Ilamoommohu hakkawaro Jarmanete Dimokiraatike Rippaabilike yinanni gobbara, Saksenii yinanni qachiraati. Mininke hagiirrunna baxillu woˈminoho; qoleno anniˈyanna amaˈya dancha amanyootu seera rosiisinoe. Jarmanete Dimokiraatike Rippaabilike Kominiizimete seerinni galtino gobbaati; hakko daafira Saksenii qachira heeˈrannohu rooru manni ammaˈno diboonannoho. Anerano hakkawaro Maganu nooha dilawannoe. Tonaa sette diro ikkie geeshsha heeshshoˈya quxinohu lamu coyi: Maganu dino yitanno hedootinna Kominiizimete seeraati.

Kominiizimete seera baxoommohu mayiraati? Mannu baalunku taaloho yinanniti baxissinoe daafiraati. Qoleno noo jiro baalanta taashshe beeha hasiissanno yee ammaneemmo; mayira yiniro, hatto assa mitu manni hoqe durooˈmeenna mitu buxe buluulannokki gede assitanno. Hakko daafira, wedellootu Kominiizime dirijjite giddo eˈˈe diinaggaawe loosa hanafummo. Tonaa shoolu dirihu heeˈre, hunnoonni woraqata wirro horoonsiˈnanni gede assate looso loosanni hoseemmoha ikkummo; konni garinni qooxeessa biifinseemmo. Heeˈreemmo katamira Awo noo gashshaasine loosoˈya laˈe lowo geeshsha hagiidhitino daafira baraarsha uyitinoe. Shiimu heeˈrenni, mite jajjabba gashshaasine ledo egennamoommo. Haˈranni noommo haˈrinsho lowo geeshsha faayya ikkitinotanna albillittete heeshshoˈyano seekkanno yee hedoommo.

Hakkiinni baalunku coyi hedeweelcho umo lekkicho bai. Hatte yannara 1989nni Berliini Gimbe ubbuta, Soojjaati Awuroppira Kominiizimete gashshootino uwi. Masisinoehu konne calla diˈˈikkino. Mulenni Jarmanete Dimokiraatike Rippaabilike giddo taashsho nookkita huwatummo. Lawishshaho, Kominiizimete gashshootira halamannokki manna hooffayidi qansooti gede assine kiirranni. Kuni hiitto ikke ikki? Ninke Kominiizimete seera harunsineemmori dimannu baalu taaloho yine ammanneemmo? Kominiizimete gashshooti mulla ikkannokkirella kulannoho yaate? Tenne baala hedummoti lowo geeshsha yaadummo.

Hakko daafira, wolere agure muuziiqanna misile kayisate ogimma illachishummo. Muuziiqu rosi mine rosoommo daafiranna yuniversite eummorono isonni lede rosa dandeemmo daafira, muuziiqunna misilete ogeessa ikkate hedummo. Hakkiinni saeno, anje heeˈreenna rosiinsoonnieha amanyootu seera facci asse agurummo. Hakkawoyite roore diinaggaaweemmohu boohaarateeti; qoleno mitte hige duuchu seenni ledo baxamoommo. Ikkollana muuziiqu, misilete ogimmanna togo baxummo gede ikke heeˈraˈya yaaddoˈya dihooltino. Kayiseemmo misilla nafa giddoˈya waajja noota leellishshannote. ‘Albillitte mayi ikkakka? Heeˈneemmohu isi mayiraati?’ yee hedoommo.

Gedensoonni xaˈmuwaˈyara dawaro afiˈrummo; afiˈroommo dawarono dhagge ikkitue. Mitto hashsha rosu mine rosaanote ledo gamba yine albillittete heeshsho daafira hasaambanni heeˈnoommo. Mandii * yinanni rosaancho Yihowa Farciˈraasinchooti. Hakko hashsha ise dancha amaale amaaltinoe. “Andiriyasi, heeshshotenna albillittete yanna daafira noohe xaˈmuwara dawaro afiˈra hasiˈrittoro, Qullaawa Maxaafa seekkite xiinxalli” yitinoe.

