“GAMBA assinanni gidi lowoho; gamba assanno manni kayinni shiimaho. Gide gamba assannoha lowo manna soyanno gede, gidu anna huuccidhe!” (Luq. 10:2) Yesuusi mitu 2,000 diri albaanni coyiˈrinoti tini yaatto, yannankera Miyanimaari gobbara ikkinore dancha gede assite xawissanno. Hatto yineemmohu mayiraati? Miyanimaari gobbara 55 miliyoone ikkanno manni no; konni manni giddo dancha duduwo dudubbanni noo halashshaano 4,200 calla ikkitanno.

Ikkollana ‘gidu Anni’ Yihowa, babbaxxitino gobbara heeˈrannohu batinyu roduuwi Wodiidi-soojjaati Iisiyira noota tenne gobba daye ayyaanaamittenniha midote looso loosanno gede kakkayisanni no. Kuri roduuwi qaensa agure hakka haˈranno gede assinonsari maati? Kuri roduuwi Miyanimaari haˈranno gede kaaˈlinoonninsahu hiittoonniiti? Insa mayi atoote afiˈrino? Konni birxichira kuri xaˈmuwara dawaro afiˈneemmo.

Kaazuhiro yinannihu Jaappaanete heeˈranno suwisaanchi shiimu diri albaanni hawwunaatu amadeennasi dammeenna hospitaale haaˈne haˈnoonnisi. Dokiterichu lamu diri geeshsha makeena kadannokki gede kulinosi. Hatte yannara Kaazuhiro lowo geeshsha masino. Isi ‘Baxeemmota suwisaanchimmate soqqansho hiitto ikke soqqamammoraati?’ yee yaadino. Isi suwisaancho ikke soqqama agurannokki gede faro fanasiˈra Yihowa eegame huucciˈrino.

Kaazuhiro togo yiino: “Mittu agani gedensaanni Miyanimaari gobbara soqqamanno jaaliˈya iillinoe qarri daafira macciishshi. Hakkiinni silke bilbile togo yiie: ‘Miyanimaari gobbara rooru manni horoonsiˈranno hodhishshi otobisete. Kawira dayittoro makeeniweelo soqqama dandaatto.’ Fayyimmaˈya Miyanimaari haˈreemmo gede assitannoeronna teˈee dokitericha xaˈmummo. Dokiterichu togo yee hedoommokki dawaro qolie: ‘Mittu surrete akimichi Miyanimaari gobbanni daye Jaappaane daaˈˈatanni no. Isi ledo egensiiseemmohe. Wole woyite togoori iillihero isi kaaˈlannohe.’ Dokiterichu kulinoere Yihowa huuccattoˈyara qolino dawaro gede asse laoommo.”

Kaazuhiro bayichonko Miyanimaari noote sinu biirora sokka borreessino; isi minaamasi ledo hatte gobbara suwisaano ikke soqqama hasiˈrannota xawisino. Ontu barri gedensaanni sinu biiro “Suwisaano hasiissannonkena amme!” yite qoltinonsa. Kaazuhironna minaamasi Maari makeenansa hiˈri, hattono Miyanimaari gobbara heeˈrate fajjo afiˈri gedensaanni horophillu tikkeette mudhe Miyanimaari haˈri. Xaa yannara insa Mandaaleyi noote danqootu afii gaamora hagiirrunni soqqamanni no. Kaazuhiro togo yiino: “Kuni woˈnaalshi Maganu Faarso 37:5 te aana, ‘Doogokki Kaaliiqira eeggo uyiˈri; iso addaxxi; isino towatannohe’  yee coyiˈrinore albinni roore ammaneemmo gede assinoe.”

