O RENEÉ o se tuafafine ua silia i le 30 tausaga, na ola aʻe i se aiga Molimau maelega i Ausetalia. Ua ia faapea mai: “Sa matou feoaʻi i le tele o vaipanoa sa telē ai le manaʻoga mo tagata talaʻi. Sa faia e Tamā ma Tinā le tele o mea mananaia ma maua ai le fiafia. O le ituaiga o olaga foʻi lenā ou te manaʻo ai i laʻu fanau e toʻalua.”

 O Shane o le tane a Reneé, o se uso ua toetoe 40 tausaga, ma e tutusa lelei o laʻua sini faaleagaga. Ua ia faapea mai: “Na māeʻa loa ona fanau la maʻua pepe lona lua, ona ma faitau lea i Le Olomatamata e faatatau i se aiga Molimau na malaga atu i le itu i saute i sisifo o le Pasefika i se vaafailā, ina ia talaʻi i atumotu o Toga. * O lenā mataupu na uunaʻia ai i maʻua e tusi atu i ofisa o lālā o Molimau a Ieova i Ausetalia ma Niu Sila, ma talosaga ai mo vaipanoa o loo matuā manaʻomia ai ni tagata talaʻi o le Malo. * O le tali na aumai, na valaaulia i maʻua i Toga, o le nofoaga lea na ma faalogo i ai.”

E pe tusa ma le tausaga na galulue ai Shane ma Reneé, ma la laʻua fanau o Jacob ma Skye i Toga, ae na toe foʻi i Ausetalia ona o fevesiaʻiga i le atunuu. Peitaʻi, sa tumau pea lo laʻua sini o le faalautele o la laʻua faiva. I le 2011, na latou siitia ai i Norfolk Island, o se motu laʻitiiti i le Pasefika e pe ā ma le 900 maila (1,500 km) i le itu i sasaʻe o Ausetalia. O le ā le tulaga na oo i ai? I le taimi lenei, ua 14 tausaga o Jacob ma na ia faapea mai, “Na tausia i matou e Ieova ma fesoasoani iā i matou e fiafia i le faiva.”

E pei o Shane, Reneé ma la laʻua fanau, e toʻatele isi aiga Molimau o loo latou lotomalilie e auauna i vaipanoa o loo telē ai le manaʻoga. O le ā na uunaʻia ai i latou e faia faapea?

O Burnett ma Simone, o se ulugalii ua silia i le taʻi 30 o laʻua tausaga, ma la laʻua fanau tama o Eston ma Caleb, e 12 tausaga o le tasi ae 9 tausaga o le isi. Na latou siitia i Burketown, o se aai maotua i Kuiniselani i Ausetalia. Ua faapea mai Burnett: “E na o le taʻitolu i le taʻifā tausaga faatoʻā talaʻi atu Molimau i inā. Ae e toʻatele tagata e fiafia i le tala lelei. Peitaʻi, e matou te mananaʻo ina ia faia e lē aunoa ni a latou suʻesuʻega faale-Tusi Paia.”

Ua sili teisi ma le taʻi 50 tausaga o Mark ma Karen, sa auauna i le tele o faapotopotoga e latalata i Sini i Ausetalia, ma la laʻua fanau o Jessica, Jim, ma Jack. Na latou siitia atu i Nhulunbuy o se vaipanoa maotua e ʻeli ai minerale i le itu i Mātū o Ausetalia. Ua faapea mai Mark: “Ou te fiafia tele i tagata, o lea na ou fia alu ai i se vaipanoa e tele mea e faia ai i le faapotopotoga ma le faiva.” Peitaʻi, na faatalatū Karen i le taimi muamua. Na ia faapea mai: “Na ou lotomalie e faataʻitaʻi ina ua māeʻa ona faalaeiau mai Mark ma isi iā te aʻu. O lea ua ou fiafia nei.”

I le 2011, na toe foʻi ai Benjamin ma Carolyn ma la laʻua fanau teine lāiti o Jade ma Bria mai i Kuiniselani i Ausetalia agaʻi i Timor-Leste, o se atunuu laʻitiiti i Timoa i motu o Indonesia. Ua faapea mai Ben: “Sa ma auauna ma Carolyn o ni paeonia faapito i Timor-Leste. Sa manaia le talaʻiga, ma e ese le lagolagosua o uso. Sa ma faanoanoa ina ua ō ese, ae na ma maumauaʻi lava e toe foʻi i inā. Sa tolopō la maʻua fuafuaga ina ua maua la maʻua fanau, ae e leʻi suia ai.” Ua faapea mai Carolyn: “E ma te mananaʻo e auaumea la maʻua fanau ma misionare, tagata Peteli, ma paeonia faapito ina ia laʻua maua ai se olaga sili faaleagaga.”

