E ono faigatā ona taulima e se ulugalii faaipoipo le eseese o mea e fiafia i ai, o a la masaniga ma o la uiga. Peitaʻi e iai faafitauli e pei ona taʻua i lalo, e matuā faigatā atu ona taulima:

•   O le ā le tele o le taimi e faaalu ma tauaiga?

•   O le ā le auala e faaaogā ai tupe?

•   Pe e tatau ona fai se fanau?

 O le ā e mafai ona e faia pe a feteenaʻi ou manatu ma manatu o lau paaga faaipoipo?

•  Mea e tatau ona e iloa

•  Mea e mafai ona e faia

 O le tutusa o mea e fiafia faatasi i ai e lē faapea ai o le ā tutusa o oulua manatu. E oo lava i se tane ma se avā e toetoe tutusa mea uma e fiafia i ai, ae e lē o mea uma e tutusa ai o la manatu, aemaise lava i mea e sili ona tāua.

 “Na ou ola aʻe i se aiga e fiafia e faifaimea faatasi. I faaiʻuga o vaiaso, e matou te faifaimea faatasi ma mātua o oʻu mātua, uso ma tuafāfine o loʻu tamā, tuagane ma uso o loʻu tinā ma oʻu tausoga. Ae e lē faapena le aiga o laʻu tane. O lea e eseese ai o ma manatu i le tele o le taimi e tatau ona ma faaaluina i o ma aiga po o le taimi e talanoa ai i o ma aiga e nonofo mamao.”—Tamara.

 “Na ma feola aʻe ma laʻu avā i ni aiga e eseese auala e tatau ona faaaogā ai tupe. I nai masina talu ona uma le ma faaipoipoga, na tele taimi na ma finau ai i le auala e faaalu ai tupe. Na faato‘ā mafai ona foʻia le faafitauli ina ua tele taimi na ma talanoa ai e faatatau i lenā mataupu.”—Tyler.

 O nisi faafitauli e lē mafai ona fo‘ia i le na ona malilie faatasi i se mea. O se faataʻitaʻiga, pe a maʻi le tinā po o le tamā o le isi paaga ma ua manaʻomia se isi e tausia. Po ua manaʻo foʻi le isi paaga e fai se fanau ae e lē manaʻo iai le isi. a

 “Na tele ina ma talanoa ma laʻu avā pe e tatau ona fai se ma fanau. Ua alu i ai le mafaufau o laʻu avā i le tele o taimi ma ua matuā eseese ai lava o ma manatu. Ou te lē lolo atu i manatu o laʻu avā.”—Alex.

 O le eseese o manatu e lē faapea ai o le a lē taulau le lua faaipoipoga. Ua fai mai nisi o tagata tomai i mea tau faaipoipoga, pe afai e eseese lua manatu ma lau paaga i se mataupu tāua, e tatau ona e faia so o se mea lava e te mafaia, ina ia fai lou manaʻo e tusa lava pe malepe ai le lua faaipoipoga. Peitaʻi o lenā auala o le a soona faatāua ai ou faalogona nai lo o le tautoga na e faia i luma o le Atua, o le a e pipii i lau paaga faaipoipo e tusa lava po o le ā le mea e tupu.

 Ia maumauaʻi e faamamaluina la oulua tautoga o le faaipoipoga. O lenā faavae o le a mafai ai ona oulua taulimaina le mataupu o ni ē e aufaatasi ae lē o ni fili.

 Mataupu silisili o le Tusi Paia: “O ē ua faatasia e le Atua, aua ne‘i tuueseeseina e se tagata.”—Mataio 19:6.

 Iloa mea e aafia ai. O se faataʻitaʻiga, o le isi paaga e manaʻo e fai se fanau ae e lē manaʻo ai le isi. E tele mea tāua e mafai ona iloiloina, e aofia ai:

•   Le malosi o la oulua faiā.

   Pe e mafai ona oulua tauaveina se isi tiute tauave o le tausia aʻe o se tamaitiiti?

•   O tiute tauave o le avea ma mātua.

   E tele atu mea e aofia ai i le avea ma mātua nai lo o le saunia o meaʻai, lavalava ma fale.

•   Tulaga tau tamaoaiga.

   Pe e mafai e lo oulua tulaga tau tamaoaiga, ona paleni ai le taimi e te faigaluega ai, faaalu mo le aiga ma faia ai isi tiute tauave?

 Mataupu silisili o le Tusi Paia: “O ai fo‘i se tasi o outou e mana‘o e fau se ‘olo, e lē muamua ea ona nofo i lalo ma faitau tupe o le a faaalu, ina ia iloa ai po ua lava mea e faauma ai?”—Luka 14:28.

 Iloilo vala uma o le mataupu. Atonu o le a mafai ona oulua foʻia nisi vala o le faafitauli. O se faaaʻoaʻoga, pe afai o le mataupu o le faia o se fanau. E tatau ona fesili ifo le paaga e lē o manaʻo e fai se fanau:

•   ‘Po ou te lē manaʻo e fai se fanau i loʻu olaga atoa pe na o le taimi lenei?’

•   ‘Po o oʻu faatalatū ona ou te lē o mautinoa po o le a avea aʻu ma se matua lelei?’

•   ‘Po ou te popole ona o le a lē toe ano mai ai laʻu paaga iā te aʻu?’

 Ae e mafai foʻi ona fesili ifo le paaga o loo manaʻo e fai se fanau i fesili nei:

•   ‘Po ua ta sauni e fai tiute tauave o ni mātua?’

•   ‘Po o lava tupe e tausia aʻe ai se tamaitiiti?’

 Mataupu silisili o le Tusi Paia: “O le atamai mai i lugā e . . . magafagafa.”—Iakopo 3:17.

 Ia iloa le tāua o manatu o lau paaga. E mafai e ni tagata se toʻalua ona vaai i se vaaiga se tasi ae e eseese auala e la te vāai i ai. I se tulaga talitutusa, e aafia uma se ulugalii i se mataupu ae e eseese uma auala e tāua ai o la manatu e faatatau i lenā mataupu; o se faaaʻoaʻoga, o le auala e faaalu ai tupe. Nai lo o le talanoaina o vala e eseese ai o oulua manatu, e lelei pe a amata le talanoaga i vala e tutusa ai o oulua manatu.

•   O ā sini e te lua ioe faatasi i ai?

•   O ā mea e lelei uma ai o la manatu?

•   Ina ia faatumauina le faaipoipoga, pe e mafai ona fetuuna‘i le manatu o le isi po o lua manatu uma ina ia maua ai se manatu se tasi e fiafia uma i ai?

 Mataupu silisili o le Tusi Paia: “Aua ne‘i sa‘ilia e se tasi lona lava lelei, a ia faaauau ona sa‘ili le lelei o isi.”—1 Korinito 10:24.