Mo pensé lâ oko awe ti diko Bible, me mara ti ye so asi na azo so a sara tënë ti ala ge so asara si mo zia lege ni? Ti azo mingi, dikongo Bible akpa mbeni ye so ayeke ngangu mingi. Ka tongana mo hinga so Bible alingbi ti mû maboko na mo ti duti na ngia ahon ti kozo nga na gigi so anzere mingi, mo yeke sara tongana nyen? Ka tongana mo ga ti hinga so ambeni kode ayeke dä ti dikongo Bible so alingbi ti sara si dikongo Bible ni anzere encore mingi, mo yeke sara tongana nyen? Mo yeke duti nduru ti yeda na aye so Bible afa na mo?

Bâ gï ambeni kete tënë so ambeni zo atene na ndö ti ye ti nzoni so ala wara na ngoi so ala komanse ti diko Bible.

Ezekiel, so awara ngu 20 tongaso, atene: “Ândö, mbi yeke tongana mbeni zo so ayeke kpe na oto so ahinga ndo so lo yeke gue dä ape. Me dikongo Bible amû maboko na mbi ti hinga ndani so mbi yeke na fini. A yeke wara na yâ ti Bible ni gbâ ti awango ti ndara so a peut ti aidé mbi lâ na lâ.”

Frieda, so ayeke na ngu 20 na ndö ni, atene: “Mbi yeke sara ka ngonzo hio mingi. Me, teti so mbi yeke diko Bible, a sara si mbi hinga ti kanga bê ti mbi. Ye so asara si a yeke fadeso facile na azo ti sara kamarade na mbi, na mbi yeke fadeso na gbâ ti akamarade.”

Eunice, so ayeke na ngu 50 na ndö ni, asara tënë na ndö ti Bible, lo tene: “A mû maboko na mbi ti ga mbeni nzoni zo, ti changé asioni sarango ye ti mbi.”

Tongana ti azo so a sara tënë ti ala ge so nga na ti ambeni zo kutu mingi, hinga so dikongo Bible alingbi ti aidé mo ti duti na mbeni fini so ayeke nzoni mingi (Ésaïe 48:17, 18). Ambeni ye so Bible alingbi ti aidé mo na yâ ni ayeke (1) ti mû anzoni desizion, (2) ti soro anzoni kamarade, (3) ti luti na lê ti akpale, nga (4) nzoni ye ni kue, a yeke ti hinga tâ tënë na ndö ti Nzapa. Awango ti Bible alondo na Nzapa, tongaso mo lingbi lâ oko ape ti sara ye kirikiri tongana mo yeke sara ye alingbi na ni. Nzapa ayeke mû lâ oko asioni wango na e ape.

Ye so ayeke kota mingi ayeke ti komanse ti diko Bible ni. Awango ti ndara wa la alingbi ti aidé mo ti komanse ti sara ni nga ti wara ngia mingi dä?