O le Tusi Lona Lua a Peteru 3:1-18
3 Le ʻaupele e, o le tusi lona lua lenei ua ou tusi atu ai iā te outou, e pei ona ou tusi atu i laʻu tusi muamua, e faatupu ai lo outou mafaufau lelei e ala i loʻu faamanatu atu,+
2 ia outou manatua upu na fai mai ai muamua* le ʻauperofeta paia ma poloaʻiga a le Alii ma le Faaola, ia na ala mai i o outou aposetolo.
3 O le mea muamua lenei ia outou iloaina, o aso e gata ai e ō mai ai tagata tauemu ma faatauemu mai, ma ua latou faia faapea e tusa ai ma o latou lava tuʻinanauga+
4 ma faapea ane: “Na folafola mai o ia e faatasi mai, ae o fea o iai?+ Auā e mai lava i le aso na maliliu* ai o tatou augātamā, e leai lava se mea o suia talu mai le foafoaga o le lalolagi.”+
5 Auā ua latou lē amanaʻia ma le loto i ai lenei mea moni e faapea, sa iai le lagi i aso anamua, ma na mautū foʻi le laueleele ma manu aʻe mai i le vai, ma sa i totonu foʻi o le vai, ona o le afioga a le Atua;+
6 o mea foʻi ia na oo ai le faaumatiaga i le lalolagi i lenā taimi, ina ua lofia i le vai.+
7 O le afioga foʻi lea ua taofia ai le lagi ma le lalolagi o loo iai i le taimi nei mo le afi, ma ua tuu seʻia oo i le aso faamasino ma le faaumatiaga o tagata faalēmataʻu.+
8 Le ʻaupele e, aua neʻi galo iā te outou lenei mea, o le aso e tasi iā Ieova* e tusa lea ma le afe o tausaga, ma o le afe o tausaga e tusa lea ma le aso e tasi.+
9 E lē faatuai mai Ieova* e tusa ma lana folafolaga,+ e faapei ona manatu ai isi tagata i le faatuai, ae o loo onosaʻi mai pea o ia iā te outou, auā e lē finagalo o ia e faaumatia se tasi, ae e finagalo ia oo uma lava i le salamō.+
10 Ae e oo mai le aso o Ieova*+ e pei o se gaoi,+ e vave mou atu ai le lagi+ ma le gogolo tele, e mavae atu foʻi mea o fai aʻe ai ona o le aasa tele, e faaalialia foʻi le lalolagi ma ana galuega.+
11 Talu ai o le a faapenei ona mavae atu o nei mea uma, ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua,
12 a o outou faatalitali ma tāmau i mafaufau* le oo mai* o le aso o Ieova,*+ lea o le a faaumatia ai+ le lagi i le afi, ma liusuāvai ai foʻi mea o loo fai aʻe ai ona o le aasa tele!
13 Ae e tatou te faatalitali i le lagi fou ma le lalolagi fou, e tusa ma lana folafolaga,+ e mau ai le amiotonu.+
14 O le mea lea le ʻaupele e, a o outou faatalitali i nei mea, ia outou faia le mea sili ina ia maua mai outou e ia, e leai so outou ila, e lē ponā, ma e filemu.+
15 Ia manatunatu foʻi i le onosaʻi o lo tatou Alii ua maua ai le faaolataga, e pei ona tusi atu ai lo tatou uso pele o Paulo iā te outou, e tusa ma le atamai ua foaʻiina atu iā te ia,+
16 ua taʻua e ia nei mea e pei ona ia tusia i ana tusi uma. Peitaʻi, e iai nisi o mea e faigatā ona malamalama i ai, lea ua mimilo sesē e tagata e lē malamalama* ma ē ua lē mautonu, e pei foʻi ona latou faia i isi mau uma o Tusitusiga Paia, ae e iʻu ai i lo latou lava faaumatiaga.
17 O le mea lea, o outou le ʻaupele e, ona ua outou muaʻi iloa lenei mea, ia outou leoleo ai iā te outou ina neʻi taʻitaʻieseina outou e i latou i le sesē o tagata solitulafono, ma outou paʻuʻū ai mai i lo outou tutū maumauaʻi.*+
18 Ae ia outou tuputupu aʻe pea i le agalelei faifua ma le poto e faatatau i lo tatou Alii ma le Faaola o Iesu Keriso. Ia iā te ia le mamalu i le taimi nei seʻia oo i le faavavau. Amene.
Faamatalaga Pito i Lalo
^ Po o “mea na valoia e.”
^ Ele., “na momoe (i le oti).”
^ Po o le “ma le matuā naunau.” Ele., “faatelevave.”
^ Ele., “le faatasi mai.”
^ Po o le “e leʻi a‘oa‘oina.”
^ Po o le “tutū mausalī.”
