ROSO 01
Qullaawu Maxaafi Kaaˈlannohehu Hiittoonniiti?
Ninke baalunku, qarrammeemmohunna reyineemmohu mayiraatironna albillitte heeshsho hiittoota ikkitannoro afa hasiˈneemmo. Qoleno yaachishannonkeha addi addi qarra tidha dandiineemmo gara lawishshaho, heeshshote hasiisannonkere afiˈranna maatenke hagiirru noota assiˈra dandiineemmo gara afa hasiˈneemmo. Batinyu manni, Qullaawu Maxaafi huluullitannonke xaˈmuwara dawaro qolannotanna heeshsho woyyeessitannota dancha amaale aannota huwatino. Qullaawu Maxaafi duuchunku mannira kaaˈlannoha lawannohe?
1. Qullaawu Maxaafi dawaro qolannoti mite xaˈmuwa hiikkuriiti?
Qullaawu Maxaafi duuchu mannira huluullitannote aante noo xaˈmuwara dawaro qolanno: Heeshshote kaimi maati? Heeˈneemmohu mayiraati? Danchu manni qarramannohu mayiraati? Mannu reyiro hiikkanno? Mannu baalunku keere heeˈra hasiˈrannoha ikkina, olu togo batiˈrinohu mayiraati? Albillitte baatto hiikkitanno? Qullaawu Maxaafi togoo xaˈmuwara dawaro afiˈrate sharrammeemmo gede jawaachishannonke; qoleno lowo miliyoone ikkanno manni Qullaawu Maxaafi giddonni duushshitanno dawaro afiˈrino.
2. Qullaawu Maxaafi hagiirru noo heeshsho heeˈneemmo gede kaaˈlannonkehu hiittoonniiti?
Qullaawu Maxaafi danchare amaalannonke. Lawishshaho, maate addu hagiirre afiˈra dandiitanno gara kulanno. Qoleno yaaddo gargadhanna loonseemmo loosinni hagiidha dandiineemmo gara amaalannonke. Tenne borro mitteenni xiinxallineemmo woyite, Qullaawu Maxaafi tennenna woleno hattoo hajo daafira mayyaannoro rosatto. Hakkiinni, “Qullaawa Borro baala [Qullaawu Maxaafi giddo noo hedo baalanti] kaaˈlitanno” yaa halaale ikkitinota huwatakki digattanno.—2 Ximootewoosi 3:16.
Tini borro Qullaawa Maxaafa riqibbannota diˈˈikkitino. Hatteentenni, Qullaawa Maxaafa xiinxallate kaaˈlitannohe. Konni daafira, borrote giddo noota Qullaawu Maxaafi qummeeshshuwa faˈnite nabbawatto gedenna rosu ledo heewisiisatto gede jawaachinsheemmohe.
LEDDE XIINXALLI
Qullaawu Maxaafi manna kaaˈlino gara, Qullaawa Maxaafa nabbawa baxisannohe gede assiˈra dandaatto garanna Qullaawu Maxaafi yaannore huwatate kaaˈlo xaˈmiˈra dancha ikkitinohu mayiraatiro huwati.
3. Qullaawu Maxaafi doogo kulannonke
Qullaawu Maxaafi waraˈa yiino caabbichi gedeeti. Heeshshonke giddo danchare doodhineemmo gedenna albillitte ikkannore anfeemmo gede kaaˈlannonke.
Faarso 119:105 nabbabbe; hakkiinni, aante noo xaˈmuwa hasaabbe:
-
Tenne faarso borreessino manchi Qullaawu Maxaafi daafira mayyee hedanno?
-
Ati Qullaawu Maxaafi daafira mayite hedatto?
4. Qullaawu Maxaafi huluullitannonke xaˈmuwara dawaro qolanno
Mitte mancho lowo diro huluullitannase heedhino xaˈmuwara Qullaawu Maxaafi giddonni dawaro afidhino. VIIDIYO laˈe; hakkiinni, aante noo xaˈmuwa hasaabbe.
