Nicolas na Céline athimbana na pinentso pyakusiyana. Bheteli ya Fransa yaacinja toera aende kasonkhana mu mpingo unango. Iwo alonga: “Pakutoma takhala akutsandzaya kakamwe, mbwenye mukupita kwa ndzidzi tatoma kutsuwa axamwali athu. Ife tikhadzati kukhala na axamwali azinji mu mpingo unoyu.” a Nakuti munthu angacinja mpingo asathimbana na pinentso, munakwanisa tani kukhala akutsandzaya mbamupitiriza kutumikira Yahova? Anango anacitanji toera kuphedza? Kusiyapo pyenepi, ndi nkhombo zipi zauzimu zinafuna kukhala na imwe mu mpingo upswa, pontho munaphedza tani anango?

PINTHU PINAI PINAFUNA KUKUPHEDZANI TOERA KUDZOLOWERA MPINGO UPSWA

1. Nyindirani Yahova. (Mas. 37:5) Mulongo wa ku Japau anacemerwa Kazumi, akhala mu mpingo mwace pyaka 20, buluka penepo iye acinja mpingo thangwi mamunace akhafunika kuenda kaphata basa ku mbuto inango. Iye atawirisa tani ‘Yahova kuti antsogolere’? Iye alonga: “Ndaphembera kakamwe kuna Yahova mbandimpanga mabvero anga. Ine ndikhagopa, ndikhapibva kuti ndiri ndekhene, pontho ndikhadzudzumika kakamwe. Mbwenye ndzidzi onsene ukhacita ine phembero kuna Yahova, iye akhandipasa mphambvu.”

Munacitanji toera kunyindira kakamwe Yahova? Ninga muti wakuti usafuna madzi na pinthu pinango toera ukule, tisafunambo pinthu pibodzi pyene pyakuphiphirisa toera cikhulupiro cathu cikhale cakuwanga. Nicolas, adalongwa pakutoma anyindira kakamwe ciphedzo ca Yahova kubulukira mukunyerezera citsandzo ca Abhrahamu, Yezu na mpostolo Paulu, akuti awangisira kakamwe toera kucita pinafuna Mulungu. Kucita pfundziro ya munthu paekha mwakukhonda phonya nee kunakuphedzani basi ene toera kuthimbana na pinentso mu umaso, mbwenye kunakuphedzanimbo toera kupfundza pinthu pyakuti munawangisa napyo anango mu mpingo upswa.

 2. Lekani kulandanisa mpingo unasonkhana imwe cincino na udabuluka imwe. (Ekle. 7:10) M’bale Jules afuluka ku Benin mbaenda ku Estados Unidos, pontho aona kuti misambo ndi yakusiyana kakamwe. Iye alonga: “Ine ndikhanyerezera kuti ndikhafunika kulonga pinthu pidacitika mu umaso wanga kuna anthu onsene akhaonana na ine.” Thangwi yakusiyana kwa misambo, iye atoma kukhala kutali na abale a mpingo unoyu. Mbwenye pidadziwa iye mwadidi abale na alongo, acinja maonero ace. Iye alonga: “Ine ndadzindikira kuti mwakukhonda tsalakana mbuto inagumanika ife pa dziko yapantsi tonsene ndife abodzi ene, basi ene tisalonga na kucita pinthu mwakusiyana. Cakufunika kakamwe ndi kudzolowera makhaliro a anthu anango.” Na thangwi ineyi, nee tisafunika kulandanisa mpingo udabuluka ife na unasonkhana ife cincino. Mpainiya anacemerwa Anne-Lise alonga: “Ine ndacinja mpingo thangwi ndikhafuna kupfundza pinthu pipswa, tayu thangwi ndikhafuna kugumana pinthu pibodzi pyene pikhali mu mpingo udabuluka ine.”

