Dimingu, ntsiku 2 ya Outubro ya 2022, ikhali ntsiku yakukhonda duwalika thangwi yakubuluswa kwa Bhibhlya ya Dziko Ipswa mu cilongero ca Cisena. M’bale David Amorim, m’bodzi wa Komiti ya Filiali ya Mosambiki adziwisa kubuluswa kwa Bhibhlya ineyi pa nsonkhano wakupambulika udacitwa mu TV broadcasting, m’maradhyo anango na mu JW Stream. Amwazi mphangwa analonga Cisena atsandzaya kakamwe pidatambira iwo Bhibhlya yamumphu mu cilongero cakuti asakomerwa naco, pontho asacibva mwadidi. Iwo atsandzayambo kakamwe na kubvesera nkhani yakubuluswa kwa Bhibhlya mu cilongero cawo.

Bhibhlya ya Dziko Ipswa ndi yakupambulika thangwi ndi yakunyindirika, pontho isalonga undimomwene wa mphangwa za Mulungu. (2 Timoti 3:​16) Ndi pinthu pipi pinadzudzumisa anthu pyakuti pisagumanika m’Mabhibhlya anango, mbwenye nee pisagumanika m’Bhibhlya ya Dziko Ipswa? Mbani adaphedzera kuthumburuzwa kwa Bhibhlya ineyi? Pontho munakwanisa tani kukhala na cinyindiro cakuti Bhibhlya ya Dziko Ipswa ndi yakunyindirika?

Mpfundzisi wa anyakucita malonda pa dziko yonsene, anacemerwa Declan Hayes, alonga: “Bhibhlya ndi bukhu yakuti isaguliswa kakamwe pyaka pyonsene. Mbwenye pyakutsukwalisa ndi pyakuti nee ndi Mabhibhlya onsene akuti ndi akunyindirika.” Mwacitsandzo, athumburuzi anango afudza makhundu a Bhibhlya adaona iwo kuti ndi “akunentsa.” Anangombo afudza mafala adaona iwo kuti panango anatsukwalisa anyakuleri awo acincino. Mwacitsandzo, Mabhibhlya anewa asacemera Mulungu “Pai peno Mai” toera kukomeresa anthu azinji.

Panango pinthu pinadzudzumisa kakamwe anthu m’Mabhibhlya anathumburuzwa pisaphataniza dzina ya Mulungu, Yahova. (Anyakudziwisa anango, dzina ya Mulungu asaicemera “Yahweh.”) M’matsamba akale a Bhibhlya, dzina ya Mulungu ikhalembwa na maletra manai Acihebheri akuti ndi YHWH peno JHVH. Dzina ineyi yakuti ndi yakusiyana kakamwe na anango isagumanika m’maulendo cifupi na 7.000 basi ene m’Malemba Acihebheri. a (Eksodho 3:​15; Masalmo 83:18) Natenepa, pyenepi pisapangiza kuti Mulungu akhafuna kuti atumiki ace adziwe dzina yace, mbaiphatisira!

Mbwenye kale kakamwe, anyakugopa mukho acitisa Ayuda kusiya kulonga dzina ya Mulungu. Mukupita kwa ndzidzi, Akristu atomambo kugopa kulonga dzina ya Mulungu. (Mabasa 20:29, 30; 1 Timoti 4:1) Lero, athumburuzi a Bhibhlya kazinji kene asabulusa dzina ya Mulungu, mbaikha “Mbuya.” Mabhibhlya anango Acingerezi anathumburuzwa cincino abulusa fala yakuti “dzina” pa Juwau 17:6. Pa vesi ineyi Yezu alonga: “Ine ndadziwisa dzina yanu.” M’Bhibhlya ya Good News vesi ineyi yathumburuzwa tenepa: “Ine ndakudziwisani.”