-
Viidiyote giddo laˈnummo manchora, alba hiittoo xaˈmo noose?
-
Qullaawa Maxaafa xiinxallase kaaˈlitinosehu hiittoonniiti?
Qullaawu Maxaafi xaˈmo xaˈmineemmo gede jawaachishannonke. Maatewoosi 7:7 nabbabbe; hakkiinni, aante noo xaˈmo hasaabbe:
-
Qullaawu Maxaafinni dawaro afiˈra hasiˈrattoti hiitti xaˈmo noohe?
5. Qullaawa Maxaafa nabbawa baxa dandaatto
Batinyu manni Qullaawa Maxaafa nabbawa baxanno; qoleno Qullaawa Maxaafa nabbawansa lowore kaaˈlitanni noonsa. VIIDIYO laˈe; hakkiinni, aante noo xaˈmuwa hasaabbe.
-
Viidiyote giddo laˈnummo wedellooti nabbawa baxxanno?
-
Kayinni Qullaawa Maxaafa nabbawa baxxannohu mayiraati?
Qullaawu Maxaafi sheshifachishannore rosiisannonke; hattono hexxo aannonke. Roomu Sokka 15:4 nabbabbe; hakkiinni, aante noo xaˈmo hasaabbe:
-
Qullaawu Maxaafi aanno sheshonna hexxo daafira ledde afa hasiˈratto?
6. Qullaawu Maxaafi yaannore huwanteemmo gede wolootu kaaˈlitankera dandiitanno
Batinyu manni Qullaawa Maxaafa hojjinsa nabbawannotano agurranna, wolootu ledo hasaawano kaaˈlitinonsata huwatino. Soqqamaasinete Looso 8:26-31 nabbabbe; hakkiinni, aante noo xaˈmo hasaabbe:
-
Qullaawu Maxaafi yaannore huwata dandiineemmohu hiittoonniiti?—Kiiro 30 nna 31 lai.
Itiyophiyu manchira Qullaawa Borro yitannore huwatate kaaˈlannohu hasiisinosi. Yannankera batinyu manni, Qullaawu Maxaafi roso huwatate wolootu ledo hasaawa kaaˈlitannota wodanchino
MITU MANNI TOGO YAANNO: “Qullaawa Maxaafa xiinxalla beebba yanna guxxate.”
-
Ati tennera mayyaatto? Mayira?
XAPHISHSHA
Qullaawu Maxaafi heeshsho seekkitanno amaale aanno, huluullitannonke xaˈmuwara dawaro qolanno, hattono sheshonna hexxo aannonke.
Kageeshsha Rosoottore
-
Qullaawu Maxaafi hiittoo amaale aannonke?
-
Qullaawu Maxaafi dawaro qolannoti mite xaˈmuwa hiikkuriiti?
-
Qullaawu Maxaafi giddonni mayi daafira afa hasiˈratto?
EGENNO LEXXI
Qullaawu Maxaafi amaale yannankera kaaˈlitannonke gara wodanchi.
“Woˈmante Yannara Kaaˈlitannota Qullaawu Maxaafi Amaale” (Agarooshshu Shae Kiiro 1 2018)
Anjesinni kayise ditidhoommoho yee hedanno mancho Qullaawu Maxaafi kaaˈlinosi gara huwati.
Qullaawu Maxaafi aannota maatete kaaˈlitanno amaale xiinxalli.
“Maate Seekkannoha 12 Qara Coye” (Baqqi Yiiyye! Kiiro 2 2018)
Batinyu manni alamete gashshaanchi ayetiro diafino. Qullaawu Maxaafi kayinni alame gashshinohu ayeti yaannoro wodanchi.
Qullaawa Maxaafa Xiinxalla Hasiissannohu Mayiraati?—Woˈma Viidiyo (3:14)
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