Na fetalai Iesu i ona soo: “O ai foʻi se tasi o outou e manaʻo e fau se ʻolo, e lē muamua ea ona nofo i lalo ma faitau tupe o le a faaalu.” (Luka 14:28) I se uiga talitutusa, pe a mafaufau se aiga e siitia atu i se isi vaipanoa, e tāua tele le fuafua lelei. O ā ni mea e manaʻomia ona mafaufau i ai?

ITU FAALEAGAGA: Ua faapea mai Ben: “E matou te mananaʻo e auauna atu i isi nai lo o le avea o i matou ma avega mamafa iā i latou. O lea na matou taumafai ai e atiaʻe lo matou itu faaleagaga a o leʻi siitia atu. Sa faateleina foʻi lo matou sao i le faiva ma meafai a le faapotopotoga.”

Ua faapea mai Jacob: “A o matou leʻi siitia atu i Norfolk Island, sa matou faitau i le tele o talaaga o soifuaga i Le Olomatamata ma le Ala Mai!, e faatatau i aiga na galulue i vaipanoa o loo telē ai le manaʻoga. Sa matou talanoa i luʻi na latou fesagaʻia ma le auala na tausia ai i latou e Ieova.” Ua faaopoopo mai lona tuafafine o Skye lea e 11 tausaga: “Sa tele na ou tatalo, ma tatalo foʻi faatasi ma Tinā ma Tamā.”

 ITU TAUFAALOGONA: Na taʻua e Reneé: “Sa ou fiafia i le vaipanoa sa matou ola faatasi ai ma o matou aiga ma uō, ma na faigofie ai ona matou nonofo i inā. Ae nai lo o le mafaufau pea i mea na ou tuua, sa ou mafaufau i aogā i lo matou aiga o le siitia atu.”

AGANUU: O le tele o aiga e faia a latou saʻiliʻiliga ina ia sauniuni ai mo le siʻomaga fou. Ua faapea mai Mark: “Sa tele ina matou faitauina mataupu e faatatau iā Nhulunbuy. Sa lafo mai e uso i inā nusipepa a lenā aai, ina ia matou malamalama ai i tagata ma a latou aganuu.”

Na faaopoopo mai Shane lea na siitia atu i Norfolk Island: “Sa tele ina ou taulaʻi atu i le faaalia o uiga faa-Kerisiano. Na ou iloa e mafai ona ou ola i so o se vaega o le lalolagi, pe afai e moni oʻu faanaunauga, agamalu, faamaoni ma galue mamafa.”

Na faamatilatila e i latou ua taulau manuia i vaipanoa o loo telē ai le manaʻoga le tāua o le fetuutuunaʻi ma le iai o se vaaiga saʻo, pe a feagai ma luʻi e leʻi faatalitalia. Seʻi manatu i nisi o faaaʻoaʻoga:

Ua faamatala mai e Reneé: “Sa ou faamasani i auala eseese e faia ai mea. O se faaaʻoaʻoga, pe a sou le sami i Norfolk Island, e lē mafai ona taula vaa laʻu oloa ma e itiiti ai oloa e maua ma taugatā foʻi. O lea, pe a fai saʻu kuka e tatau ona fuafua lelei.” Ua faaopoopo mai lana tane o Shane: “E tatau foʻi ona fetuunaʻi la matou faasoa ina ia paleni pea vaiaso taʻitasi.”

Na faamatala e la laʻua tama o Jacob se isi luʻi. “E na o le toʻafitu sui o la matou faapotopotoga fou ma e matutua uma. O lea e leai ni aʻu uō e matou te tupulaga. Ae ina ua matou galulue i le faiva na vave ona avea i latou o ni aʻu uō.”

Ua 21 nei tausaga o Jim ma o le luʻi foʻi lenā sa ia fesagaʻia. “O le faapotopotoga latalata lava i Nhulunbuy e silia i le 450 maila (725 km) le mamao, o lea e matou te faaaogāina lelei taimi o fonotaga ma tauaofiaga. E vave ona matou taunuu ma fiafia faatasi  ma uso ma tuafāfine. E matou te vāai i nei faatasiga o mea mananaia ia o le tausaga.”

Ua faapea mai le Faataoto 10:22: “O le faamanuiaga a Ieova, e faatamaoaiga ai.” E toʻatele i latou o loo galulue i vaipanoa o loo telē ai le manaʻoga i le lalolagi aoao ua tofo i le moni o lenā faamatalaga.

Ua taʻua e Mark: “O le faamanuiaga silisili lava o lo matou siitia atu, o le aafiaga lelei lea i la maʻua fanau. Ua mautinoa e la ma fanau matutua e toʻalua, o le a tausia e Ieova i latou e faamuamua manaʻoga o le Malo. E lē mafai ona faatauina e tupe lenā mautinoa.”

Ua faapea mai Shane: “Ua ou matuā vavalalata i laʻu avā ma laʻu fanau. E matuā faamalieina aʻu pe a latou faamatalaina mea ua faia e Ieova mo i latou.” O le faamatalaga foʻi lenā a lona atalii o Jacob: “Ua ou matuā fiafia lava ona sa matou ō mai.”