“E ui e lē o toe matuā faamalosia puipuiga mo le KOVITI-19 i le lalolagi aoao, ae e lē faapea ua tuuitiitia ai aafiaga o le KOVITI-19 i le soifua mālōlōina o tagata.. . . E mautinoa lava o le a oo mai i le lumanaʻi se isi ituaiga o faamaʻi e aafia ai le lalolagi aoao, ma e manaʻomia ai ona tatou nofosauni.”—Dr. Tedros Adhanom Ghebreyesus, faatonu sili o le Faalapotopotoga o Soifua Mālōlōina i le Lalolagi, Me 22, 2023.

 E toʻatele tagata o loo faaauau ona aafia i maʻi o le tino ma le mafaufau ona o le KOVITI-19. Po ua nofo tāpena faigāmalo ma faalapotopotoga tau soifua mālōlōina, mo se isi faamaʻi e aafia ai le lalolagi aoao? E ese mai i lenā, pe e mafai ona latou fesoasoani i o tatou faafitauli tau soifua mālōlōina o loo iai nei?

 O loo taʻua i le Tusi Paia o loo iai se faigāmalo o le a saunia mai le tausiga tau soifua mālōlōina o loo tatou manaʻomia. Ua taʻua i le Tanielu 2:44, ʻo le a faatūina e le Atua o le lagi o le malo,’ po o se pulega. I le pulega a lenā Malo, o le a “lē fai mai foʻi se tasi ua nofo ai: ʻOu te maʻi.’” (Isaia 33:24) O le a maua e tagata uma le soifua mālōlōina lelei, ma le malosi e pei o talavou.—Iopu 33:25.