IA FAAAUAU ONA MATAALA!
O Āfea o le a Faamutaina ai Fetauaʻiga?—O le ā le Manatu o le Tusi Paia?
E tusa ai o le osofaʻiga a Iran iā Isaraelu i le Aso Toonaʻi, 13 o Aperila 2024, na taʻua ai e le Failautusi Sili o Malo Aufaatasi, o António Guterres, “O le taimi lenei e tutū faatasi ai ma faaitiitia fetauaʻiga. O le taimi foʻi lenei e tatau ona pulea ai a tatou gaoioiga.”
O fetauaʻiga i Sasaʻe Tutotonu, o se tasi lea o faataʻitaʻiga o mea o loo tutupu i le lalolagi aoao.
“Ua sili atu ona tele fetauaʻiga i le taimi lenei, talu mai le taimi o le Taua lona Lua a le Lalolagi, ma e pe a ma le 2 piliona tagata ua aafia ai.”—Fono Tau Puipuiga a Malo Aufaatasi, Ianuari 26, 2023.
O vaipanoa o loo aafia i fetauaʻiga e aofia ai Isaraelu, Kasa, Suria, Azerbaijan, Ukraine, Sudan, Aitiope, Niger, Myanmar, ma Haiti. a
O āfea o le a faamutaina ai fetauaʻiga? Pe e mafai e taʻitaʻi o malo ona aumaia le filemu? O le ā le manatu o le Tusi Paia?
O se lalolagi o loo fetauaʻi
O taua o loo tutupu i le lalolagi i aso nei, ua faailoa mai ai ua toeitiiti ona faamutaina lea o fetauaʻiga uma. O nei taua ua faataunuuina ai valoaga i le Tusi Paia, e faatatau i le vaitaimi o loo tatou ola ai, lea e taʻua o “le taufaaiʻuiʻuga o le faiga o mea a le lalolagi.”—Mataio 24:3.
“O le a tou faalogo i taua ma tala o taua. . . . O le a siitaua atu isi atunuu i isi atunuu, ma isi malo i isi malo.”—Mataio 24:6, 7.
Ina ia iloa le auala o loo faataunuuina ai e taua o loo tutupu i aso nei valoaga i le Tusi Paia, ia faitau i le mataupu, “O le ā le Faailoga o “Aso e Gata ai,” po o le Taimi o “le Iʻuga”?”
O se taua e faamuta ai taua uma
O loo valoia i le Tusi Paia o le a faamutaina taua uma. O le a faapefea ona tupu lenā mea? E lē mafai e taumafaiga a tagata ona faamutaina taua uma, ae o le a faataunuuina lenā mea e ala iā Amaketo, “le taua o le aso tele o le Atua o Lē e ona le malosi uma lava.” (Faaaliga 16:14, 16) Pe a maeʻa lenā taua, o le a faataunuuina loa e le Atua lana folafolaga ia maua e tagata le filemu e faavavau.—Salamo 37:10, 11, 29.
Ina ia aʻoaʻo atili e faatatau i le taua a le Atua lea o le a faamutaina ai taua uma, faitau i le mataupu “O le ā le Taua o Amaketo?”
a ACLED Conflict Index, “Ranking violent conflict levels across the world,” Ianuari 2024