“Aua neʻi o tatou fiu e faia le mea lelei, auā e iai le taimi e tatou te selesele mai ai, pe a tatou lē faavaivai.”—Kalatia 6:9, Faaliliuga a le Lalolagi Fou.

 “Aua neʻi tatou faapalapala i le amio lelei; auā o ona pō e tatau ai tatou te selesele mai ai, pe afai tatou te lē faavaivai.”—Kalatia 6:9, Tusi Paia Samoa—Lomiga 1969.

 Na faalaeiau atu Paulo i Kerisiano, ina ia ʻaua neʻi fiu e fai le mea lelei e tusa ai ma le silafaga a le Atua. O le faia faapea, o le a latou mautinoa ai, e tauia i latou e le Atua.

 “Aua neʻi o tatou fiu.” O lenei faaupuga, e mafai ona uiga atu i le, “ʻaua neʻi o tatou faapalapala.” I le uluaʻi gagana, e ono uiga atu foʻi lenei faaupuga i le lē lotovaivai, po o le lē mou atu o le maelega. O le faaaofia ai e Paulo o ia lava i nei upu, na ia faailoa mai ai, na iai foʻi taimi na tauivi ai ma le lotovaivai.—Roma 7:21-24.

 O “le mea lelei” e aofia ai mea uma e tatau ona faia e se Kerisiano e auauna ai i le Atua. E aofia ai foʻi galuega e faia e se tasi, ina ia fesoasoani ai i ona uso talitonu, ma isi.—Kalatia 6:10.

 “E iai le taimi e tatou te selesele mai ai, pe a tatou lē faavaivai.” Na faamanatu atu e Paulo i lana ʻaufaalogologo, e ono umi se taimi faatoʻā latou tofo i aogā o le faia o le mea lelei, e pei lava ona umi o se taimi e faatalitali ai se faifaatoʻaga ina ia ola lana faatoʻaga. O le taʻua e Paulo o le selesele, na ia faasino atu ai i le upu moni tāua o loo i le fuaiupu e 7: “O le mea e lūlūina e le tagata, o le mea lava lea e na te seleseleina mai.” I se isi faaupuga, pe a faia e se Kerisiano le mea lelei i le silafaga a le Atua, o le a ia selesele mai ai se taui tele, e aofia ai le ola e faavavau.—Roma 2:6, 7; Kalatia 6:8.

 Na tusia e le aposetolo o Paulo lenei tusi i Kerisiano na nonofo i Kalatia i le pe ā o le 50-52 T.A. Na ia tusia lenei tusi ina ia puipuia ai Kerisiano mai i aafiaga leaga o i latou na faapea mai o ni Kerisiano, ae na latou faauigasesē le upu moni e faatatau iā Iesu. (Kalatia 1:6, 7) Na finau mai nei aʻoaʻo pepelo, e tatau i Kerisiano ona usitaʻi i le Tulafono a le Atua na tuu atu i le nuu o Isaraelu anamua e ala iā Mose. (Kalatia 2:15, 16) Na faamatala mai e Paulo, ua uma ona faataunuuina le fuafuaga mo le Tulafono, ma ua lē toe manaʻomia ona tausia e Kerisiano.—Roma 10:4; Kalatia 3:23-25.

 Ina ua faaleiau e Paulo Kerisiano ina ia faaauau pea ona “faia le mea lelei,” e leʻi uiga atu o ia i le usitaʻia o le Tulafono a Mose. Ae na ia faalaeiauina i latou ina ia ʻfaataunuu le tulafono a le Keriso,’ lea e aofia ai mea uma na aʻoaʻo e Iesu e faatatau i le faia o mea lelei i isi.—Kalatia 6:2; Mataio 7:12; Ioane 13:34.

 Ia matamata i lenei vitiō puupuu o loo aumaia ai se aotelega o le tusi o Kalatia.