Anyakudziwisa anango angabulusa dzina ya Mulungu, mbaikha “Mbuya” asalonga kuti basi ene akutowezera nsambo unacita anango. Anangombo asalonga kuti asacita pyenepi toera Mabhibhlya aguliwe na anthu azinji. Mbwenye Yezu asandika ale akhatowezera misambo yakuti nee isalemedza Mulungu. b (Mateu 15:6) Kusiyapo pyenepi, maonero akubulusa dzina ya Mulungu, mbaikha cidzo nee asabverana na pinalonga Bhibhlya. Yezu ali na pidzo pizinji ninga: “Fala ya Mulungu” na “Mambo wa amambo.” (Apokalipse 19:11-​16) Kodi dzina ya Yezu, isafunika kubuluswa mbipitirwa mbuto na pidzo pyenepi?

Pyenepi ndi pyakutsuwalisa kakamwe. Onani mafala awa adalonga mamuna m’bodzi wa ku Indiya thangwi yakubuluswa kwa dzina ya Mulungu m’Bhibhlya: “Anthu a ku Indiya nee asakomerwa na cidzo ca Mulungu basi, iwo asafuna kudziwa dzina ya Mulungu, pontho iwo angakhonda kudziwa dzina yace, pisakhala pyakunentsa toera kucita naye uxamwali.” Mwandimomwene, ndi pyenepi pinacitikambo kuna onsene anafuna kudziwa Mulungu. Toera kudziwa mwadidi Mulungu, tisafunika kudziwa dzina yace, tayu basi ninga mphambvu, mbwenye ninga munthu wandimomwene wakuti tinakwanisa kundziwa. (Eksodho 34:​6, 7) Natenepa Bhibhlya isalonga: “Onsene anacemera dzina ya Yahova anadzapulumuswa.” (Aroma 10:13) Ale analambira Mulungu asafunika kuphatisira dzina yace!

Caka 1950 ndi cakukhonda duwalika, thangwi ndi caka ceneci cidabuluswa paulendo wakutoma Bhibhlya ya Dziko Ipswa ya Malemba Acigerego Acikristu mu Cingerezi. Nkati mwa pyaka khumi pidatowera, Malemba Acihebheri abuluswa mwapang’ono-pang’ono. Mu caka 1961 Bhibhlya yamumphu yakuti ikhali volume ibodzi basi yakubuluswa mu Cingerezi. Bhibhlya ya Dziko Ipswa yathumburuza dzina ya Mulungu, “Yahova,” m’mbuto zonsene zikhagumanika iyo cifupi na maulendo 7.000 mu Unthaka Wakale. Kusiyapo pyenepi, dzina ya Mulungu yaikhwa pontho m’mbuto zonsene zikhagumanika iyo m’Malemba Acigerego Acikristu c m’maulendo akukwana 237.

Kuikha pontho dzina ineyi kusalemedza Mulungu, pontho kusatiphedza toera tikwanise kubvesesa mwadidi Malemba. Mwacitsandzo, Mabhibhlya mazinji athumburuza tenepa lemba ya Mateu 22:44: “Mbuya alonga kuna Mbuyanga.” Mwakwanisa kubvesesa kuti mbani adalonga na ndzace pa vesi ineyi? Bhibhlya ya Dziko Ipswa yathumburuza tenepa lemba ya Mateu 22:44: “Yahova alonga kuna Mbuyanga” mwakubverana na Masalmo 110:1. Munjira ineyi, anyakuleri mbadakwanisa kusiyanisa Yahova Mulungu na Mwanace.

Bhibhlya ya Dziko Ipswa isabuluswa na Watch Tower Bible and Tract Society, nsoka wakudziwika wakuti usaimirira Mboni za Yahova. Mu pyaka pyakupiringana 100, Mboni za Yahova zisadhinda na kugawiza Mabhibhlya pa dziko yonsene yapantsi. Bhibhlya ya Dziko Ipswa yacitwa na nsoka wa Mboni za Yahova unacemerwa Komiti ya Bhibhlya ya Dziko Ipswa. M’mbuto mwakufuna kakamwe kuti akhale akubvekera, ale anacita khundu ya komiti ineyi aphemba toera madzina awo akhonde kulongwa maseze iwo angafa.​—1 Akorinto 10:31.

