MANATU O TAGATA

E toʻatele tagata e manatu e lē afāina le taalo i taaloga faitupe, pe afai o se taaloga ua uma ona lesitala faaletulafono. O nisi o na taaloga, e pei o le loto, e mafai ona maua ai tupe faasili lea e aogā mo tagata lautele.

MANATU O LE TUSI PAIA

E lē o taʻua patino mai i le Tusi Paia taaloga faitupe. Ae o loo iai le tele o mataupu silisili e faailoa mai ai le silafaga a le Atua faatatau i taaloga faitupe.

O le faamoemoe autū o taaloga faitupe, ia manumalo i tupe a isi. E feteenaʻi lenā ma le lapata‘iga a le Tusi Paia ina ia “leoleo iā te outou i le manaʻo tele.” (Luka 12:15) O le mea moni, o le manaʻo tele e uuna‘ia ai tagata e taaalo i taaloga faitupe. E faasalalau e kamupani o taaloga faitupe ni faailoga tupe tetele, ae latou te lē o faamaoni i le auala e faia ai na taaloga. Ona e latou te iloa, o so o se tagata taalo mauʻoa lava, e naunau ia maua le tele o tupe. Nai lo le fesoasoani i se tagata e leoleo mai le manaʻo tele, ae ua uunaʻia e nei taaloga tagata e maua tupe i se auala faigofie.

O taaloga faitupe, e masani ona uuna‘ia i se sini manatu faapito, o le manumalo lea i le tele o tupe. Peita‘i, o loo faalaeiau mai le Tusi Paia ina ia “aua nei saʻilia e se tasi lona lava lelei, a ia faaauau ona saʻili le lelei o isi.” (1 Korinito 10:24) O se tasi nei o tulafono mai i Tulafono e Sefulu: “Aua e te manaʻo i . . . se isi lava mea a lou tuaoi.” (Esoto 20:17) Pe a naunau le loto o le tagata ia manumalo, e taumafai lava ia faia‘ina le isi tagata ae maua e ia tupe.

O loo lapata‘i mai fo‘i le Tusi Paia e faatatau i le manatu, o le laki o se auala e maua ai faamanuiaga. I Isaraelu anamua, na iai i latou na mou atu le faatuatua i le Atua ae amata ona latou “laulauina se laulau mo le atua o le Laki.” Pe e talia e le Atua moni le tapua‘i atu i le “atua o le Laki?” E leai. Na ia fetalai atu ia i latou, “ua outou faia pea mea e leaga i la‘u vaai, ma na outou filifilia le mea ou te lē fiafia i ai.”​—Isaia 65:11, 12.

I nisi vaega o le lalolagi, e faaaogā tupe ia e maua mai i taaloga faitupe e totogi ai a‘oga, atina‘e ai le itu tau tamaoaiga, ma isi polokalame mo tagata lautele. E ui o loo faaaogā tatau nei tupe, ae e lē faapea ai e lelei le auala na maua mai ai. Ua faaauiluma e na auala le manaʻo tele, manatu faapito, ma le mauaina o se mea e aunoa ma le galue mamafa.

“Aua e te manaʻo i . . . se isi lava mea a lou tuaoi.”​—Esoto 20:17.

MANATU O LE TUSI PAIA

Ua lapataʻi mai le Tusi Paia iā “i latou o ē fia mau‘oa, e pa‘u‘ū i latou i le faaosoosoga ma le mailei, ma le tele o tu‘inanauga valea ma le tigā, ia e oo atu ai tagata i le faaumatiaga ma fano ai.” (1 Timoteo 6:9) O taaloga faitupe, e uunaʻia e le manaʻo tele, ma e matuiā lenā uiga. O le māfuaaga lenā na faaaofia ai i le Tusi Paia le “matapeʻapeʻa” i uiga e tatau ona matuā ʻalofia.​—Efeso 5:3.

Talu ai o le sini o taaloga faitupe o le mauaina o le tele o le tamaoaiga i se auala faigofie, ua atiaʻe ai le manaʻo tele i tupe, lea o loo faamatalaina i le Tusi Paia ‘⁠o le pogai o mea leaga eseese uma.’ O le manaʻo i tupe e faigofie ona pulea ai le olaga o se tasi, ma mou atu ai lona faatuatua i le Atua. O loo faatusaina e le Tusi Paia i latou ua maileia i le manaʻo tele i tupe, e tai pei ua ‘⁠tuia i latou e i latou lava i le tele o tigā.’—1 Timoteo 6:10.

O le matapeʻapeʻa, e iʻu atu ai i le lē faamalieina i tupe e latou te maua ma mou atu ai lo latou fiafia. “O lē e fiafia i siliva, e lē faamalieina i siliva, o lē e fiafia i le ‘oa e lē faamalieina i ana tupe maua.”—Failauga 5:10.

O le faitau miliona e fiafia i taaloga faitupe, ua maileia i latou i se masaniga e lē mafai ona toe tuua. O se faafitauli ua aafia ai le lalolagi atoa, ma i se fua faatatau, e faitau miliona tagata ua fai ma masaniga le taaalo i taaloga faitupe i le Iunaite Setete lava ia.

Ua taʻua i le Faataoto 20:21: “Ua maua le tofi e ala i le matape‘ape‘a i le amataga, a o lona lumana‘i o le a lē faamanuiaina.” O taaloga faitupe ua iʻu atu ai i le tele o aitalafu ua lē mafai ona totogi, leai ai ni galuega, faaleagaina ai faaipoipoga ma faiā ma isi. O le faatatauina o taʻiala mai le Tusi Paia, e fesoasoani i se tasi e ʻalofia ai aafiaga lē lelei o taaloga faitupe, ma maua ai le fiafia.

“O i latou o ē fia mau‘oa, e pa‘u‘ū i latou i le faaosoosoga ma le mailei, ma le tele o tu‘inanauga valea ma le tigā, ia e oo atu ai tagata i le faaumatiaga ma fano ai.”​—1 Timoteo 6:9