Akulu a mpingo nee asafunika kulandanisa pinthu pya mpingo upswa na pya mpingo wakale. Akulu a mpingo angaona kuti abale a mpingo upswa ali kucita pinthu mwakusiyana na mpingo udabuluka iwo, nee pisabveka kuti abale anewa ali kucita pinthu mwakuphonyeka. Ndi pyakufunika kudziwa pinthu pinacitika mu mpingo unoyu mbamudzati pereka maonero. (Ekle. 3:1, 7b) Kusiyapo pyenepi, ndi pyakufunika kupfundzisa abale na citsandzo cadidi m’mbuto mwa kuakakamiza toera anyerezere munjira inanyerezera ife.—2 Akor. 1:24.

3. Khalani na pizinji toera kucita. (Afil. 1:27) Kufuluka kusabvunga ndzidzi uzinji na mphambvu. Mbwenye ndi pyakufunika mwakukhonda dembuka kutoma kusonkhana pabodzi na mpingo upswa, pingakwanisika pa mbuto ibodzi ene na abale na alongo anango. Thangwi abale na alongo a mpingo upswa angakhonda kutiona pa misonkhano, iwo nee anakwanisa kutiphedza. Mulongo unango anacemerwa Lucinda wa ku Afrika do Sul afuluka mbaenda mu nzinda pabodzi na anace awiri. Iye alonga: “Axamwali anga andipanga toera ndicite uxamwali na abale na alongo mu mpingo upswa, kumwaza mphangwa pabodzi na iwo na kutawira pa misonkhano. Ife tatawirisambo abale toera kucita nsonkhano wakubuluka m’basa ya m’munda panyumba pathu.”

Cinthu cinafuna kukuphedzani toera kuwangisana unango na ndzace ndi ‘kuwangisira pabodzi pene’ toera kucita mabasa mu mpingo upswa. Akulu a mpingo wa Anne-Lise, adalongwa pakutoma ankulumiza toera aende kamwaza mphangwa na abale na alongo onsene mu mpingo. Pyenepi pyamphedza tani? Iye alonga: “Mwakukhonda dembuka, ine ndadzindikira kuti kucita pyenepi ndi pyadidi kakamwe toera kupibva kuti ndisacita khundu ya mpingo upswa.” Kusiyapo pyenepi, mungacitambo basa ya kucenesa Nyumba ya Umambo na kuisasanyira, imwe munapangiza kuti cincino musacita khundu ya mpingo unoyu. Mungaphedzera kakamwe mabasa anewa, mwakukhonda dembuka abale na alongo anakhala akusudzuka na imwe, pontho imwe munapibva kuti musacita khundu ya mpingo unoyu upswa.

4. Citani axamwali apswa. (2 Akor. 6:11-13) Njira yadidi kakamwe yakucita axamwali ndi kupangiza citsalakano kuna anthu. Natenepa fikani nakweru pa Nyumba ya Umambo, pontho khalani pang’ono  mungakotoka toera mukwanise kucedza na abale na alongo na kuadziwa mwadidi. Wangisirani toera kudziwa madzina awo. Kukumbuka madzina a abale na alongo, kukhala wakukoma ntima na wakudzolowereka, kunacitisa anango kukhala akusudzuka toera kucedza na imwe, pontho pinakhala pyakukhonda nentsa toera mukhale na axamwali adidi.

Lekani kudzudzumika kakamwe toera abale akomerwe na imwe. Mbwenye siyani kuti iwo adziwe undimomwene wa makhaliro anu. Citani ninga pidalonga Lucinda: “Ife tiri na axamwali adidi thangwi ndife adatoma kuacemera toera abwere panyumba pathu.”

“TAMBIRANANI UNANGO NA NDZACE”

Anango panango asagopa kupita n’Nyumba ya Umambo mbagumana anthu azinji akuti nee asaadziwa. Mphapo munaphedza tani abale na alongo apswa mu mpingo mwanu toera adzolowere? Mpostolo Paulu alonga kuti “tambiranani unango na ndzace ninga mudakutambirani Kristu.” (Aroma 15:7) Akulu a mpingo anakwanisa kuphedza abale na alongo apswa toera apibve kuti atambirwa mwadidi, pontho angacita pyenepi iwo ali kutowezera Yezu. (Onani bokosi ya nsolo wakuti “ Munacitanji Toera Pikhale Pyakukhonda Nentsa Kudzolowera Mpingo Upswa?”) Onsene mu mpingo, kuphatanizambo anapiana anakwanisa kuphedza abale na alongo apswa toera apibve kuti asacita khundu ya mpingo unoyu.