Ise hatto yitueta huluullamano huluullamoommo, afateno quqquxamoommo; kayi huluulloˈya qeeˈle Qullaawa Maxaafa nabbawate hedummo. Mandii Daanieeli fooliishsho 2 nabbaweemmo gede kultue; nabbawoommori lowo geeshsha dhagge ikkie. Tini masaalo dirinke geeshsha aante aantete kaˈannota wolqaataame alamete mangistubba kultanno. Mandii albillittete yanna daafira kultannota wole Qullaawu Maxaafi masaalono kultinoe. Jeefote, xaˈmuwaˈyara dawaro afiˈra hanafummo! ‘Kayinni tenne masaalo coyiˈrinohu ayeti? Qoleno albillittete daafira mittoreno soˈrikki masaala dandaannohu ayeti? Isi Maganu nookka?’ yee hedummo.

Mandii, Horistinna Anjeliika yinanni minaanninna minaama ledo xaadissue; kuri Yihowa Farciˈraasine Maganu Qaale roore huwateemmo gede kaaˈlitinoe. Yihowa yinanniha Maganu suˈma woˈmanka woyite woshshitannorinna mannaho kultannori Yihowa Farciˈraasine calla ikkitinota mulenni huwatummo. (Faarso 83:18; Maatewoosi 6:9) Maganu Yihowa mannu ooso gannate ikkitino uullara hegerera heedhara hexxo uyinota rosummo. Faarso 37:9 “Kaaliiqa hexxitannori . . . baatto ragidhanno” yitanno. Qullaawu Maxaafi giddo kulloonnihu Maganu seeri garinni heeˈrate sharramanno manni baalunku tenne hexxo afiˈra dandaannota afaˈya hagiirsiissinoe.

Ikkollana, heeshshoˈya biddi assire Qullaawu Maxaafi kulannori ledo sumuu yee heeˈrate sharrama hasiissinoe. Muuziiqahonna misilete ogimmara worba ikkaˈya naaxxaleessa assitinoe; hakko daafira balaxe umo heeshshi assa rosa hasiissinoe. Amanyoote baˈino heeshsho heeˈra agurano shota diˈˈikkitinoe. Yihowa, Qullaawu Maxaafi rosi ledo sumuu yite heeˈrate sharrantannore cincannoha, maarannohanna qarrinsa leellannosiha ikkino daafira lowo geeshsha galaxxeemmosi!

Tonaa sette diro ikkae geeshsha heeshshoˈya quxinohu Kominiizimete seeraatinna Maganu dino yee ammanate; hakkuyi kawa kayinni Qullaawu Maxaafi heeshshoˈya soorre biddi assanni no. Rosoommo rosi albillittete yanna daafira yaadeemmokki gedenna heeˈreemmohu mayiraatiro huwateemmo gede kaaˈlinoe. Konnira 1993nni cuuame Yihowa Farciˈraasincho ikkummo; hakkiinni 2000nni, diinaggaabbe Yihowara soqqantannota Taabita yinanni rodoo adhoommo. Wolootuno Qullaawu Maxaafi rosiisannore affanno gede kaaˈlate, lamunku dandiinummo deerrinni lowo saate soqqammeemmo. Xaandeemmohu batinyu manni alba anente gede Kominiizimete seerinni galannohonna Maganu dino yee ammanannoho. Insara Yihowa affanno gara kuleemmonsa woyite lowo geeshsha tashshi yaannoe.

Umo Yihowa Farciˈraasine ledo xiinxalla hanafummo woyite, anniˈyanna amaˈya lowo geeshsha masino. Ikkollana hakkuyi kawa insa Yihowa Farciˈraasine ledo xiinxallaˈya heeshshoˈya biddi assitino gara huwatino. Xa insa Qullaawa Maxaafa nabbawanno daafiranna Yihowa Farciˈraasine gambooshshe haˈranno daafira tashshi yaannoe.

Taabitanna ani Qullaawu Maxaafi adhantinorira aanno amaale seekkine harunsineemmo daafira, adhamanke hagiirru noote. Lawishshaho, galtete ammaname heeˈra hasiissannota kultanno amaale harunsanke adhamanke baxillu noota ikkitanno gede kaaˈlitinonke.—Ibiraawoota 13:4.

Xa heeshsho diwaajjeemmo, albillittete yanna daafirano diyaadeemmo. Xa ani addu keerinna mittimma noote alamete doyicho maate miilaati. Tenne maate giddo ammanate roduuwanke baalanka taashshine laˈneemmo. Kuni ikka hasiissanno yee ammaneemmo coyeeti; qoleno heeshshoˈya diro baala halchanni heeˈroommoreeti.