Thangwi yanji Bhibhlya ineyi isacemerwa Bhibhlya ya Dziko Ipswa? Mafala akutoma a Bhibhlya idabuluswa mu caka 1950 apangiza kuti nsolo unoyu usapangiza cinyindiro cakuwanga ciri na anthu akuti “ali pansuwo ukulu kakamwe wakupita nawo mu dziko ipswa” inapikirwa pa 2 Pedhru 3:​13. Mwakubverana na pidalemba komiti ineyi, mu ndzidzi “unacinjwa makhaliro a dziko ino yakale toera anthu apite mu dziko ipswa,” ndi pyakufunika kakamwe kuti Mabhibhlya anathumburuzwa acitise kuti “undimomwene wa Mafala a Mulungu” upitirize kuyetimira.

Ale adathumburuza Bhibhlya ya Cingerezi, awangisira kakamwe toera Bhibhlya ineyi ikhale yakunyindirika. Iwo aphatisira malemba akunyindirika kakamwe Acihebheri cakale, Ciaramaki cakale na Cigerego cakale. Iwo acita pyonsene pikhakwanisa iwo toera Bhibhlya ikhale yakunyindirika mwakubverana na Malemba akale, mbwenye aphatisira mafala akuti anyakuleri a mu ntsiku zino mbadaabvesesa mwakukhonda nentsa.

Ndi thangwi yace, anyakudziwisa anango asakomerwa kakamwe na kunyindirika, pontho na kundendemera kwa Bhibhlya ya Dziko Ipswa. Mpfundzisi Benjamin Kedar-Kopfstein, wakuti ndi nyakudziwisa Wacihebheri wa ku Izraeli alonga tenepa mu caka 1989: “M’basa yanga yakusaka mphangwa thangwi ya cilongero ca Bhibhlya ya Cihebheri na Mabhibhlya anango, kazinji kene ndisaona Bhibhlya ya Cingerezi inadziwika na Bhibhlya ya Dziko Ipswa. Kucita kwanga pyenepi kusapangiza kuti ale adathumburuza Bhibhlya ineyi, awangisira kakamwe toera ikhale yakubveka mwadidi na yakunyindirika.”

Kusiyapo Bhibhlya ya Cingerezi, Mboni za Yahova zathumburuza Bhibhlya ya Dziko Ipswa mu pilongero pinango. Cincino Bhibhlya ineyi yathumburuzwa yonsene peno khundu ibodzi mu pilongero pyakukwana 237. Toera kuphedzera basa ineyi, pana njira ipswa yakuthumburuza Bhibhlya. Ntcini wandzeru usaphatisirwa toera kubveranisa mafala a m’Bhibhlya, pontho dhepartamentu inacemerwa Serviços de Tradução yakhazikiswa toera kuphedza athumburuzi. Mathubo Akutonga asaphatisira Komiti Yakulemba toera kutsogolera basa yakuthumburuza Bhibhlya. Mphapo basa ineyi isaphatwa tani?

Pakutoma, abale akuperekeka asasankhulwa toera akhale athumburuzi. Pyaoniwa kuti athumburuzi angaphata pabodzi ninga nsoka, tayu munthu m’bodzi, iwo asathumburuza munjira yadidi kakamwe. (Misangani 11:14) Kazinji kene, ale anacita khundu ya nsoka wa athumburuzi a Bhibhhlya ndi anthu akuti ali na maluso akuthumburuza mabukhu a Mboni za Yahova. Nsoka unoyu usapfundziswa mwadidi pitsogolero pinaphatisirwa na athumburuzi a Bhibhlya, kuphatanizambo maprogramu a mu ntcini wandzeru anafunika iwo kuphatisira pakuthumburuza.

