LE MANATU O LE TUSI PAIA
Faatuatua
E faapea mai nisi o i latou o ni tagata lotu, peitaʻi e faigatā ona latou malamalama i le uiga o le “faatuatua.” O le ā le faatuatua? Aiseā e tāua ai?
O le ā le faatuatua?
TALA A NISI TAGATA E toʻatele tagata e manatu o se tasi e iai le faatuatua, o lona uiga o sē e taliaina se talitonuga e aunoa ma ni faamaoniga.
O se faataʻitaʻiga, seʻi manatu i se tagata lotu e faapea mai, “Ou te talitonu i le Atua.” Afai e fesiligia lenā tagata, “Aiseā e te talitonu ai i le Atua?” atonu e faapea mai, “O le auala lenā na ou ola aʻe ai” pe “O le auala lenā na aʻoaʻoina ai aʻu.” I tulaga faapea, e foliga mai e leai se eseesega tele o le iai o le faatuatua ma le vave ona talitonu i se manatu sesē.
LE MANATU O LE TUSI PAIA “O le faatuatua, o le faatalitali lea ma le mautinoa i mea ua faamoemoe i ai, o le faamaoniga manino lea o mea moni e ui ina e lē o vaaia.” (Eperu 11:1)
Ina ia faamautinoa faamoemoega o se tasi, e manaʻomia e lenā tagata ni māfuaaga maumaututū o na faamoemoega. Auā i le uluaʻi gagana, o le faaupuga ʻfaatalitali ma le mautinoa,’ e tele atu nisi mea e aofia ai nai lo o se faalogona po o se faamoemoega faivavale. O lea, o le faatuatua e aofia ai le mautinoa e faavae mai i ni faamaoniga maumaututū.
“O ona [le Atua] uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua.”—Roma 1:20.
Aiseā e tāua ai le iai o le faatuatua?
LE MANATU O LE TUSI PAIA “A aunoa ma le faatuatua e lē mafai ona faafiafiaina ai o ia, auā o lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.”—Eperu 11:6.
E pei ona taʻua, e toʻatele tagata e talitonu i le Atua ona sa aʻoaʻoina ai i latou. Atonu e latou te faapea mai ʻO le auala lenā na ou ola aʻe ai.’ Peitaʻi, e finagalo le Atua ia maua e i latou e tapuaʻi atu iā te ia, le mautinoa moni o loo soifua o ia ma e alofa mai. O se tasi lenā o māfuaaga ua faamatilatila ai i le Tusi Paia, e tatau ona tatou saʻili ma le filigā ina ia tatou iloa lelei o ia.
“Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.
E faapefea ona e maua le faatuatua?
LE MANATU O LE TUSI PAIA
Ua taʻua i le Roma 10:17, “E tupu le faatuatua i mea ua faalogo i ai.” O le laasaga muamua i le atiaʻeina o le faatuatua i le Atua, o le ʻfaalogo’ i aʻoaʻoga moni a le Tusi Paia e faatatau iā te ia. (2 Timoteo 3:16)O le suʻesuʻeina o le Tusi Paia o le a fesoasoani iā te oe e maua ai tali manino i fesili tāua e pei o nei: O ai le Atua? O ā faamaoniga e iloa ai e iai moni o ia? O le ā le finagalo o le Atua mo le lumanaʻi?
Ua siʻomia i tatou i faamaoniga e iloa ai e iai le Atua
E fiafia Molimau a Ieova e fesoasoani iā te oe e suʻesuʻe le Tusi Paia. E pei ona faailoa i la matou upega tafaʻilagi o le jw.org, “E fiafia Molimau a Ieova e aʻoaʻo tagata e faatatau i le Tusi Paia, ae matou te lē faamalosia se tasi e avea ma sui o la matou tapuaʻiga. Peitaʻi e matou te faailoa atu ma le faaaloalo aʻoaʻoga mai i le Tusi Paia ma amanaʻia le faitalia a le tagata lava ia i mea e talitonu ai.”
Ae o le manatu autū, e tatau ona faavae lou faatuatua i ni faamaoniga e te mātauina, a o e manatunatu i le moni o faamatalaga e te faitau ai i le Tusi Paia. O le faia faapea, ua e mulimuli ai i le faaaʻoaʻoga a tagata aʻoga o le uluaʻi senituri, o ē na “taliaina le upu ma le fiafia tele, ua latou matuā iloiloina Tusitusiga Paia i aso taʻitasi pe e moni nei mea.”—Galuega 17:11.
“O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.
E te Ono Fiafia Foʻi
TUSI MA POLOSIUA
O Fea e Tatou te Maua ai Tali o Fesili Tāua e Faatatau i le Olaga?
Pe e te filifilia le faasaienisi, faafilosofia po o le Tusi Paia?
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
UIGA O MAU
Le Uiga o le Eperu 11:1—“O le Faatuatua, o le Faalagolago Lea i Mea ua Faamoemoe i Ai”
O le ā le malosi o le faatuatua moni ma aiseā e tāua ai?
A'OA'OGA FAALE-TUSI PAIA
Pe e Iai se Suafa o le Atua?
E tele faalupega e ave i le Atua, e pei o le Silisili Ese, Alii, ma le Tupu o le vavau. Peitaʻi, e pe ā ma le 7,000 taimi o loo faaaogā ai le suafa patino o le Atua i le Tusi Paia.
