Ee, yaanno. Qullaawu Maxaafi sayinsete maxaafa ikka hoogirono sayinsete daafira kulannori halaaleho. Qullaawu Maxaafi yaannori sayinsete ledo sumuu yaannota, hattono Qullaawa Maxaafa borreessini waro noohu batinyu manni huwatinokkiha sayinsete coye kulannota leellishshannota mite taje laˈno.

•   Kalqete alame hanafo noote. (Kalaqama 1:1) Hunditi batinye afuu xagge kayinni, kalqete alame kalaqantinota ikkitukkinni billaalle noorilla gamba gamba yee ikkinoreeti yitanno. Baabiloonete daga, kalqete alame iltinori lame wuqiyanoose giddonni daggino magannaati yite ammantanno. Wole afuu xagge kayinni, kalqete alame mittu babaru quuphichi giddonni fultino yitanno.

•   Kalqete alame galtannohu kalaqamu seerinniiti ikkinnina maganna baxxuta assidhannota diˈˈikkitino. (Iyyoobi 38:33; Ermiyaasi 33:25) Alamete doyichora kullanniti addi additi afuu xagge, maganna manna hedeweelcho gawajjitanno; mito woyite isinni mararro nookkiha beebba assidhara dandiitanno yitanno.

•   Baatto mulla darga rarraˈino. (Iyyoobi 26:7) Biˈreehu batinyu manni, baatto itiillete gede diriirtinote hattono mittu jawu kalaqami lawishshaho gaasho woy qucu duheenna no yee ammananno.

•   Wuqiyaanoosetenninna wole buˈanni wayi foorarihu gedensaanni xeenanna kaade ikke wirro dirranno; hakkiinni lagganna xashshuwa eanno. (Iyyoobi 36:27, 28; Rosiisaancho 1:7; Isayaasi 55:10; Amootsi 9:6) Hunditi Giriikete daga, lagga eanno wayi fulannohu baattote woroonni noo wuqiyaanoosenniiti yee ammananno; mannu tenne hedo 18^ki sani geeshsha ammane keeshshino.

•   Ilaallanna xeichuwa kalaqantinohu baattote ofolla gari heeshshinna gotti yaanno woyiteeti; qoleno xaa yannara noo ilaalla hundi waro wuqiyaanoosete woroonni noote. (Faarso 104:6, 8) Addi additi afuu xagge kayinni, ilaalla xa noo garinni kalaqqinori magannate yitanno.

•   Bisu keeraanchimma agadha fayyimmate kaaˈlitanno. Hundi Israeelera uyinoonni Seeri reeshsha kisino manchi anga hayishshiˈra, taraawanno dhibbi amadino mancho mannuwiinni bada, hattono lowo shumara ofolliniro bushsha umme diwa hasiissannota kulanno. (Leewaawoota 11:28; 13:1-5; Marro 23:13) Ikkollana tenne hajajo uyini waro noohu Gibitsete manni, lowo shuma ledo karsiinse qixxeessinoonnire xaggate yee madate gaˈnanno.

 Qullaawu Maxaafi yaannore seekkine xiinxallinummoro, sayinsete ledo sumuu yitannokki hedo nookkita wodanchineemmo. Mitootu Qullaawu Maxaafi yaannori sayinsete ledo sumuu diyaanno yitannohu soˈrote hedo noonsa daafiraati; hanni tenne soˈrote hedo giddo mite laˈno:

 Soˈrote hedo: Qullaawu Maxaafi kalqete alame 24 saate afiˈrinohu lewu barri giddo kalaqantino yaanno.

 Halaale: Qullaawu Maxaafi, Maganu kalqete alame kalaqinohu kalaqote barri hanafara albaanni ikkinota kulanno; yanna kayinni bade dikulanno. (Kalaqama 1:1) Qoleno, Kalaqama fooliishsho mittete kulloonniti kalaqote barruwa, kiiro bande kulloonnikkite lowo dirraati. Isinni, Qullaawu Maxaafi baattonna gordu kalaqamino yanna xaphoomunni mitto “barra” ikkitinota kulanno.—Kalaqama 2:4, Haaro Alame Tiro.

 Soˈrote hedo: Qullaawu Maxaafi muˈro kalaqantinohu, sagalese qixxeessidhanno gede kaaˈlitannoti arrishsho kalaqantukkinniiti yaanno.—Kalaqama 1:11, 16.

 Halaale: Qullaawu Maxaafi, muˈro kalaqantara albaanni beeddahe woˈmitino ‘gordi’ kalaqaminota kulanno; beeddahete giddo mitte arrishshote. (Kalaqama 1:1) Kalaqonnihu umi “barra” woy dirra giddo arrishshote caangi uullara iillino. Uulla gaangeessitino ayyare roore xabbanni hadhuta, kalaqonnihu sayikki “barra” tenne ayyare lulluqqe dayinohu arrishshote xawaabbi muˈro sagale qixxeessidhanno gede assa dandaanno geeshshi wolqa afiˈrinoho. (Kalaqama 1:3-5, 12, 13) Arrishsho baattote aana xabbe leella hanaffinohu kayinni hakkunni gedensaanniiti.—Kalaqama 1:16.

 Soˈrote hedo: Qullaawu Maxaafi arrishsho baatto doyitanno yaanno.

 Halaale: Rosiisaancho 1:5 togo yitanno: “Arrishsho fulte eˈanno; fultinowa higate muddantanno.” Ikkollana tini yaatto, uullate aana heeˈre laˈˈanno manchira arrishsho millissannoha lawannositalla kultannote. Xaa yannara nafa, baatto arrishshote gaangaawira doyitannota anfoommoha ikkirono, “arrishsho eˈu” woy “arrishsho fultu” yineemmo.

 Soˈrote hedo: Qullaawu Maxaafi baatto itiillete gede diriirtinote yaanno.

 Halaale: Qullaawu Maxaafi giddo “gobbate qacce geeshsha” yitanno yaatto, baatto itiillete gede diriirtinota woy qacce noota ikkitinota kultannota diˈˈikkitino; hatteentenni tini yaatto uullate aana xeertote noo bayicho kultannote. (Soqqamaasinete Looso 1:8) Hatteente gede, “shoolente maddenni” yitanno yaatto uulla woˈma kultannote lawishshu yaattooti.—Isayaasi 11:12; Luqaasi 13:29.

 Soˈrote hedo: Qullaawu Maxaafi mittu qumqumadu coyi doyicho (baqo) jilba mageeshshitero anfannihu doyichote mereeroho noo seendille (diyameetire) sasunni batinseeti yaanno; kayi doyichonniha gara ikkino bikka anfannihu diyameetire 3.1416nni (π) batinseeti.

 Halaale: Umi Mootoolla 7:23 nna 2 Duduwo 4:2te aana, “qunqumado Baaraho yinanni gawate” halaˈlinye 10 cigile ikkitinotanna baqo kayinni 30 cigile ikkitinota kulloonni. Tenne kiiro worroonnihu shiqqanno kiirowa qolle shiikkine ikkara dandaanno. Hakkiinni saeno, gawatete baqo bikkinoonnihu giddoyido ikkara dandaanno; qoleno halaˈlinyise 10 cigile ikkinohu duˈmilleseno mitteenni bikkineenna ikkara dandaanno.