Ale anathumburuza Bhibhlya asapfundziswa kuti asafunika kuthumburuza Bhibhlya yakunyindirika, yakuti anthu adakhonda kupfundza kakamwe anaibvesesambo. Iwo asafunika kuthumburuza fala na fala pingakwanisika, mbwenye mu ndzidzi ubodzi ene mabvekero ace nee asafunika kusiyana na Malemba a mu ndzidzi wakale. Kodi asacita tani pyenepi? Onani basi Bhibhlya idamala kwene kubuluswa. Pakutoma, nsoka wa athumburuzi wa Cisena wathumburuza mu cilongero cawo mafala onsene akufunika kakamwe anagumanika m’Bhibhlya ya Dziko Ipswa ya Cingerezi. Buluka penepo, programu ya mu ntcini wandzeru inacemerwa Watchtower Translation System isapangiza mafala anango akulandana adaphatisirwa m’Bhibhlya. Programu ineyi isapangizambo mafala Acigerego cakale peno Acihebheri adaphatisira Angerezi toera kuthumburuza, pontho pyenepi pisaphedza athumburuzi toera kuona mbuto zinango zidaphatisirwa mafala anewa Acigerego peno Acihebheri. Nsoka ungamala kusankhula mafala anafuna iwo kuphatisira, iwo usatoma kuthumburuza Bhibhlya, pontho usaphatisira ntcini wandzeru toera kuona mafala a Cisena mu ndzidzi unathumburuza iwo vesi ibodzi na ibodzi.

Mbwenye kuthumburuza kusaphataniza pizinji kupiringana basi ene kuikha mafala adamala kuthumburuzwa. Ndi basa ikulu kakamwe ikhafunika kuphatwa toera kukhala na cinyindiro cakuti fala ibodzi na ibodzi idasankhulwa mu Cisena iphatisirwe pa mbuto yakuthema m’Bhibhlya. Ale adathumburuza awangisira kakamwe toera athumburuze mwadidi mafala ninga munaalonga anthu ntsiku na ntsiku. Kuthumburuza Bhibhlya ndi basa ikulu kakamwe. Bhibhlya ya Dziko Ipswa ya Cisena yathumburuzwa munjira yakukhonda nentsa kuleri, yakukhonda nentsa kubvesesa na yakunyindirika mwakubverana na Malemba akale. d

Tisakuphembani toera muone mwekhene Bhibhlya ya Dziko Ipswa. Imwe munakwanisa kuileri mu Interneti, mu JW Library, peno munakwanisa kuphemba yakudhindwa pa Nyumba ya Umambo ya Mboni za Yahova. Imwe munakwanisa kuleri Bhibhlya ineyi na cinyindiro consene cakuti ndi Mafala a Mulungu mu cilongero canu. Mwakukhonda penula, thimize pano imwe munadzatawira kuti ntsiku idabuluswa Bhibhlya ineyi ndi yakukhonda duwalika!

Mphangwa Zakutoma za Mafala a Mulungu: Khundu ineyi iri na mavesi akuti asatawira mibvundzo 20 thangwi ya pipfundziso pyakutoma pya m’Bhibhlya

Bhibhlya yakunyindirika: Ale adathumburuza Bhibhlya awangisira kakamwe toera kuithumburuza kubulukira mu pilongero pyakale ninga Cihebheri, Ciaramaki na Cigerego kudza Cingerezi, buluka penepo kudza Cisena. Mbwenye iwo acita pyonsene pikhakwanisa iwo toera Bhibhlya ikhale yakunyindirika kakamwe

Malemba akuti asabverana na malemba anango a m’Bhibhlya: Khundu ineyi isaphedza anyakuleri toera kugumana mavesi anango akulandana

Apendise A: Asapangiza mphangwa za m’Bhibhlya ino, ninga malembero, njira yakulonga na njira yakuthumburuza dzina ya Mulungu

Apendise B: Asaphataniza makhundu 15 a makore akubalika akuti ali na mapa na madzina a mbuto