SABBAKKANNORI roore hasiissannowa hadhe diinaggaabbe soqqantannote Yihowa Farciˈraasine giddo batinyu mine assiˈrinokki roduuwaati. Insa giddo mitu wole gobba haˈre lowo diro soqqamino. Kuri roduuwa wole gobba haˈre soqqamanno gede kaaˈlinonsari maati? Wole gobbara haˈre soqqame mayi roso afiˈrino? Insa haˈrinowa hiittoo heeshsho heeˈrino? Kuri lawishsha ikkanno roduuwi giddo haammata hasaawinsoommo. Ati lowo hagiirre aannoha sabbakate looso albinni roore loosate halchitanni noottate mine assiˈroottakki rodootiro, insa coyiˈrinori kaaˈlannoheta dihuluullammeemmo. Hige baalunku Maganu manni insa lawishsha wodana asse hedansa kaaˈlitannonsa.

Mine assiˈroottakki rodoo ikkoottahura wole gobbara hadhe soqqama dandaattakkiha lawannohe? Xa 75 diriti Aniita yinanni rodoo, wole gobba hadhe soqqama dandiitannokkiha lawinose. Ise lophitinote Ingilizete gobbara suwisaancho ikkitinohu 18 diriti heedheeti. Aniita togo yitino: “Mannaho Yihoware rosiisa baxeemmaha ikkirono, wole gobbara haˈre soqqama dandeemma yee horo hede diegennoomma. Wole gobbaha mitto afoo nafa dirosoomma; qoleno wole afoo rosa dandeemmakkiha lawinoe. Hakko daafira, Giiliyaadi Rosi Mine roseemma gede koyinsieta lowo geeshsha waajjoomma. Waagaho kiirrannikkiti ani konne koyishsha afiˈraˈya dhagge ikkitinoe. Ikkollana togo yee hedumma, ‘Yihowa dandaatta yii geeshsha woˈnaaleemma.’ Kuni 50 diri albaanni ikkinoreeti. Hakka warinni kayise Jaappaanete misiyoone ikke soqqamanni noomma.” Aniita ledde togo yitino: “Mito wote wedellu meya roduuwira muushshi yee, ‘Tenne hagiirsiissanno soqqansho soqqama hasidhiniro borsaˈne bayidhine harunseˈˈe!’ yeemma. Insa giddo lowo roduuwi hatto assanna laˈˈaˈya hagiirsiissinoe.”

Wole gobba haˈre soqqaminori batinyu roduuwi hakkiira haˈrate umi qara lame wodana ikkino. Ikkina, insa jawaante afiˈrinohu hiittoonniiti?

Xa 64 diriti Moriini togo yitino: “Naggi yaanni harummati guma afidhino heeshsho heeˈranna wole manna kaaˈla hasiˈrumma.” Ise 20 diro ikkiseta, sabbakkannori roore hasiissannowa soqqamate Kanaadaho Kubeeki yinanniwa hadhu. Ise ledde togo yitino: “Gedensaanni Giiliyaadi Rosi Mine eˈˈe roseemma gede koyinsie; ikkollana jaallaˈyawiinni baxxe afoommakki gobba haˈra waajjumma. Qoleno, dhibbu waadanni noosi annaˈya amadde noota amaˈya agure haˈra yaadoomma. Tenne hajo daafira haammata hashsha wiˈlanni Yihowa huucciˈroomma. Tenne anniˈyaranna amaˈyara  hasaawummata, insa konni koyishshira sumuu yeemma gede jawaachishie. Qoleno, songonke baxillunni kae annaˈyanna amaˈya towaattanni noota laumma. Yihowa [insa] towaatanni noota laˈˈaˈya, Isi aneno towaatannoe yee addaxxeemma gede assitinoe. Tenne laummati haˈrate kaumma!” Moriini 1979 kayisse Galchimi Afirikira 30 saˈˈanno diro misiyoone ikkite soqqantino. Xaa yannara Moriini Kanaadaho amase towaaxxitanni heedhenni baxxitino suwisaancho ikkite soqqantanni no. Ise wole gobbara soqqantu yannare qaagge togo yitino: “Yihowa duuchanka wote hasiisinoere hasiˈre noomma yannara uyinoe.”

Xa 65 diro ikkinoseti Wendii, Awustiraaliyaho suwisaancho ikkite soqqama hanaffinohu anje heedheeti. Ise hakka warita qaagge togo yitino: “Manna ille qase laˈˈa waajjeemma daafira egennoommakki manna hasaawisa qarra ikkitinoe. Ikkollana, suwisaancho ikkaˈya duuchunku gari manna hasaawisa roseemma gede kaaˈlitinoehura, waajjeemmakkita ikkumma. Gedensaanni, waajja qeeloommata huwatumma. Suwisaancho ikkaˈya Yihowa addaxxa rosiissinoe daafira, wole gobbara haˈre soqqama dandeemma yee heda hanafumma. Qoleno, albaanni 30 saˈˈanno diro misiyoone ikkite Jaappaanete soqqantino rodoo, Jaappaane haˈne mitu sasu agani geeshsha soqqammeemmo gede koyissue. Ise ledo soqqamaˈya wole gobbara haˈre soqqamate nooe hasatto lexxitanno gede assitino.” Wendii 1986 Awustiraaliyaho soojjaatoonni 1,770 km xeertidhe noote Vanaatu yinanni giddicho hadhino.

