So e yeke ahale ti kozo koli, Adam, e kue e yeke ti sewa oko. Na yâ ti sewa, a lingbi azo ni andoye mba nga ane mba. Me laso, a yeke ngangu ti wara mara ti ndoye ni so. Ye so Nzapa ti e so ayeke na ndoye aye la ape.

“Mo doit ti ndoye mba ti mo tongana mo wani.”—LÉVITIQUE 19:18.

“Ala ngbâ ti ndoye awato ti ala.”—MATTHIEU 5:44.

Bâ tongana nyen la Nzapa afa nda ti tënë ndoye na yâ ti Mbeti ti lo na 1 aCorinthien 13:4-7:

“Ndoye ahinga ti kanga bê ti ku nga lo sara nzoni na zo.”

Gbu li na ndö ti ye so: A yeke sara mo tongana nyen tongana amba ti mo akanga bê na mo, asara nzoni na mo nga asara ngonzo ape tongana mo sara faute?

“Ndoye asara kota bê pëpe.”

Gbu li na ndö ti ye so: A yeke sara mo tongana nyen tongana amba ti mo asara kota bê na terê ti mo?

Ndoye ayeke “gi gï aye so anzere na lo pëpe.”

Gbu li na ndö ti ye so: A yeke sara mo tongana nyen tongana amba ti mo ayeke bâ lakue apensé ti mo na nene ni nga ala yeke gï lakue pëpe ti tene mo yeda na pensé ti ala?

Ndoye ayeke “diko pëpe sioni so a sara na lo.”

Gbu li na ndö ti ye so: Nzapa aye ti pardonné azo so asara siokpari na si achangé bê ti ala. “Lo yeke ngbâ ande lakue pëpe ti gi ti bâ afaute so zo asara, nga lo yeke . . . bata ngonzo na terê ti zo pëpe.” (Psaume 103:9). A yeke nzere ka na e mingi tongana mbeni zo so e son bê ti lo apardonné e. Tongaso, a lingbi e duti nduru ti pardonné amba ti e tongana ala son bê ti e.—Psaume 86:5.

Ndoye ayeke “wara ngia na yâ ti ye ti kirikiri pëpe.”

Gbu li na ndö ti ye so: Tongana mbeni ye ti sioni asi na e, a yeke nzere ka na e ape tongana e bâ so ye ni so anzere na amba ti e. Tongaso, e doit ti duti na ngia ape tongana ye ti ngangu asi na amba ti e, même si ala sara lani ye ti sioni na e.

Ti tene Nzapa airi tënë nzoni na ndö ti e, a lingbi e ndoye amba ti e atâa ngu ti ala ayeke oke, ala yeke ti kodro wa wala ala sara bungbi ti Nzapa wa. Mbeni lege so e lingbi ti fa so e ndoye azo ayeke ti aidé ala so abezoin mungo maboko.