Miyanimaari heedhannoti Yihowa Farciˈraasine 2014nni baxxino gambooshshe qixxeessitino. Konni gambooshshiwa wole gobbanni dayino roduuwino no. Insa giddo mitte 30 diri balla ikkannosete Ameerikunni dagginote Moniki yinanni rodooti; ise togo yitino: “Gambooshshuwiinni higummati, heeshshoˈya giddo konninni aanche asseemmari daafira Yihowa huucciˈrumma. Hattono ayyaanaamittete mixoˈya daafira anniˈyanna amaˈya ledo amaalamumma. Hakkiinni baalunku Miyanimaari haˈreemma gede sumuu yinummo; ikkollana tenne mixoˈya wonshiˈrate mite yanna geeshsha agadhanna ganye huucciˈra hasiissinoe.” Monika tenne xawissanni togo yitino:

“Yesuusi rosaanosi ‘ofolte maˈlitanno’ gede jawaachishinonsa. Konni daafira aneneeto togo yee xaˈmumma: ‘Hakkira haˈre soqqamate ikkanno geeshshi woxi nooe? Lowo yanna looso loosummakki hasiisannoere wonshiˈra dandeemma?’” Ise ledde togo yitino: “Bayichonko [Miyanimaari] gobba haˈre soqqamate ikkanno geeshshi woxi nooekkita wodanchumma.” Ikkina hakkira hadhe soqqama dandiitinohu hiittoonniiti?—Luq. 14:28.

Monika togo yitino: “Mitto barra loosiisaanchoˈya hasaawissaera hasidhannota kultue. Hatte yannara ise loosunni fushshite huntaeraati yee waajjoomma. Ise kayinni danchu loosiˈyara galattinoe. Hakkiinni ise afansha uyitaera heddinota kultue; uyitinoe woxi nooe asale baala baaxxate ikkannoho!”

Monika Sadaasa 2014nni hanaffe Miyanimaari gobbara soqqantanni no. Ise sabbakkannori roore hasiissannowa hadhe soqqamasenni mayi macciishshaminose? Ise togo yitino: “Kawira daaˈyanni tashshi yiinoe. Xa sase Qullaawu Maxaafi xiinxallo nooe. Xiinxalloˈya giddo mitte 67 diro ikkannosete. Ise woˈmante yannara faasiiqqe hanqaffe keere haadhannoe. Ise Maganu suˈmi Yihowa ikkinota affuti wiˈlitino. Ise togo yitino: ‘Konni albaanni Maganu suˈmi Yihowa ikkinota macciishshe diegennoomma. Ani ate lowo diro rooreemma; ikkollana heeshshoˈya giddo rosoommare baala rooranno coye rosiisoottae.’ Hatte yannara anino wiˈlumma. Sabbakkannori roore hasiissannowa haˈre soqqamatenni afiˈnanni hagiirri giddo mittu togoo woˈnaalshaati.” Muli yannara Monika Maganu Mangiste Sawaakooti Rosi Mine rosate qoosso afidhino.

Mitootu Miyanimaari hadhe soqqantanno gede assinonsari, 2013nnihu Yihowa Farciˈraasinehu Diru Maxaafira tenne gobba daafira nabbawansaati. Lii yinanniti 30 diri balla ikkannose rodoo Wodiidi-soojjaati Iisiyira heedhanno. Isera woˈma yanna loosi nooseha ikkirono, Diru Maxaafira noo hedo Miyanimaari hadhe soqqamate heddanno gede assitinose. Ise togo yitino: “Yangooni yinanniwa 2014nni assinoonniha baxxinoha qoqqowu gambooshshe haˈroomma; hakkiicho Miyanimaari gobbara Chayinu Afoo coyiˈnanni qoqqowira soqqamanno minaanninna minaama ledo xaadoomma. Ani Chayinu Afo dandeemma daafira, Miyanimaari haˈre Chayinu Afii gaamo kaaˈlate hedumma. Hakkiinni Monika ledo Mandaaleyi soqqama hanafumma. Yihowa kaaˈlonni lamenti mittu rosi mine shiima yanna rosiinseemmo loosonna hakko qooxeessira galleemmo mine afiˈnummo. Hakkiicho iibbillunna wolu injaannokkiri nooha ikkirono, soqqansho lowo geeshsha hagiirsiissannoe. Miyanimaari gobbara mannu dureeyye ikka hoogirono, manna ayirrisannoho, hattono dancha duduwo macciishsha hasiˈranno. Yihowa loosu rahe loosamanno gede assanni noo gari dhaggete. Mandaaleyi haˈre soqqamaˈya Yihowa fajjo ikkitinota dihuluullameemma.”

