O le paseka o se tausamiga a tagata Iutaia na faamanatu ai le faasaʻolotoina e le Atua o tagata Isaraelu i le 1513 T.L.M., mai i le nofo pologa i Aikupito. Na faatonuina e le Atua tagata Isaraelu, ina ia faamanatu i tausaga taʻitasi lenei sauniga faapitoa i le aso 14 i le masina faa-Iutaia o Apipa, lea na faaigoa mulimuli ane iā Nisani.​—Esoto 12:42; Levitiko 23:5.

Aiseā na faaigoa ai o le Paseka?

 O le upu “Paseka” e faasino atu i le taimi na faasao ai e le Atua tagata Isaraelu mai i se mala na fasiotia uma ai ulumatua a Aikupito. (Esoto 12:27; 13:15) A o leʻi faaoo e Ieova lenei mala mataʻutia, na ia faatonuina tagata Isaraelu e fasi se tamaʻi mamoe po o se tamaʻi ʻoti ma sausau ai faitotoʻa o latou fale i lona toto. (Esoto 12:21, 22, faaopoopoga pito i lalo) Pe a silasila le Atua i lenā faailoga, o le a ia “sopoloa” pe pasia o latou fale ma faasaoina ai a latou ulumatua.​—Esoto 12:​7, 13.

Na faapefea ona faamanatu le Paseka i taimi o le Tusi Paia?

 Na avatu e le Atua faatonuga i tagata Isaraelu i le auala e faamanatu ai le Paseka muamua. a O loo aofia i mea o loo mulimuli mai nisi o mea na fai e faamanatu ai le Paseka.

•   Taulaga: Na filifili e aiga se mamoe po o se ʻoti e tasi le tausaga le matua i le aso 10 o Apipa (Nisani), ma o le aso 14 na latou fasia ai. I le Paseka muamua, na sausau e tagata Iutaia le toto o le manu i pou e lua o le faitotoʻa, ma le pou faalava i luga o le faitotoʻa, ma na latou tunuina i le afi le manu atoa ma latou aai ai.​—Esoto 12:​3-9.

•   Meaʻai: E lē gata na ʻaai tagata Isaraelu i le manu na tunu, ae na latou ʻaai foʻi i falaoa e lē faafefeteina ma fualaau ʻaina oona i le tausamiga mo le paseka.​—Esoto 12:8.

•   Tausamiga: Na faamanatu e tagata Isaraelu le tausamiga o falaoa e lē faafefeteina mo aso e 7 pe a uma le Paseka. I lenā taimi atoa, e latou te lē toe aai ai i ni falaoa faafefeteina.​—Esoto 12:17-​20; 2 Nofoaiga a Tupu 30:21.

•   Aʻoaʻoga: Na faaaogā e mātua Isaraelu le taimi o le Paseka e aʻoaʻo ai a latou fanau e faatatau iā Ieova le Atua.​—Esoto 12:25-27.

•   Faigāmalaga: Mulimuli ane, na malaga atu tagata Isaraelu i Ierusalema e faamanatu ai le Paseka.​—Teuteronome 16:​5-7; Luka 2:​41.

•   Isi tū ma aga: I taimi o Iesu, na faaaofia ai uaina ma pesepesega i le faamanatuina o le Paseka.​—Mataio 26:19, 30; Luka 22:15-​18.

Manatu sesē e faatatau i le Paseka

 Manatu sesē: E tatau ona faamanatu e Kerisiano le Paseka.

 Mea moni: Ina ua uma ona faamanatuina e Iesu le Paseka iā Nisani 14 i le 33 T.A., na ia faavaeina ai se faamanatuga fou: o le Talisuaga Afiafi a le Alii. (Luka 22:19, 20; 1 Korinito 11:20) Ua sui tulaga lenei faamanatuga fou i le Paseka ona ua faamanatu ai le taulaga a “Keriso o la tatou Paseka.” (1 Korinito 5:7) E sili atu le tāua o le taulaga togiola a Iesu nai lo o le Paseka, ona ua faasaʻoloto mai ai tagata uma i le avea ma pologa a le agasala ma le oti.​—Mataio 20:28; Eperu 9:​15.