Kutambira mwadidi anango kusaphatanizambo kucita pinthu toera kuaphedza. Mwacitsandzo, mulongo m’bodzi aphedza mulongo unango wakuti akhadafika kwene mu mpingo wawo, iye ampangiza nzinda na mbuto zakuti mbadakwanisa kukwira maxibhombo na komboyo. Mulongo wakuti akhadafika kwene pa mpingo akomerwa kakamwe na pidacita mulongo unoyu, pontho pyenepi pyamphedza toera kudzolowera mpingo upswa.

MWAI TOERA KUKULA

Mwana wa mbalame panango ananyinyirika toera kutoma kumburuka, mbwenye angakwanisa kucita pyenepi asamburuka mpaka kufika kutali kakamwe. Munjira ibodzi ene, mungacinja mbamuenda mu mpingo upswa, panango munanyinyirika toera kucita  axamwali, mbwenye mungawangisira munakunda kugopa kweneku mbamucita axamwali na kupitiriza kutumikira Yahova. Nicolas na Céline adalongwa pakutoma alonga: “Kucinja mpingo kusatipfundzisa pinthu pizinji. Toera tikwanise kudzolowera mbuto ipswa na abale na alongo akusiyana-siyana tikhafunika kukulisa makhaliro mapswa.” Jean-Charles adalongwa pakutoma, alonga kuti iye na banjace aphedzeka tani: Mu mpingo unasonkhana ife cincino, anathu akhala akukola mwauzimu, pontho ali na uxamwali wakuwanga na Yahova. Pidapita miyezi mingasi, mwanathu wankazi atoma kucita khundu pa misonkhano ya pakati pa sumana, pontho mwanathu wamamuna akhala m’mwazi mphangwa wakukhonda batizwa.”

Mphapo ndiye tani khala imwe musafuna kuenda kaphedzera kumbuto iri na amwazi mphangwa akucepa mbwenye makhaliro anu nee asakutawirisani? Imwe munakwanisa kuphatisira maonero mabodzi ene adalongwa mu nsolo uno pa mpingo wanu. Mungacita pyenepi, imwe munapibva ninga muli kusonkhana mu mpingo unango. Natenepa nyindirani Yahova, citani mabasa mazinji mu mpingo, pontho wangisirani toera kumwaza mphangwa pabodzi na abale na alongo mu mpingo. Kusiyapo pyenepi, citani axamwali apswa, pontho pitirizani kukhala na uxamwali wakuwanga na axamwali anu akale. Imwe munakwanisambo kuphedza abale na alongo apswa akuti asafuna ciphedzo. Kucita pyenepi kunakuphedzani toera kukhala wakuwanga mwauzimu, thangwi ufuni ndi n’khaliro unadziwika na Akristu andimomwene. (Juw. 13:35) Khalani na cinyindiro cakuti “Mulungu asakomerwa na ntsembe zenezi.”—Aheb. 13:16.

Mwakukhonda tsalakana pinentso, abale na alongo azinji akwanisa kudzolowera mpingo upswa, pontho imwe munakwanisambo. Anne-Lise alonga: “Kucinja mpingo kwandiphedza toera ndikhale na axamwali apswa.” Kazumi ali na cinyindiro cakuti kucinja mpingo kwamphedza toera kuona ciphedzo ca Yahova cakuti cipo akhadaciona kale. Ndiye tanimbo Jules? Iye alonga: “Axamwali adakhala na ine andiphedza toera ndipibve kuti ndisacita khundu ya mpingo. Cincino ndisapibva kuti ndisacita khundu ya mpingo, pontho pinakhala pyakunentsa kakamwe toera kubuluka mu mpingo unoyu.”