Sa ou fanau i Santo Domingo, i Dominican Republic, ma o aʻu le uii o la matou fanauga e toʻafā. E lelei aʻoaʻoga a oʻu mātua, ma na la tausia lelei foʻi i matou. I le fā tausaga a o oʻu leʻi fanau mai, na feiloaʻi ai oʻu mātua ma ni misionare Mamona. O le faaaloalo ma le mananaia o foliga vaaia o nei misionare, na filifili ai oʻu mātua e avea ma aiga muamua o le motu, e auai i le Ekalesia a Iesu Keriso o le Au Paia o Aso e Gata Ai.

A o oʻu tuputupu aʻe, sa ou fiafia i meafai a le lotu, le faatāuaina e Mamona o aiga, faapea ma amioga tatau. Sa ou mitamita i le avea ai o se Mamona, ma sa fia avea aʻu ma misionare.

Ina ua 18 oʻu tausaga, na siitia ai lo matou aiga i Florida i Amerika, ina ia ou auai i le iunivesite. Pe tusa o se tausaga mulimuli ane ai, na asiasi mai ai le uso o loʻu tinā ma lona toʻalua, ma o i laʻua o ni Molimau a Ieova. Na la valaaulia i matou i sa latou fonotaga faale-Tusi Paia, ma sa ou maofa ina ua ou mātauina tagata na auai o loo suʻe a latou Tusi Paia ma fai faamaumauga. O lea na ou manaʻo ai foʻi e iai saʻu api ma se peni e fai ai aʻu faamaumauga.

Ina ua uma le fonotaga, na faapea mai le uso o loʻu tinā ma lona toʻalua, e mafai ona la aʻoaʻoina aʻu i le Tusi Paia, ona o lea ou te naunau e fia avea ma misionare. Sa ou fiafia i lenā fuafuaga, auā sa sili atu loʻu malamalama i le Tusi a Mamona nai lo o le Tusi Paia.

Na faia ni a matou talanoaga faale-Tusi Paia i le telefoni, ma na la faalaeiau aʻu  e faatusatusa oʻu talitonuga ma aʻoaʻoga a le Tusi Paia. Na mananaʻo ou te faamaonia e aʻu lava ia aʻoaʻoga moni a le Tusi Paia.

E tele talitonuga a Mamona sa ou taliaina, ae sa ou lē mautinoa pe e ōgatusa ma le Tusi Paia. Na lafo mai e le uso o loʻu tinā le mekasini o le Awake!, Novema 8, 1995, * lomia e Molimau a Ieova, lea o loo iai ni talitonuga a Mamona. Na faateʻia aʻu ona ou te leʻi malamalama lelei i le tele o aʻoaʻoga a Mamona. O lea na ou alu ai loa i le tuatusi aloaʻia a Mamona i le Initaneti, ma ou iloa ai e saʻo manatu o le Awake!, ma na faamaonia atili ina ua ou asiasi i le fale mataaga a Mamona i Utah.

Na ou manatu e lē eseese le Tusi a Mamona ma le Tusi Paia. Ae ina ua ou naunau e suʻesuʻe le Tusi Paia, o i inā na ou iloa ai le eseesega. O se faataʻitaʻiga, o loo taʻua i le Tusi Paia i le Esekielu 18:4, e leai se vaega o le tagata e ola pea pe a oti. Peitaʻi, ua faapea mai le Tusi a Mamona i le Alema 42:9: “Ua le mafai ona oti le agaga.”

E lē gata sa feteenaʻi loʻu mafaufau e tusa ai ma nei talitonuga, ae na ou tuufesili foʻi, pe aiseā e matuā lotonuu ai tagata Mamona. O se faataʻitaʻiga, e manatu Mamona o loo iai le faatoʻaga o Etena, i Jackson County, Missouri, i Amerika. Na faapea mai foʻi a latou perofeta, o le a pule le Malo o le Atua i le lalolagi atoa e ala mai i le malo o Amerika.

Sa ou mafaufau po o le a faapefea la loʻu atunuu moni ma isi atunuu. Na ou lāgā lenei mataupu ina ua vili mai se alii Mamona ua uma ana toleniga faa-Misiona. Na ou fesili i ai pe e lotomalie e tau ma ona uso Mamona i isi atunuu i taimi o taua. Na faateʻia aʻu ina ua ia tali mai ioe! Na ou suʻesuʻe loloto i oʻu talitonuga o se Mamona, ma tuufesili atu i taʻitaʻi o le lotu, ae na latou tali mai, e iai lava se aso ou te malamalama ai i tali o aʻu fesili.

Na ou lē fiafia i a latou tali. Sa ou tomānatu pe aiseā ua ou naunau ai e fia avea o se misionare Mamona. Na ou iloa sa fia avea aʻu ma misionare ona ou te fia fesoasoani i isi, ae sa ou manaʻo foʻi e faaaloalogia aʻu e tagata. Peitaʻi, e leʻi tele soʻu malamalama e uiga i le Atua. E ui e iai taimi na ou faitau ai i le Tusi Paia, ae ou te leʻi faatāuaina. Ou te leʻi iloa le fuafuaga a le Atua mo le lalolagi faapea le fanau a tagata.

O loʻu suʻesuʻeina o le Tusi Paia ma Molimau a Ieova, na ou malamalama ai i nisi o mea e pei o le suafa o le Atua, le mea e tupu i le tagata pe a oti, ma le matafaioi a Iesu i le faataunuuina o fuafuaga a Ieova. O lea ua ou malamalama i le Tusi Paia, ma ua ou fiafia e faasoa atu i isi le upu moni. Na ou iloa o loo iai le Atua, ae o lea ua ou talanoa atu iā te ia e pei o saʻu Uō mamae. Iā Iulai 12, 2004, na ou papatiso ai o se Molimau a Ieova, ma i le ono masina mulimuli ane na avea ai loa aʻu ma tagata talaʻi faataimi atoa.

Na ou galue i le ofisa ulu a Molimau a Ieova i Brooklyn, i Niu Ioka mo le lima tausaga. Sa ou fiafia e fesoasoani i le lomiaina o Tusi Paia ma lomiga faale-Tusi Paia, ia e aogā i le faitau miliona o tagata i le lalolagi, ma o loo faaauau pea ona ou fiafia e fesoasoani i tagata ina ia iloa le Atua.