Daawuloosinna durriissa manna lowo geeshsha gawajja dandiitanno; Qullaawu Maxaafi, ‘Tini gobba [alame] gudisante bushunni amadantino’ yaannohu iseraati. (1 Yohaannisi 5:19) Qullaawu Maxaafi, Daawuloosi manna gawajjate horoonsiˈranno hayyo bade kulanno.

•   Soˈrisiisa. Qullaawu Maxaafi, Kiristaanu ‘Sheexaanu xagarro ittisanno’ gede amaalanno. (Efesooni Sokka 6:11) Sheexaanu horoonsiˈranno xagarro giddo mitte, mannu iso riqibbannore Maganu soqqamaanooti yee ammananno gede assate.—2 Qorontoosi 11:13-15.

•   Durriissate looso. Sheexaanu manna soˈrisiisate ekera hasaawissannore, kiilaano, qaalloolenna ayyaanto horoonsiˈranno. (Marro 18:10-12) Jingilli assitanno xagga adha, hipinootiizime, hattono hiincate kaaˈlitanno yinanni hayyonni surre fano assiˈra manna durriissa gawajjitanno gede assitanno.—Luqaasi 11:24-26.

•   Kaphu ammaˈno. Kaphu roso rosiissanno ammaˈno mannu Maganoho hajajamannokki gede assitanno. (1 Qorontoosi 10:20) Qullaawu Maxaafi togooha kaphu roso ‘durriisu roso’ yaanno.—1 Ximootewoosi 4:1.

•   Manna amada. Qullaawu Maxaafi giddo bushu ayyaani amadino mannire kultanno xagge no. Durriissa amaddino manni ballino, danqino woy umonsa gawajjino woyiti no.—Maatewoosi 12:22; Maarqoosi 5:2-5.

Daawuloosi gawajjannonketa gargadha dandiineemmohu hiittoonniiti?

 Qullaawu Maxaafi Daawuloosi giwanna hooˈla dandiineemmo gara kulannonke daafira, iso gawajjannonke yine waajjinanni heeˈra dihasiissannonke:

•   Sheexaanu horoonsiˈranno hayyo afanke isi ‘xagarronni’ dogammeemmokki gede kaaˈlitannonke.—2 Qorontoosi 2:11.

•   Qullaawa Maxaafa xiinxalli hattono rosoottore loosu aana hosiisi. Qullaawu Maxaafi biddishsha loosu aana hosiisakki Daawuloosi gawajjonni agartannohe.—Efesooni Sokka 6:11-18.

•   Durriissate loosi ledo xaado afiˈrinoha baalanka coye huni. (Soqqamaasinete Looso 19:19) Huna hasiissannohe coyibba giddo mitu durriissate loosi ledo xaadooshshe afiˈrino sirba woy muuziiqa, maxaaffa, metseetta, poosterranna viidiyubbate.