Sabbakkannori roore hasiissannowa haˈre soqqamannohu batinyu roduuwi huuccatto afidhino wolqa huwatino. Hanni 30 diri balla ikkannonsari Jumpenna  minaamasi Naao woˈnaalsha laˈno. Insa alba Jaappaanete gobbara danqootu afii songora soqqamanno. Ikkina insa Miyanimaari haˈrinohu mayiraati? Jumpe togo yiino: “Aninna minaamaˈya wole gobba haˈne sabbakkannori roore hasiissannowa soqqamate mixo noonke. Jaappaanete noote danqootu afii songonkenni mittu rodii Miyanimaari haˈre soqqama hanafino. Suuqiˈnoommo woxi shiima ikkirono, ninkeno Onkoleessa 2010nni Miyanimaari haˈnummo. Miyanimaari heedhanno roduuwi anga fante haadhinonke!” Isira Miyanimaari gobbara noohu danqootu Afii qoqqowi daafira mayi macciishshaminosi? Isi togo yiino: “Hakko batinyu hasatto noonsa manni no. Danqootu insa afiinni viidiyo leellinsheemmonsa woyite dhagge assidhanno. Kawira dange Yihowara soqqamate murciˈrankenni tashshi yiinonke.”

Jumpenna Naao woxu qarra qeeltinohu hiittoonniitiyya? Jumpe togo yiino: “Sasu diri gedensaanni woxinke goofara rahino daafira, aane noo dirira minu kira baanteemmori dinonke. Aninna minaamaˈya tenne daafira duucha hinge huuccatto assiˈnoommo. Hakkiinni hedeweelcho sinu biiro yannate geeshsha baxxitino suwisaano ikkineemmo gede kultanno sokka sokkunke! Yihowa addaxxinoommo daafira, isi horo dituginonke. Qoleno duuchante doogonni towaatinonke.” Muli yannara Jumpenna Naao Maganu Mangiste Sawaakooti Rosi Mine rosate qoosso afiˈrino.

Ixaaliyu gobbara ilaminoha Simoone yinanniha 40 diri balla ikkannosi rodoonna 30 diri balla ikkannoseta Niwuzilaandete ilantinota Aana yinanni minaamasi Miyanimaari haˈre soqqamanno gede kakkayisinonsari maati? Aana “2013nnihu Diru Maxaafira Miyanimaari gobba daafira fultino hedooti” yite qoltino. Simoone togo yiino: “Miyanimaari haˈre soqqamaˈyanni tashshi yiinoe. Hakkiicho bikku heeshsho heeˈneemmo daafira, roore yannaˈyanni Yihowa looso loosa dandeemmo. Sabbakkannori roore hasiissannowa haˈne soqqammeemmo woyite Yihowa towaatannonke gari dhaggete.” (Far. 121:5) Aana togo yitino: “Xa albinni roore hagiirraame ikkoomma. Hattono bikku heeshsho heeˈneemmo. Xa minaanniˈya ledo lowo yanna sayinseemmo daafira, albinni roore mimmitunniwa shinqoommo. Qoleno lubbote jaalla afiˈnoommo. Hakkiicho mannu Yihowa Farciˈraasine digiwanno; qoleno halaale macciishsha lowo geeshsha baxanno.”

Aana togo yitino: “Mitto barra dikkote mitte yuniversitete rossanno rosaanchora farciˈrumma gedensaanni wirro xaadate dinye dinyinummo. Wirro xaandummota, ise jaalase haadhe daggino. Wole woyite qole boode jaallase haadhe daggino. Yannate gedensaanni xaano wole jaallase haadhe daggino. Xa insa giddo onte Qullaawa Maxaafa xiinxallisanni noomma.” Simoone togo yiino: “Hakko qoqqowira mannu faasiiqahonna afate hasatto noonsaho. Insa giddo batinyu hasaawa hasiˈranno. Isinni hasatto noonsare baala hasaawisate yanna diˈˈikkitannonke.”

