Aiseā e Lē Faamanatu ai e Molimau a Ieova le Kerisimasi?

PLAY

Manatu sesē taatele

Talafatu: E lē faamanatu e Molimau a Ieova le Kerisimasi ona e lē talitonu iā Iesu.

Tala Moni: O matou o Kerisiano. E matou te talitonu e na o Iesu Keriso e ala mai ai le faaolataga.—Galuega 4:12.

Talafatu: Ua tou faatupu fevaevaeaʻiga i aiga, e ala i le aʻoaʻo o sui o aiga e aua le faamanatuina le Kerisimasi.

Tala Moni: E matou te manatu mamafa i aiga, ma e matou te faaaogā le Tusi Paia e fesoasoani e atiaʻe ma faamalosia ai aiga.

Talafatu: Ua tou lē maua le agaga o le Kerisimasi o le faaalia o le limafoaʻi, faatupu le filemu i le lalolagi, ma le faia o mea lelei i tagata.

Tala Moni: E matou te taumafai malosi e faaalia le limafoaʻi ma le filemu i aso uma. (Faataoto 11:25; Roma 12:18) O se faaaʻoaʻoga, o le auala e faatino ai a matou sauniga ma le talaʻiga, e ōgatusa ma le faatonuga a Iesu: “Ia outou avatu fua, auā ua outou maua fua.” (Mataio 10:8) E matou te faauaʻi atu foʻi tagata i le Malo o le Atua, o le faamoemoe moni lea mo se filemu i le lalolagi.—Mataio 10:7.

Aiseā e lē faamanatu ai e Molimau a Ieova le Kerisimasi?

Na poloaʻi mai Iesu e faamanatu lona maliu ae lē o lona aso fanau.—Luka 22:19, 20.
E leʻi faamanatuina e aposetolo ma uluaʻi soo o Iesu le Kerisimasi. Ua faapea mai le tusi New Catholic Encyclopedia, “O le faamanatuina o le fanau mai o Iesu, na faavaeina i se vaitaimi o le 243 [T.A.] ma luma mai,” i le silia ma le senituri talu ona mavae le maliu o le aposetolo mulimuli.
E augapiu ma se faamaoniga o le fanau mai o Iesu iā Tesema 25; e lē o faamauina i le Tusi Paia lona aso fanau.
E matou te talitonu e lē taliaina e le Atua le Kerisimasi, auā na tupuga mai i tū ma aga faapaupau.—2 Korinito 6:17.

Aiseā tou te lotomalilie ai e inosia outou, ona o le lē faamanatuina o le Kerisimasi?

E toʻatele o loo faamanatu pea le Kerisimasi e ui ua latou iloa e faapaupau lona tupuaga, ma e lē o lagolagoina e le Tusi Paia. E ao ona latou fesili ifo: Aiseā e ao ai i se Kerisiano ona lotomalie e inosia ona o le lē faamanatuina o le Kerisimasi?

Ua faalaeiauina i tatou e le Tusi Paia e mafaufau mo lo tatou lelei, ma faaaogā le “mafaufau lelei.” (Roma 12:1, 2) O loo aʻoaʻoina ai i tatou e faatāua le upu moni. (Ioane 4:23, 24) E ui e matou te faaaloalogia manatu o isi e uiga iā i matou, ae e matou te piiama lava i taʻiala o le Tusi Paia, e tusa pe e inosia ai i matou e le toʻatele o tagata.

E ui ua matou filifili e lē faamanatuina le Kerisimasi, ae matou te faaaloalo i le aiā tatau a se tasi e filifili ai e tusa o lenei mataupu. E matou te lē taofia isi mai i le faamanatuina o le Kerisimasi.