“Gi ti wara ngia mingi na mbage ti Jéhovah, na lo yeke mû na mo aye so bê ti mo asara nzara ni.”—Psaume 37:4, Mbeti ti Nzapa ti fini dunia.

 “Gi lege ti wara ngia ti mo na yâ L’Éternel, na fade lo mû na mo ye so bê ti mo aye.”—Psaume 37:4, La Sainte Bible en Sango.

 Zo ti sungo psaume ni a-encouragé awakua ti Nzapa ti duti na ngia ndali ti so ala yeke na kpengba songo na Lo. Ala kue so ayeke na kpengba songo na Jéhovah a Nzapa apeut ti duti sûr so lo yeke mû na ala aye so ala yeke na bezoin ni.

 “Gi ti wara ngia mingi na mbage ti Jéhovah.” A peut ti kiri na peko ti tënë so na “wara kota ngia na mbage ti Jéhovah,” “gi lege ti wara ngia ti mo na lege ti KOTA GBIA,” wala “zia bê ti mo anzere gï na ye ti Nzapa.” Tënë so aye gï ti tene, e yeke “wara kota ngia ti [e]” na vorongo tâ Nzapa (Psaume 37:4, kete tënë na gbe ni). E tene tongaso ngbanga ti nyen?

 Azo so avoro Jéhovah ayeke na oko bango ndo ti lo, tongana ti so Bible afa. Ala hinga Nzapa, na ala hinga nga so ayeke nzoni ti mä yanga ti lo. Ye ti peko ni ayeke so, ala yeke na nzoni conscience, ala kpe ti sara afaute nga ti mû asioni desizion (aProverbe 3:5, 6). Na tapande, bê ti awakua ti Nzapa ayeke son ape wala ala yeke sara bê ape na terê ti azo so ayeke sara bê ti ye wala so ayeke sara ye na lege ni ape, so na bango ni aye ti ala amaï (Psaume 37:1, 7-9). Anzere na awakua ti Jéhovah ti hinga so lo ga nduru awe ti zi aye ti sioni kue nga so lo yeke futa ande awakua ti lo so ayeke be-ta-zo ndali ti nzoni sarango ye ti ala (Psaume 37:34). Anzere nga na ala mingi ti hinga so ala zia ngia na bê ti Babâ ti ala ti yayu.—Psaume 5:12; aProverbe 27:11.

 “Lo yeke mû na mo aye so bê ti mo asara nzara ni.” A peut nga ti kiri na peko ti tënë so na “lo yeke kiri tënë na asambela ti mo” wala “lo yeke mû na mo aye so mo hunda na lo.” Ti tâ tënë ni, aye kue so e hunda ni na Jéhovah, a yeke gï ni la lo yeke mû ni na e ape. Legeoko tongana mbeni nzoni Babâ, Jéhovah ahinga ye so ayeke nzoni ndali ti amolenge ti lo. Na ndö ni, aye so e hunda nga na fason so e yeke vivre na ni adoit ti gue oko na ye so bê ti lo aye (aProverbe 28:9; Jacques 4:3; 1 Jean 5:14). Tongana e yeke sara tongaso, e peut ti ga nduru na Lo so ayeke “mä sambela” na e hinga so lo yeke mä e.—Psaume 65:2; Matthieu 21:22.

 David so ayeke lani gbia ti Israël ti giriri la asû Psaume 37. Lo sû psaume ni na kode ti dikongo alphabet ti Hébreu. b

 A sara ye lani na David na lege ni ape. Lo kpe lani Gbia Saül nga na ambeni zo so aye ti fâ lo (2 Samuel 22:1). Me, David asara lani confiance lakue na Nzapa ti lo. David ahinga so, nyen na nyen, Jéhovah ayeke fâ ngbanga na ndö ti azo ti sioni (Psaume 37:10, 11). Même si na bango ni, azo ti sioni amaï tongana “fini pere”, ala yeke duti ande dä encore ape.—Psaume 37:2, 20, 35, 36.

 Psaume 37 afa kangbi so ayeke na popo ti azo so asara ye alingbi na aye so Nzapa ahunda nga na azo so asara sanka ni (Psaume 37:16, 17, 21, 22, 27, 28). Tongaso, mbeti ti Psaume a-aidé e ti wara ndara nga ti duti azo so anzere na lê ti Nzapa.

 Bâ nduru vidéo so ti bâ ambeni ye so ayeke na yâ ti mbeti ti Psaume.