Wendii xaano Vanaatu heedhanno; ise tirote biirora soqqantanno. Ise togo yitino: “Gaxarrate, gaamonna songuwa xintantanna laˈˈa lowo geeshsha hagiirsiissannoe. Kuri giddichuwa giddo loonsannihu Yihowa loosira shiimare assaˈya anera lowo qoossooti.”

Xa 65 diro ikkinoseti Kumiko, suwisaancho ikkite soqqantanno jaalase Neppaali gobba haˈno yituse yannara Jaappaanete woˈma yanna suwisaancho ikkite soqqantanni no. Kumiko togo yitino: “Ise marro marro higge haˈno yitinoeha ikkirono, ani giwumma. Ani haaro afoo rosanna haaro qooxeessa haˈre heeˈra rosa yaadoomma. Qoleno, wole gobba haˈrate hasiisanno woxe afiˈra qarra ikkitinoe. Tenne baala hedanni heeˈreenna makeenu dano iilliteennae hospitaalete goxumma. Hakko heeˈre togo yee hedumma: ‘Albillittete mayi tuncu yaannoero afoommari nooni? Baro buutote dhibbi amadeennae wole gobba haˈre soqqama hoogammara dandeemma. Wole gobbara mitto dirono ikka soqqama didandeemma?’ Yihowa tenne asseemma gede kaaˈlaera laalaate huucciˈrumma.” Kumiko hospitaaletenni fultuhu gedensaanni Neppaali gobba laˈˈate hadhu; hakkuyi gedensaanni isenna suwisaancho ikkitino jaalase hatte gobba haˈri.

 Kumiko Neppaali soqqantuha umiha tonne diro qaagge togo yitino: “Duumu Baari lamewa beehamihu gede yaadoomma qarri giddoonni furcho faˈnantue. Sabbakkannori roore hasiissannowa haˈra lowo geeshsha hagiidheemma gede assitinoe. Mitte maate ledo Qullaawu Maxaafi hasaawa hasaambeemmo wote, qachu manni duucha wote onte woy lee ikke daye macciishshanno. Qaaqquullu nafa Qullaawu Maxaafire xawissanno tiraakte oyeemmansa gede ayirrinyunni xaˈmidhanno. Konni danchu qooxeessira soqqama lowo geeshsha hagiirsiissannote.”

Kuri mine assiˈrinokkiri worbuullu roduuwira fonqolo ikkanno coyi iillinonsati egennantinote. Ikkina, insa fonqolo qeelinohu hiittoonniiti?

Kanaadaho ilantinoti Dayani togo yitino: “Umi adda maatenkewiinni baxxe xeertowa haˈra qarra ikkitinoe.” Xa isera 62 diro ikkinose; ise misiyoone ikkite Ayivoriyi Koosti (xa Koti Di Vuyari yinanni) gobbara 20 diro soqqantino. Ise togo yitino: “Soqqameemma qooxeessiˈra heeˈranno manna baxeemma gede kaaˈlaera Yihowa huucciˈrumma. Giiliyaadi Rosi Mini rosiisaanonke giddonni Roduu Jaaki Redferdi, soqqantinanni qooxeessira laˈinanniri, roorenkanni lowo geeshsha buxino manna laˈinanni wote, umi qara dadillitinannihanna massinanniha ikkara dandaanno yee kulinonke. Isi togo yiino: ‘Buximansa laˈinoonte. Manna, hattono albansanna illensa laˈe. Insa Qullaawu Maxaafi halaale kultinanninsa wote mayite qoltannoro wodanche.’ Ani tenne assoomma; tini lowo atoote afiˈreemma gede assitinoe! Mannaho sheshifachishshannota Maganu Mangiste sokka kuleemmansa wote albinsa xawanna laeemma!” Dayani wole gobbara hadhe soqqamate kaaˈlinoseri woluri maati? Ise togo yitino: “Qullaawa Maxaafa xiinxalliseemma manna jaala assiˈreemma; qoleno insa Yihowara ammaname soqqamanna laeemma wote lowo geeshsha hagiidheemma. Soqqameemma gobba qaeˈya assiˈrumma. Yesuusi qaale einonte gede ayyaanaamittete amuuwa, annuwa, meyanna labbaa roduuwa afiˈroomma.”—Maq. 10:29, 30.

