Yihowa Farciˈraasine uminsatano ikko wolu manni maate dhaawate sharrantanno. Maate xintinoha Magano ayirrinseemmo. (Kalaqama 2:21-24; Efesooni Sokka 3:14, 15) Isi Qullaawu Maxaafi giddo kulino seeri, alamete doyichora heeˈranno manni maate kaajjanna hagiirru noota ikkitanno gede kaaˈlino.

 Qullaawu Maxaafi amaale harunsate dandiinummore baala assineemmo; tini amaale dancha minaannuwa, minaamuwa, hattono dancha annanna ama ikkineemmo gede kaaˈlitannonke. (Lawishsha 31:10-31; Efesooni Sokka 5:22–6:4; 1 Ximootewoosi 5:8) Qullaawu Maxaafi amaale, babbaxxitino ammaˈno harunsanno manni heeˈranno maate nafa kaaˈlitanno. (1 Pheexiroosi 3:1, 2) Hanni Yihowa Farciˈraasincho ikkino minaanni woy minaama noonsari Yihowa Farciˈraasine ikkitinokkiri coyidhinore laˈno.

•   “Adhammummohunni kayinse lewu diri geeshsha yekkeerammanninna giwammanni keeshshinoommo. Iveeti Yihowa Farciˈraasincho ikkitu kawa kayi, roore baxillaanchonna cinca ikkitino. Ise hattoota ikkase adhamanke diigantannokki gede assitino.” ​—Kilawuri, Biraazile.

•   “Yihowa farciˈraasine maate diiggannoreeti yee hedoomma daafira, minaanniˈya Chaansa insa ledo Qullaawa Maxaafa xiinxalla hanafi woyite dibaxisiˈroomma. Kayinni hatte yannanni kayise, Qullaawu Maxaafi maatenke kaaˈlino yaa dandeemma.”​—Aginesi, Zaambiya.

 Soqqammeemmo woyite mannu Qullaawu Maxaafi amaale harunsansa kaaˈlitannonsahu hiittoonniitiro kulleemmonsa; lawishshaho,

•   Galte hayyotenni doodhate daafira

•   Adhammoonnihu umi diro hagiirraamma ikkate daafira

•   Balluwu ledo dancha aante heedhannonke gede assiˈrate daafira

•   Woxe amaxxate daafira

•   Giwama agurate daafira

•   Gatona yaate daafira

•   Ooso qajeelsiˈrate daafira

 Assitara dandiitanno. Lawishshaho, 1998nni Sofireesi yinanni dirijjite xiinxallitino xiinxallo, mini giddo minaanni woy minaama calla Yihowa Farciˈraasincho ikkitino daafira, 20 maate giddo mittete qarru kalaqaminota leellishshino.

 Yesuusi isi rosiisino roso harunsanno manchira maatesi giddo qarru kalaqamara dandaannota balaxe coyiˈrino. (Maatewoosi 10:32-​36) Wiili Duraanti yinannihu xaggete borreessaanchi, Roomu Gashshooti giddo “Kiristaana maate diiggannoreeti yine kassansoonninsata” a xawisino; xaa yannarano mite Yihowa Farciˈraasine hatto yine kassansoonni. Ikkina Yihowa Farciˈraasine maate diiggannoni?

 Awuroppunnihu Kalaqamu Qoosso Yoo Mini Yihowa Farciˈraasine maate diigganno yine kassansoonni hajo laˈˈanni yiinonte gede, Yihowa Farciˈraasincho ikkinokkihu maatete miili, Yihowa Farciˈraasincho ikkinohu maatete miilita “ammaˈnote qoosso ayirrisa” giwe qarru kalaqamanno gede assanno. Yoote mini lede togo yiino: “Togoo qarri kalaqamannohu babbaxxitino ammaˈno harunsitanno maate baalate giddooti ikkinnina Yihowa Farciˈraasinera calla diˈˈikkino.” b Ammaˈnonsanni kainohunni togoo qarri iillinsaro nafa Yihowa Farciˈraasine togo yitannota Qullaawu Maxaafi amaale harunsate sharrantanno: “Busha assinohehura busha assite qoltooti. . . . Dandiitiniha ikkiro, kiˈne widiidita mannu baalu ledo keere heedhe.”​—Roomu Sokka 12:17, 18.

 Yihowa Farciˈraasine Qullaawu Maxaafi ‘ammaninohu’ ledo calla adhamme yee amaalanno amaale harunsitanno daafira, Yihowa Farciˈraasincho ikkinohu ledo calla adhantanno. (1 Qorontoosi 7:​39) Tini Qullaawu Maxaafi hajajooti, qoleno kaaˈlitannote. Mitte metseetera (Journal of Marriage and Family) 2010 fulino birxichira noo hedo kultannonte gede, “mittu gari ammaˈnonna rosichi noonsa minaanninna minaamara” duucha woyite dancha aante heedhannonsa. c

 Ikkollana ninke, Yihowa Farciˈraasincho ikkinokki minaanna woy minama afidhinori galtensawiinni baxxitanno gede dijawaachinsheemmo. Qullaawu Maxaafi togo yaanno: “Mittu ammanaanchira ammantinokki galte heedhusiro, iseno ledosi heeˈra baxxuro, fushshe haˈrisoonkese. Ammanaanchote ammaninokki minaanni heeˈrisero, isi ledose heeˈra baxiro, iseno iso agurtoonke.” (1 Qorontoosi 7:12, 13) Yihowa Farciˈraasine tenne hajajo seekkite harunsitanno.