Mararrote yaa, “wolu manchira iillinore wodanchatenna meessaneeto hakko manchi bayicho worre isira macciishshaminosiri macciishshamannonke gede assiˈrate.” Surrete fayyimma egennaami dokiteri Riiki Hanseni “mararro kalaqamunni afiˈnoommo dandooti” yee xawisino.

HANNI HEDI: Wolu uullate kalaqamira nookkihu mararrote akati giddonke noohu mayiraati? Qullaawu Maxaafi Maganu manna danisinni kalaqinota kulanno. (Kalaqama 1:26) Maganu daninni kalaqammoommo daafira, mito geeshsha isi akatta leellisha dandiineemmo. Konnira mannu mararrotenni kae woloota kaaˈlansa, Kalaqaanchinke Maganu Yihowa mararannoha ikkinota leellishshanno.—Lawishsha 14:31.

Maganu mararannonke daafira, qarrammanna laˈˈa dibaxanno. Israeele Gibitsete gobbara borojje ikkite qarrante heedhu gedensaanni 40 diro halalla shettino; Qullaawu Maxaafi hatte yannara Maganoho macciishshaminosire kulanni “Qarrinsa yanna baalantera ledonsa qarramino” yaanno. (Isayaasi 63:9) Maganu iillinonsa qarra afe calla diagurino. Insara macciishshaminonsari isirano macciishshaminosi. Isi “Manniˈya qarrame noo gara laoommo” yiino. (Fulo 3:7) Qoleno Maganu “Kiˈne kisannohu illeˈya diikkicho kiisannoho” yiino. (Zakkaariyaasi 2:8) Wolootu miiccannonke woyite, Maganuno lowo geeshsha dadillanno.

Qullaawu Maxaafi, ninkeneeto bushiinsheemmoha ikkironna Maganu mararannonkekkiha lawinkero nafa, “Maganu wodaninkera aliidiho” yee jawaachishannonke. (1 Yohaannisi 3:19, 20) Maganu ninke umonke anfoommohunni roore afinonke. Isi heeˈnoommo gara, hedonkenna giddonketa afino. Qoleno isi mararannonke.

 Qullaawu Maxaafi sheshifachishannonke

• “Huuccidhiniero, anino huuccattoˈne macciishsheemmoˈne. Kaaˈlo hasidhine raartinanni woyite raareˈne hidheemmo.”—ISAYAASI 58:9.

• “Kiˈnera hedoommore ani egennoommo; hedoˈyano . . . keerunnite ikkinnina bunshennita diˈˈikkitino. Hatte yannara woshshidhinannie; anino macciishsheemmoˈne.”—ERMIYAASI 29:11, 12.

• “Mageeshsha qarramoommoro ati afootto; mageeshshi hindiiddo duˈnoommoro egennootto. Baalunku coyi maxaafikkirawe borreessame no!”—FAARSO 56:8.

Maganu mararannonketa afanke qarra dandee saˈˈate kaaˈlitannonke? Hanni Mariya lawishsha laˈno. Ise togo yitino:

“Qaaqqiˈya lame diro woˈma kaanserete dhibbinni qarrame 18 dirisinni reyi gedensaanni, heeshsho qarraataamenna taashsho xeˈinota ikkitinohu gede asse hedoomma. Yihowa qaaqqoˈya mayira dihursino yee Isira hanqoomma!

“Lewu diri gedensaanni, mitte songote nooti baxillaanchonna shaqqado rodoo Yihowa baxannoeha lawannoekkita kuˈlanna seekkite macciishshitinoe. Ise mereero eˈukki haammata saate macciishshitue gedensaanni, ‘Maganu wodaninkera aliidiho’ yitannota 1 Yohaannisi 3:19, 20 noo hedo qummi assitue; kuni qummeeshshi baasa jawaachishinoe. Ise Yihowara iillannonke qarri leellannosita xawissinoe.

“Ikkirono giirama agura qarra ikkitinoe. Hakkiinni ‘Yaaddonna dadillu amadie yannara, sheshifachishshe hagiirsiisoottoe’ yaannoha Faarso 94:19 te noo qummeeshsha nabbawumma. Konne qummeeshsha ane hende borreessinoonniha lawinoe! Yannate gedensaanni Yihowa macciishshannoetanna qarriˈya leellannosita wodanchoomma daafira isira hasaaphe furgaoomma.”

Maganoho qarrinke leellannositanna mararannonketa afanke lowo geeshsha sheshifachishshannonke! Ikkina qarru batiˈrinohu mayiraati? Qarru iillannonkehu Maganu cubbinkera qorichishanni noonke daafiraatini? Maganu qarra baala hunanno yanna dagga ikka? Aante noo birxichuwara kuri xaˈmuwara dawaro afiˈneemmo.