Xa 46 diro ikkinoseti Ani yinanni rodoo sabbakate loosonke agamboonnite mitte Iisiyu gobbara soqqantanno. Ise togo yitino: “Sabbakanni keeshshummate haammata gobbuwara ani lophoommahunni baxxino garinni lophinohunna baxxino akatta afiˈrinohu meya roduuwi ledo heeˈroomma. Tini, mito wote mereeronke koffi assannorinna dadillisanno coyi kalaqamanno gede assitino. Hattoo yannara, ledoˈya galanno roduuwiwa roore shiqatenna budensa albinni roore egennate woˈnaaleemma. Qoleno, manna baxeemmatanna quwa saeemmakkita ikkate sharramoomma. Tenne assate sharramaˈya batinyu manni ledo dancha jaalooma kalaqiˈre uyinoonnie looso looseemma gede kaaˈlitinoehura hagiidhoomma.”

 Jarmanete ilantinoti xa 53 diro ikkinoseti Ute yinanni rodoo 1993 Madagaskaari giddichora misiyoone ikkite soqqantanno gede sonkoonnise. Ise togo yitino: “Umi qara hatte gobba afoonna quficho afidhino ayyare rosa qarra ikkitinoe, hattono shekkeere, ameebunna irkiˈraano daˈmuullanni daano dhibbi waadannae heeˈroomma. Ikkollana lowo kaaˈlo afiˈroomma. Hakko heeˈrannohu meya roduuwi, insa qaaqquullinna Qullaawa Maxaafa rosiiseemma manni insa afoo roseemma gede kaaˈlinoe. Misiyoone ikkite ledoˈya soqqantanno rodoo dhiwamumma wote baxillunni kaˈe towaattinoe. Ikkollana, baalunkunni roore Yihowa kaaˈlinoe. Yaachishannoere baala ganye huuccattotenni isira kuˈleemma. Hakkiinnino, huuccattoˈyara dawaro qola geeshsha, boode barruwa woy aganna cince agareemma. Yihowa qarra ikkinoeha baalanka coye tirino.” Ute Madagaskaari soqqantanna xa 23 diri ikkinose.

Sabbakkannori roore hasiissannowa haˈre soqqamannohu wolu roduuwinte gede mine assiˈrinokkihu hattoowa haˈre soqqamanno roduuwino lowo atoote afiˈrinota coyiˈrino. Insa afiˈrino atooti giddo mitu maati?

Xa 73 diro ikkinoseti Jarmanete gobbati Hayidii yinanni rodoo 1968 kayisse Ayivoriyi Koosti (xa Koti Di Vuyari yinanni) gobbara soqqantanni keeshshitino. Ise togo yitino: “Baalunku coyinni roore lowo geeshsha hagiidheemma gede assinoe coyi ayyaanaamittete oosoˈya ‘halaalaancho heeshsho heedhanna’ laˈˈaˈyaati. Qullaawa Maxaafa xiinxallisoomma manni giddo mitu xa suwisaanonna songote cimeeyye ikkino. Insa giddo batinyu Iliile woy Amaama yee woshshannoe. Kuri cimeeyye giddo mittu cimeessi, minaamasinna oosonsa ane maatensa miila gede asse laˈˈanno. Konni daafira Yihowa beetto, beettiˈya beettonna sase beettiˈya ooso uyinoe.”—3 Yoh. 4.

Xa 72 diro ikkinoseti Kanaadu gobbati Kaareni yinanni rodoo Galchimi Afirikira 20 saˈˈanno diro misiyoone ikkite soqqantino. Ise togo yitino: “Misiyoone ikke soqqamaˈya albinni roore umiˈya horo agureemmata, manna baxeemmatanna cinceemmata ikka rosiissinoe. Qoleno, addi addi gobba roduuwi ledo soqqamaˈya halashshe hedate kaaˈlitinoe. Mittoricho loosa dandiinanniti addi addi doogo noota rosoomma. Xa alame woˈmate heedhannota muxxe jaalla afiˈra lowo atooteeti! Heeshshonkenna uyinoonninke loosi soorraminoha ikkirono, jaaloominke kayinni disoorramino.”

Xa 79 diro ikkinoseti Ingilizete gobbati Margareeti yinanni rodoo Laoosi gobbara misiyoone ikkite soqqantino. Ise togo yitino: “Wole gobbara soqqamaˈya, Yihowa addi addi dana afiˈrinonna babbaxxino garinni lophino manna dirijjitesiwa abbanno gara umiˈya heeshshonni laeemma gede assitinoe. Kuni woˈnaalshi ammanaˈya lowo geeshsha jawaachishino. Tini, Yihowa dirijjitesi massaganni nootanna hedinore wonshannota woˈmunni woˈma ammaneemma gede assitinoe.”

Ee, wole gobbara haˈre soqqamannohu mine assiˈrinokki roduuwi wongeelu loosira lowore assanni no. Insa galantanninsareeti. (Eje. 11:40) Qoleno, insa kiiro lexxitanni no. (Far. 68:11) Atino heeshshokki giddo mitore biddi assidhe, konni birxichira hasaawinsoonnihu diinaggaawe soqqamannohu meya roduuwi faale haˈra dandaatta ikka? Hatto assattaha ikkiro, Yihowa “shaqqado ikkinota” qamasse laˈˈattati dihuluullissannote.—Far. 34:8.