Ikkina mitootu Miyanimaari haˈre soqqamate maa assitino? Jaappaanete ilantinoti Mizoho togo yitino: “Aninna minaanniˈya Saachiyo sabbakkannori roore hasiissanno gobba haˈne soqqama hasiˈnoommo.  Mamira haˈneemmoro kayinni dianfoommo. Miyanimaari gobba daafira, 2013nnihu Diru Maxaafira fultinota hagiirsiissanno woˈnaalshuwa nabbambummo gedensaanni, ninkeno Miyanimaari haˈne soqqama dandiineemmoronna teˈee heda hananfummo.” Saachiyo lede togo yiino: “Miyanimaariha qara katama Yangooni mitte lamala daaˈˈatate, wole yaattonni qotate hendummo. Hakko qooxeessa daaˈˈatanke, hakkira haˈrate kaˈneemmo gede assitinonke.”

Rodininna Jeeni yinanniri 50 diri balla ikkannonsari Awustiraaliyunni dayino minaanninna minaama, Joordaaninna Daanika yinanni oosonsa ledo 2010nni hanafe Miyanimaarira soqqamanni no. Rodini togo yiino: “Hakkiicho mannu ayyaanaamittete coye goorino gari dhagge ikkinonke. Wole maateno Miyanimaari gedeewa hadhe soqqamate sharrantanno gede jawaachisheemmonsa.” Mayira? “Hakkira haˈre soqqamanke maatenke ayyaanaamittetenni baasa kaaˈlitino! Batinyu wedelli hedannohu silkete, makeenu, loosunna wolu coyi daafiraati. Oosonke kayinni soqqanshote horoonsidhannota haaro qaalla rosate sharrantanni no. Qoleno gariti Qullaawu Maxaafi egenno noonsakkire hasaawisa dandiinanni gara, hatte gobba afii songora dawaro qola dandiitanno gara rosiisidhanninna wole ayyaanaamittete coye assitanni no.”

Oliveeri yinannihu 30 diri balla ikkannosihu Ameerikunni dayino rodii wolootuno togoo soqqansho soqqantanno gede jawaachishannohu mayiraatiro xawisanni togo yiino: “Rosoommo qooxeessa agure wolewa haˈre Yihowara soqqamaˈyanni lowo horo afiˈroommo. Qaeˈya agure wolewa haˈre soqqamaˈya, aye coyi tuncu yiierono Yihowa addaxxeemmo gede assitinoe. Konni albaanni egennoommokkiri ayyaanaamittete roduuwiˈya ledo soqqamaˈya, tenne alamera Maganu Mangiste geeshsha hasiisannohu wolu coyi nookkita huwateemmo gede kaaˈlitinoe.” Xaa yannara Oliveerinna minaamasi Aana Chayinu Afii songora diinaggaawe soqqamanni no.

Tiraazeli yinanniti Awustiraaliyunni dagginoti 50 diri balla ikkannose rodoo 2004nni kayise Miyanimaari gobbara soqqantanni no. Ise togo yitino: “Sabbakkannori roore hasiissannowa hadhe soqqama dandiitannori, togo assitanno gede jawaachisheemmansa. Yihowa isira soqqamate hasatto heedhunkero maassiˈrannonketa ane heeshshonni laoomma. Togoo heeshsho heeˈreemma yee hede diegennoomma. Ani hedoommahunni roore, hagiirsiissannonna tashshi assitanno heeshshooti.”

Kuri Miyanimaari gobbara soqqamanno roduuwi giddonsanni coyiˈrinori, atino sabbanke egenninoonnikki qoqqowo hadhe soqqamatto gede kakkayisahera halchineemmo. Ee, sabbakkannori roore hasiissannowa hadhe soqqantanno roduuwi “Miyanimaari daggine kaaˈlenke ballo!” yitanni no.