5 Po o le a Faaiʻuina ea Mafatiaga?
Le Māfuaaga e Tāua ai
Pe afai e iai se māfuaaga e talitonu ai o le a faaiʻuina mafatiaga, o lenā faamoemoe o le a faaleleia ai la tatou vaaiga i le olaga ma e faapena foʻi i le Atua.
Ia Mafaufau i ai
O le toʻatele o tagata e mananaʻo ia aveesea mafatiaga, ae e gata mai lo latou iloa e faia ai faapea. Mātau manatu o loo mulimuli mai:
E ui i le agaʻigaʻi i luma o le tomai faafomaʻi ae . . .
-
Ua avea le gasegase o le fatu ma māfuaaga autū o le oti.
-
I tausaga taʻitasi e faitau miliona i latou ua maliliu ona o le kanesa.
-
I le tusi Frontiers in Immunology na tusi ai Dr David Bloom e faapea: “O loo faaauau ona lē maua e le lalolagi se vaifofō i le faamataʻu mai o faamaʻi ua leva ona iai ma faamaʻi fou.”
E ui i le agaʻigaʻi i luma o le tamaoaiga i nisi atunuu ae . . .
-
E faitau miliona tamaiti e maliliu i tausaga taʻitasi ma o le toʻatele e nonofo i vaipanoa e matitiva.
-
E 4.5 piliona tagata o loo ola e aunoa ma ni nofoaga mamā.
-
E faitau selau miliona i latou e lē o maua ni vai mamā.
E ui i le faatupulaʻia o le amanaʻiaina o aiā tatau a tagata ae . . .
-
Na taʻua i le lipoti a le United Nation: O loo faaauau i le tele o atunuu le faatau atu faasolitulafono o tagata. E lē o faia e le malo ni moliaga iā i latou na, ona atonu o le “lē iloa o le faafitauli, po o le leai foʻi o se tomai e fesagaʻia ai.”
IA AʻOAʻO ATILI
Maimoa i le vitiō O le ā le Malo o le Atua? i le jw.org.
Manatu o le Tusi Paia
O loo manatu mamafa mai le Atua iā i tatou.
E silafia e ia o tatou tigā ma faanoanoaga.
“E lē inosia e ia [Atua] e lē ʻinoʻino foʻi i le tigā o lē ua puapuagatia; e na te lē natia ona fofoga mai iā te ia, ma e faafofoga mai foʻi o ia pe a ia tagi atu iā te ia mo se fesoasoani.”—SALAMO 22:24.
“Ia taʻu atu o outou popolega uma iā te ia, auā o loo manatu mamafa mai o ia iā te outou.”—1 PETERU 5:7.
E lē faaauau ai pea ona tatou mafatia.
Ua folafola mai i le Tusi Paia o le a faataunuu le fuafuaga a le Atua mo i tatou.
“E na te [Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”—FAAALIGA 21:3, 4.
O le a aveesea e le Atua le pogai o mafatiaga o tagata.
O le a ia faia faapea e ala i lona Malo lea o loo taʻua i le Tusi Paia o se faigāmalo moni.
“O le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. . . . E tumau lea malo e faavavau.”—TANIELU 2:44.