ANNUWAHONNA AMUUWAHO
8: Lawishsha Ikka
HATTO YAA MAYYAATE?
Dancha lawishsha ikkanno anninna ama, oosonsara rosiisanno rosi garinni heeˈrannoreeti. Lawishshu gedera, mannu gobbaanni heeˈre woshsheennaˈne “Mine dino yiiyye” yitinanna oosoˈne macciishshituro, insa noore coyidhannore ikkitanno yitine heda dihasiissannoˈne.
“Duuchu manni ‘Ani asseemmore agurte, yeemmore assi’ yaanno. Ooso kayinni hatto yaa didandiinanni. Ooso mulese noore gudisse xuuxxanno ispoonje gede ikkitino daafira, coyiˈneemmorenna assineemmore baalankare laˈanno; coyiˈneemmori assineemmori ledo xaadannokkiha ikkiro, insa tenne affanno.”—Deevidi.
QULLAAWU MAXAAFI BIDDISHSHA: “‘Moortinoonte!’ yite kultanni, ati mayira moorattoyya?”—Roomu Sokka 2:21.
HASIISSANNOHU MAYIRAATI?
Qaaqquulleno ikko wedelloota anninsanna amansa geeshsha hunara woy seekkara dandaannohu wolu manchi dino yaa dandiinanni. Darawonsa nafa annu woy amate geeshsha huntara woy seekkitara didandiitanno. Hatto yaa, rosiissinanni rosi garinni heedhine dancha lawishsha ikkitinanniha ikkiro, oosoˈne dancha doogo hadhanno gede aye manchinni roore kaaˈla dandiitinanni yaate.
“Qaaqqinkera mitto coye duucha hinge kullummohu gedensaanni, ‘Isi macciishshanni nookka?’ yine hendammora dandiineemmo; kayi yineemmore ninke assinummokki gantummoro, diassitinoonni yaasi digattanno. Ooso assineemmore laˈanni nookkiha lawannonke woyite nafa, insa baalankare laˈanni no.”—Nikooli.
QULLAAWU MAXAAFI BIDDISHSHA: “Gordu egenno . . . awaawurshu [lawisiisa] nookkite.”—Yaiqoobi 3:17.
MAA ASSA DANDIITINANNI?
Kiˈneneeto layidhe. Laˈinanni boohaarshi hiittooho? Galteˈnenna oosoˈne ma garinni amaxxitinanni? Jaallaˈne hiittooreeti? Wolootu daafira heddinanni? Haranchunni, kiˈne oosoˈne ikkitara halchitinanni manni gedeereeti?
“Minaanniˈyanna ani, ninke harunsineemmokki biddishsha oosonke harunse diyineemmo.”—Kiristiini.
Soˈro loossiniro maaro xaˈmidhe. Oosoˈne guuntete xeˈne nooˈneta affino. Sodhinanni woyite galteˈne woy oosoˈne maaro xaˈmidhinanniha ikkiro, oosoˈne noore coyiˈranna insaneeto heeshshi assa hasiissannonsata rossanno.
“Oosonke loonsoommo soˈro ammanne maaro xaˈmiˈnanna laˈˈansa lowo geeshsha danchate. Hatto assa hoongummoro, insano soˈro loossuro maaxa rossanno.”—Roobini.
“Ninke annuwunna amuuwu geeshsha oosonke hunara woy seekkara dandaannohu wolu dino; oosonke danchu garinni quxa dandiineemmoti qara doogo dancha lawishsha ikkate; mayira yiniro insa woˈmanka woyite assineemmore laˈanno. Ooso anninsanna amansa heedhanno heeshsho laˈe, woˈmanka woyite rossannori no.”—Wendeli.
