Ua faapea mai Beth: “Na ou maua i le anemia a o oʻu talavou. Na ou vaivai i taimi uma, na vave ona ou lē lavā, tigā oʻu ponaivi, ma na faigatā ona ou uaʻi i se mea. Na aumai e le fomaʻi ni fualaau o loo iai le iron. Na ou inuina na fualaau ma ʻai i meaʻai na talafeagai mo aʻu. Na faasolosolo ona ou toe maua le malosi.”

 O le maʻi na feagai ma Beth o se maʻi e taatele. Ua taʻua e le Faalapotopotoga o le Soifua Mālōlōina i le lalolagi (WHO), e lua piliona tagata po o le 30 pasene o tagata uma i le lalolagi, o loo aafia i le anemia. I atunuu tau atiaʻe, i se fua faatatau e 50 pasene o tinā maʻitaga ma le 40 pasene o tamaiti i aʻoga faataʻitaʻi o loo aafia i le anemia.

 E ono tugā aafiaga o lenei maʻi. I nisi tulaga ogaoga, e ono iʻu atu i le maʻi fatu ma oo ai ina faalētonu le fatu. Ua faapea mai le WHO i nisi atunuu, o le anemia “o se tasi o māfuaaga o le maliliu o le 20 pasene o tinā maʻitaga po o failele.” O pepe e fananau mai i tinā e aafia i le anemia lea e laʻitiiti le iron i le tino (o le ituaiga anemia lea e pito sili ona taatele), e ono fananau mai ae e leʻi atoa le iva masina pe lāiti foʻi o latou tino. O nei fanau e ono tuai ona latou tuputupu aʻe ma maua foʻi i ni faamaʻi. Peitaʻi, o le anemia lea e māfua ona o le laʻitiiti o le iron, e mafai ona puipuia mai ai pe togafitia. a

O le ā le Anemia?

 O le anemia o se maʻi, e maua ai tagata e lē lava sela mūmū i le toto. E eseese mea e māfua ai le anemia. Ua maua i suʻesuʻega a saienitisi e silia ma le 400 ituaiga o anemia! E mafai ona avea o se maʻi tumau pe e lē umi foʻi ona maua ai. E mafai ona ogaoga ona āuga pe lē leaga tele foʻi.

O le ā e Māfua ai le Anemia?

 E tolu māfuaaga autū o le anemia:

•   O le tele o le toto e alu ese mai le tino o le faaitiitia foʻi lenā o sela mūmū o le toto.

•   E lē lava sela mūmū o le toto e faatupuina e le tino.

•   E faaleagaina e le tino sela mūmū o le toto.

 O le anemia lea e māfua ona o le laʻitiiti o le iron, o le ituaiga anemia lea e pito sili ona taatele. Pe a lē lava le iron i le tino e lē lava foʻi le hemoglobin, o le vaega lea o loo i totonu o sela mūmū o le toto lea e mafai ona feaveaʻia le okesene.

O ā Āuga o Lenei Ituaiga o Anemia?

 I le amataga, atonu e lē lagonaina e i latou ua aafia i le anemia ona āuga. E ui e eseese āuga, ae e aofia ai āuga nei:

•   Matuā lē lavā

•   Afu mālūlū lima ma vae

•   Vaivai le tino

•   Paʻepaʻe atoa le tino

•   Tigā ma niniva le ulu

•   Tigā le fatafata, tātāvale le fatu, tau lē mafai ona mānava

•   Faigofie ona gaui atigilima ma atigivae

•   Ua lē lagona se fia ʻai, aemaise i pepe ma tamaiti

•   Fia ʻai ʻaisa (e faasino atu i le vai ua faamalō), masoā, po o le palapala

O ai Tagata e Faigofie Ona Aafia?

 E faigofie ona aafia tamaʻitaʻi i le anemia e māfua i le laʻitiiti o le iron i le tino, ona o le palapala e alu ese i le taimi o le maʻi masina. E aafia foʻi tinā maʻitaga pe afai e lē lava le folate ma vitamin B i a latou meaʻai.

 O pepe e fananau mai ae leʻi atoa le iva masina pe laʻitiiti foʻi le tino o ē e lē lava le iron e maua mai i le suāsusu o latou tinā po o le susu pauta.

 O tamaiti e lē aai i meaʻai paleni.

 O tagata e lē aai i aano o manu fasi e ono lē lava le iron i meaʻai e latou te taumamafa ai.

 O ē e iai maʻi tumau e pei o se faamaʻi e aafia ai le toto, kanesa, faalētonu fatugaʻo, papala o le tino ma isi ituaiga o maʻi.

Le Auala e Togafitia ai le Anemia

 E lē o ituaiga anemia uma e mafai ona puipuia mai ai pe togafitia. Ae o le anemia e māfua ona o le lē lava o le iron po o le vaitamini e masani lava e mafai ona puipuia mai ai pe togafitia, e ala i le taumafa i meaʻai o loo iai vaega nei:

 Iron. E maua i aano o manu fasi, pi, ma fualaau faisua e lanu meamata malosi ona lau e pei o le broccoli, ma le laupele. b Ua iloa mai suʻesuʻega o le faaaogā o ulo po o falai e faia mai i le uʻamea e kuka ai meaʻai e mafai ona faateleina ai le iron i meaʻai.

 Folate. E maua i fualaau ʻaina, fualaau faisua e lanu meamata malosi ona lau, pi, sisi, fuāmoa, iʻa, ma pinati. E maua foʻi i meaʻai e faia mai i le saito e pei o falaoa, cereal, pasta, ma le araisa. E taitutusa le folate ma le folic acid.

 Vitamin B-12. E maua i aano o manu fasi, meaʻai e gaosia mai i le susu, o cereal ua faaopoopo i ai vaitamini, ma meaʻai e gaosia mai i le fatu o le soy.

 Vitamin C. E maua i fualaau ʻaina e pei o le tipolo, moli ma le meleni, ma fualaau faisua o le pepa ma le tamato. E fesoasoani meaʻai o loo iai le vaitamini lenei, e maua ai e le tino le iron.

 E eseese meaʻai e maua i vaipanoa eseese. O lea, ia faamasani i meaʻai e maua i lou vaipanoa o loo iai vaega ua taʻua i luga. E tāua tele lenei vala mo fafine, aemaise pe afai o loo e maʻitaga pe o loo fuafua foʻi e fai se pepe. O le tausia lelei o lou soifua mālōlōina, o le faaitiitia foʻi lenā o le avanoa e ono maua ai lau pepe i le anemia. c