LE MANATU FAASAIENISI

Na taʻua i se mataupu i le Harvard Mental Health Letter, “e iai le fesootaʻiga o le lotofaafetai i le mauaina o le fiafia moni. E fesoasoani foʻi le lotofaafetai i le mauaina o faalogona mautinoa, maua le fiafia i mea lelei na tutupu, faaleleia ai le soifua mālōlōina, feagai ai ma faigatā, ma atiaʻe ai ni faauōga māfana.”

MANATU O LE TUSI PAIA

Ua faalaeiauina i tatou i le Tusi Paia ina ia atiaʻe le uiga o le lotofaafetai. Na faataatia e le aposetolo o Paulo se faaaʻoaʻoga lelei i lea vala, na ia tusi ʻia faaalia lo outou loto faafetai.’ O se faataʻitaʻiga, na ia ʻfaafetai e lē aunoa i le Atua’ i le auala na talilelei mai ai isi i le feʻau na ia folafola atu. (Kolose 3:15; 1 Tesalonia 2:13) O le mauaina o le fiafia moni e lē lava le tau ina faapea atu faafetai mai i lea taimi i lea taimi, ae maua mai i le iai o le uiga lotofaafetai. O le iai o lenei uiga, e puipuia ai i tatou mai le soona faatāuaina o i tatou lava, matauʻa, ma le teuloto o le ita, lea e ʻalofia ai i tatou e tagata ma aveesea ai lo tatou fiafia i le olaga.

Ua faataatia e Lē na foafoaina i tatou se faaaʻoaʻoga lelei i le faaalia o le lototalisapaia, e oo lava i tagata faatauvaa. Ua taʻua i le Eperu 6:10: “E lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa.” Ioe, i le silafaga a Lē na foafoaina i tatou o se mea lē tonu le lē faaalia o le uiga lotofaafetai.

“Ia olioli pea. Ia faafetai i mea uma lava.”—1 Tesalonia 5:16, 18.

MEA NA TUTUPU

Pe a tatou faaalia le lotofaafetai mo se meaalofa, se faamatalaga agalelei, po o se fesoasoani, e lagona ai e lē na aumaia lenā meaalofa le talisapaia ma le faatāuaina o ia. E oo lava i tagata e lē masani, e latou te talilelei i ē faafetai atu iā i latou mo le faia o se gaoioiga agalelei, e pei o le tatalaina o le faitotoʻa.

MANATU O LE TUSI PAIA

Na fetalai Iesu Keriso: “Ia outou foaʻi atu pea, ona foaʻi mai lea o tagata iā te outou. Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu.” (Luka 6:38) Seʻi manatu i le faaaʻoaʻoga a Rose, o se teine logonoa i Vanuatu, o se motu i le Pasefika i Saute.

Na auai Rose i sauniga faa-Kerisiano a Molimau a Ieova ae e lē tele ni aogā na ia maua mai ai, talu ai e lē malamalama o ia po o se isi i le faapotopotoga i le gagana fai taga. Ina ua asiasi atu i le faapotopotoga se ulugalii e iai le tomai i le gagana fai taga ma iloa le faafitauli, na la amataina ai loa se vasega e aʻoaʻoina ai le gagana fai taga. Sa matuā lotofaafetai Rose. Na ia faapea mai: “Ua ou fiafia i le iai o ni aʻu uō e alolofa iā te aʻu.” O se faamanuiaga sili mo le ulugalii na fesoasoani iā Rose, le vaaia o lona lotofaafetai ma ua fai ni ona sao i sauniga. E matuā talisapaia foʻi e Rose taumafaiga a isi e aʻoaʻoina le gagana fai taga, ina ia mafai ai ona latou fesootaʻi.—Galuega 20:35.

“O lē e ofoina mai iā te aʻu [le Atua] le faafetai e fai ma ana taulaga, o ia lea e na te faamamaluina aʻu.”—Salamo 50:23.

MANATU O LE TUSI PAIA

E iai le sootaga o o tatou faalogona ma o tatou manatu. Na taʻua e le tusitala o le Tusi Paia o Tavita i lana tatalo i le Atua: ʻNa ou mafaufau loloto i au galuega uma lava; na ou naunau foʻi e mafaufau pea i galuega a ou aao.’ (Salamo 143:5) Na manatunatu loloto Tavita i mea na faia e le Atua mo ia. Na mafai ona ia faaalia le uiga lotofaafetai ona o lona mafaufau loloto e lē aunoa i ala o le Atua, o se masaniga sa ia atiaʻe i lona olaga atoa.—Salamo 71:5, 17.

Ua aumaia i le Tusi Paia le fautuaga lelei lenei: ʻO mea uma ua moni, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.’ (Filipi 4:8) O le faaupuga “ia faaauau ona manatunatu,” ua toe faamamafa mai ai le manaʻoga ina ia faaauau pea ona tatou manatunatu loloto, lea e fesoasoani iā i tatou ina ia atiaʻe le uiga lotofaafetai.

“O manatunatuga loloto o loʻu loto o le malamalama lea.”—Salamo 49:3.