Yihowa Farciˈraasine olaho gaaddannokki korkaati aane nooho:

1.   Maganoho hajajantanno daafira. Qullaawu Maxaafi Maganu manni “bisensa maarashaho” soorrannotanna ‘olaho qixxaawannokkita’ kulanno.—Isayaasi 2:4.

2.   Yesuusira hajajantanno daafira. Yesuusi soqqamaasincho Pheexiroosi togo yiino: “Bise fushshidhannori bisetenni reyitannona bisekki kou giddora qoli!” (Maatewoosi 26:52) Konni garinni Yesuusi iso harunsitannori olaho fultannokkita buuxisino.

    Yesuusa harunsitannori ‘tenne gobbare (alamere) ikkitinokkita’ leellishate poletiku coyiwiinni xeertidhanno. (Yohaannisi 17:16) Insa gobbate olanto assitannore gibbe difinqiltanno woy olantote giddo eˈe soqqama hasidhannore hoolate diwoˈnaaltanno.

3.   Manna baxxanno daafira. Yesuusi rosaanosi “Kiˈne kiˈneneewa baxamme!” yee hajajino. (Yohaannisi 13:34, 35) Konni daafira alamete deerrinni mitto ikkinoha roduuwu maamara kalaqiˈra dandiitanno; konni maamari giddo mittuno rodoosi qasate olaho difulanno.—1 Yohaannisi 3:10-12.

4.   Hundi Kiristaani faale hadhanno daafira. Insayikilopiidiya ofi Riliijini endi Woori yinanni maxaafi togo yaanno: “Hunditi Yesuusi rosaano olamanna olantote giddo eˈˈe soqqama gibbino”; korkaatuno togoo assooti “Yesuusi uyinohu baxillu seerinna diinnansa baxxanno gede uyinonsa hajajo ledo sumuu yaannokkita” huwattino. Qoleno Jarmanete gobbahu ammaˈnote fullahaanchi Piteri Miniholti hundi Kiristaanire kulanni, “Hakkawaro Kiristaana ikkine heeˈnenni olamaancho ikka xaadannokki coyeeti” yiino.

 Yihowa Farciˈraasine dagooma lowore kaaˈlitanno; qoleno heedhanno gobba hobbaate hunannore mittoreno diassitanno. Aante noote Qullaawu Maxaafi hajajo garinni, gashshoote ayirrinseemmo:

•   “Mannu baalu aleenni noo gashshaanora hajajama hasiissanno.”—Roomu Sokka 13:1.

•   “Qeesaariha Qeesaarira, Maganunniha Maganoho uuyye!”—Maatewoosi 22:21.

 Konni daafira, gobbate seera ayirrinseemmo, giwire baanteemmo, hattono gashshootu mannu keere eˈˈe fulanno gede assate sharramanno sharrora buusammeemmo.