisi o mea na tutupu iā i latou. Na pāʻia o matou loto i lo latou olioli, ma na talanoa faatasi ai lo matou aiga.” O loo talaʻi fiafia nei lenei aiga i lo latou oganuu fou i le aai o Montana i Bulgaria.

 O Linda le isi Molimau na siitia atu i Bulgaria. Na ia faapea mai: “Na ou asiasi i Ekutoa i le tele o tausaga ua mavae, ma na ou feiloaʻi ai i nisi na siitia atu i ina e talaʻi. Na ou mafaufau ai, atonu e iai se aso ou te auauna ai foʻi i le mea o loo tele ai le manaʻoga.” Na manatunatu foʻi Petteri ma Nadja o se ulugalii mai Finilani i faaaʻoaʻoga a isi. Na la faapea mai: “I la matou faapotopotoga, e iai nisi tagata talaʻi tomai na siitia i isi atunuu e talaʻi ai. E masani ona latou talanoa fiafia i tausaga na latou talaʻi ai i na atunuu. Na latou faapea mai o taimi sili na ona fiafia o latou olaga.”

 O i latou e mananaʻo e auauna i isi atunuu e tāua tele le fuafua lelei. (Luka 14:28-30) Na fai mai Nele mai i Peleseuma: “Ina ua amata ona ou mafaufau e auauna i se isi atunuu, na ou tatalo ma amata ona ou saʻili i mataupu talafeagai i a tatou lomiga. Na ou suʻesuʻeina na mataupu ma taumafai e iloa vala e tatau ona ou galue i ai.”

 O Kristian ma Irmina e mai i Polani ae e silia ma le iva tausaga o nonofo i Bulgaria. Na la iloa le aogā iā i laʻua o le auai i le vaega e tautatala i le gagana Bulgaria i Polani a o leʻi siitia. Na fesoasoani ma faalaeiau i laʻua e lenā vaega e aʻoaʻo le gagana. Na la faapea mai: “Na ma iloa ai le lelei o le faaavanoa o oe mo le auaunaga, ma tofo i le auala e tausia ai e Ieova ou manaʻoga. Pe a e lotomalie e faailoa atu iā Ieova, ‘⁠O aʻu lenei! Inā auina atu ia aʻu,’ o le a e faia ai mea e te leʻi mafaufauina e mafai ona e faia.”—Isaia 6:8.

 Na filifili Reto ma Cornelia o se ulugalii mai Suisilani e faafaigofie o la olaga ma sefe a la tupe, ina ia sauniuni ai e auauna i se isi atunuu. Na la faamatala mai: “I le pe ā ma le tausaga a o ma leʻi siitia, na ma malaga ai i Bulgaria mo se vaiaso ina ia ma iloa le tele o mea e faatatau i lenā atunuu. O i ina na ma talanoa ai i se ulugalii misionare ua iai le poto masani ma maua mai ai ni fautuaga aogā.” Na faatatau e Reto ma Cornelia na fautuaga aogā, ma ua silia nei ma le 20 tausaga o auauna i Bulgaria.

 O i latou e siitia i se isi atunuu e manaʻomia ona faamasani i suiga fou ma atonu o ni tulaga faigatā. (Galuega 16:9, 10; 1 Korinito 9:19-23) O le luʻi sili i le toʻatele o tagata, o le aʻoaʻoina o se gagana fou. Ua faapea mai Luca lea na taʻua muamua, “E ma te fiafia e fai tali i sauniga i a maʻua lava upu. Peitaʻi, na faigatā iā i maʻua ma laʻu avā mo se taimi ona saunia se tali faigofie i le gagana Bulgaria. E pei lava ua ma toe lāiti. O le mea moni, na sili atu ona lelei tali a tamaiti Bulgaria nai lo i maʻua.”

 Na faapea mai Ravil mai i Siamani: “O le aʻoaʻoina o le gagana Bulgaria e lagona ai lē lavā. Ae na ou mafaufau pea, ‘⁠Pe a ou faia se mea sesē aua le faamamafaina i le mafaufau ae ʻata i ai.’ Ou te lē vaai i luʻi o se faafitauli, ae o se vaega o laʻu auaunaga paia iā Ieova.”

 Na faapea mai Linda lea na taʻua muamua: “Ou te lē lelei i le aʻoaʻoina o se gagana fou. E lē faigofie le aʻoaʻoina o le gagana Bulgaria, ma e tele taimi na ou mafaufau ai e tuu. E te lagona le tuua toʻatasi pe a lē mafai ona e talanoa atu i tagata, ma e lē malamalama i a latou tala. Ou te suʻesuʻeina mea uma i le gagana Suetena, ina ia faamalosia ai loʻu itu faaleagaga. Ae na iʻu lava ina mafai ona ou aʻoaʻoina le gagana Bulgaria, ona o le fesoasoani a oʻu uso ma tuafāfine pele.”

 O le isi luʻi o le misia o aiga ma uō. E tuua e i latou e siitia atu i isi atunuu o latou tauaiga ma uō pele. Na faapea mai Eva na siitia atu i Bulgaria ma lana tane o Yannis: “I le taimi muamua na ou lagona le tuua toʻatasi, ae ina ia foʻia lenā luʻi na matou fesootaʻi e lē aunoa ma o matou aiga ma uō i lo ma atunuu, ma faia ni uō fou i Bulgaria.”

 E iai foʻi isi luʻi. Na faapea mai Robert ma Liana lea na siitia atu i Bulgaria mai i Suisilani: “O se luʻi tele iā i maʻua le aʻoaʻoina o le gagana ma le aganuu a Bulgaria, ma e ma te lē masani i le maʻatiʻati o le tau mālūlū i ina.” Peitaʻi, o le iai pea o se vaaiga saʻo ma le lē faamamafaina i le mafaufau o na mea, na fesoasoani i lenei ulugalii e auauna faamaoni ai i Bulgaria mo le 14 tausaga ua mavae.

 Na fautuaina e Lilly le talaʻi i nofoaga e tele ai le manaʻoga. Na ia faapea mai: “Na mafai ona ou tofo i le fesoasoani a Ieova i se auala atonu e lē maua i le atunuu ou te sau ai. E tele mea e fai e fesoasoani ai i isi ma e fesoasoani lenā ou te agaʻigaʻi ai i luma faaleagaga, ma ou maua ai le olioli ma le faamalieina.” Na ioe ai lana tane o Ravil. Na ia faapea mai: “O le olaga sili lenei, ma o se avanoa e lē aumaua e faamasani ai i Kerisiano maelega mai i isi atunuu o ē e iai le poto masani i le aʻoaʻoina o upu moni mai i le Tusi Paia. E tele mea ua ou aʻoaʻoina mai iā i latou.”

 O le iai o le agaga faataulaga ma le faaavanoa atu e le toʻatele o i latou lava e auauna i Bulgaria, ua talaʻia ai le “tala lelei o le malo . . . i atunuu uma.” (Mataio 24:14) O le faaalia o le agaga tauofo, ua mafai ai e i latou ua siitia atu i Bulgaria ona molimauina le auala ua faamalieina ai e Ieova faanaunauga o latou loto, ma faamanuia i a latou fuafuaga uma.—Salamo 20:1-4.