Xaa yannara duuchu manni seerimale gede ikkanno. Dhiwame xagisiˈrara marannohu akimoota xonanno; hoteelete sagale itara marannohu soqqantannore russanno; doogo hadhara horophilla gidditannori hakko soqqantannore siˈanno; seejjo baˈino ooso rosiisaanonsa arrassitanno, waajjishiishshanno, hattono gawajjitanno; mitu poletiku mannooti mancaˈˈa coye assitanno, mitootu kayinni insaneeto jajjanno.

 Qullaawu Maxaafi dancha amanyooteeti yinannihu hiittoohoro xawise kulanno. Qoleno xaa yannara rooru manni seerimale gede ikkannohu mayiraatiro kulanno.

 Xaa yannara alamete aana mannu seerimale gede ikkanni nooti goˈlino coye diˈˈikkitino; rooru mannira danchunna baxisanno amanyooti dinonsa.

•   Muli yannara assinoonni xiinxallo leellishshanno garinni, Ameeriku daga, hakko heeˈranno manni saihu 22 diri giddo xaa gede ikke seera bae diegennino yite heddanno.

•   Qoleno 28 gobbara 32,000 ale ikkanno manni aana assinoonni xiinxallo leellishshanno garinni, 65 anga ikkanno manni, mannu xaa gede ikke seera bae diegennino yiino.

 Qullaawu Maxaafi giddo, xaa yannara nooha mannu akata balanxe masaalloonni.

•   “Goofimarchu barra qarrissanno yanna daggannota afi. Mannu umosi baxannoha, woxe baxannoha, naaxxaleessa, boonaleessa, xonamaancho, iltinonsarira hajajamannokkiha, galata afiˈrinokkiha, . . . baxillu nookkiha, . . . mararro afiˈrinokkiha [ikkanno].”—2 Ximootewoosi 3:1-3.

 Tini masaalo woˈmitanni noo gara ledde afate, “Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?” yaanno birxicho nabbawi.

 Rooru manni seerimale gede ikkannote tenne alamera, lowo miliyoone ikkanno manni danchu amanyooti heeˈrannonke gede kaaˈlannohu kaajju uduunnichi Qullaawa Maxaafa ikkinota huwatino. Qullaawu Maxaafi amaalanno amaale “hegerera disoorrantannote.” (Faarso 111:8) Hanni mito lawishsha laˈno:

•   Qullaawu Maxaafi yaannore: “Mannu kiˈnera assaˈnera hasidhinannire baala kiˈneno insara assensa.”—Maatewoosi 7:12.

   Tiro: Mannu ninkera assankera hasiˈneemmonte gede, ninkeno wolu mannira shaqqaddanna ayirrinseemmore ikka hasiissannonke.

•   Qullaawu Maxaafi yaannore: “Kapho fushshitine tugge. . . . Mimmitinkera halaale coyiˈno.”​—Efesooni Sokka 4:25.

   Tiro: Coyiˈneemmo coyinnino ikko assineemmorinni ammanammoommore ikka hasiissannonke.

 Tenne hajo daafira ledde afate, aante noo borro nabbawi:

•   “Danchare Doodhate Kaaˈlannonkeri Maati?” yitannota Agarooshshu Shae ittime.

•   “Qullaawu Maxaafi Mimmito Dandee Heeˈrate Kaaˈlanno—Hiittoonni?” yaanno birxicho.